2 Kurintu 12 - Hanunuu

Manga Ipinakakit Diyus sa kan Pablu

¹ Mahimu diman aku magpadayaw-dayaw madi unman may pakinabang siti. Taynguna aku may itultul maan tungkul sa manga ipinakakit Panginuun hanggan tungkul sa manga ipinakilala niya.

² May kilala aku usa ka tawu napasakup sa kan Kiristu. Dinara siya atabug sa ikatlu pag langit, sampulu yi may upat ka timpu ti nakalawuy taynguna tugka. Unman lang niku mapihu nu ngatay ipinakakit Panginuun tunda aw ngatay tutuu tunda nangyari sa kanya. Diyus lang ti makaalam.

³ Kang ulitun maan magkun, dinara siya atabug sa ikatlu pag langit. Unman niku mapihu nu ngatay ipinakakit Panginuun tunda, aw ngatay tutuu nangyari sa kanya, unman niku alam. Diyus lang ti makaalam.

⁴ Pagka ati may nadnugan siya manga bagaw dayi mahuwad mabagaw una waya si unu, unman waydi may karampatan tumultul una si unu pag tawu.

⁵ Pag-ipadayaw niku tunda pag tawu dapat dayu pag-ipadayaw niku kang sadili, nu ud ngap kang kalumuyan ti pag-ipadayaw niku.

⁶ Nu abi aku magpadayaw unman waydi aku masabi manga iba kuntay talang-talang, dahil tutuu kang pagsabihun. Dapat pagpigilan niku kang magpadayaw dahil unman mayad sa kangku nu ti pag-iisip una hintay pag tawu tungkul sa kangku mataas man sa kay nakitan ag nadnugan sa kangku.

⁷ Dapat hampay balaw niku ipayabang-yabang ti masyadu gid pag manga makadululaw kay ipinakilala Diyus sa kangku, nakan pinakan-an aku usa ka pinagkadugi sa kang bilug, usa ka sugu ni Satanas hampay aku labanan agud unman aku magpalabi-labi.

⁸ Tulu gid ka pag-ulit kang idinarangin sa Panginuun hampay bul-un niya tunda ginan sa kangku.

⁹ Dapat kainda kay sagut niya sa kangku magkun, “Kang-ud yi kawu nu kang pabisugun. Lalu kang mailubus kang kapangyarihan nu kawu malumuy.” Nakan ngani lubus kang pagbayaun ag pagdayawun kang kalumuyan hampay udyi gid mab-ul sa kangku kay kamaskihan ni Kiristu.

¹⁰ Nakan ngani magbaya diman aku una aku malumuy, una api-apihun, una pakurianan, una unu-unuhun, una lang hintay pag aragwantahun dahil ngani sa kan Kiristu. Dahil nu aku malumuy, ati katpung ngap aku may kabisugan.

Kay Kinabudlayan ni Pablu sa manga Taga Kurintu

¹¹ Aku inda ga patalang-talang yi, dapat kamu ti nagpilit sa kangku hampay katunda. Kamu mana ti dapat dumayaw sa kangku. Bilang madi ga ud may gana aku pag tawu dapat unman kailangan ipalabi niyu aku sa kanyu pagkumnun mayad pag manga apustul asan.

¹² Unman diman aku inmapas nagbuwat puruyba sa kanyu kuntay aku tutuu apustul. Ipinakakit niku ti manga makamaskihan hanggan makadululaw pag manga tanda.

¹³ Sa kabitay lugud pag manga bagay masabi niyu kuntay ipinalabi niku kamu sa manga iba iglisya? Unman gid ngani, nu ud inda lang ti masabi niyu aku unman may hinagad sa kanyu una di. Patawada yi lang niyu nu aku nagkurang tungkul siti!

¹⁴ Taynguna alistu yi aku sa kay pakatlu pagbalik asan tag sa kanyu, dapat unman kamu may ikabuyat sa kanyu naisipan sa kangku. Unman aku may kailangan sa kanyu kasiyunan, kamu ngap mana ti kang pagkailanganun. Ti manga gurang kailangan maghanda para sa kay manga anak, balaw ay manga anak tighanda para sa kay gurang.

¹⁵ Makabaya gid aku nu migastus niku ti tanan niku kasiyunan, una ipakaun waya niku kang buhi sa kamatayan hampay sa ikaayad niyu. Diit lang aw lugud kanyu balus pagmahal sa kang daka pagmahal sa kanyu?

¹⁶ Alam niyu unman aku nakapabuyat sa kada usa sa kanyu. Dapat magkun ti manga iba aku magpalingu, pagdayaun lang kunu niku kamu.

¹⁷ Hayga? Magsarig aw aku lugud sa kanyu kamayadan dahil may sinugu aku manga patar-ari asan tabug sa kanyu?

¹⁸ Kang hinampang si Titu hampay umasan sa kanyu, kang gid ipinaiba sa kanya ti usa ka patar-ari. Nagsarig lang aw lugud si Titu sa kanyu? Unman aw lugud kanmi ugali angay sa usa lang ka Ispiritu, unman aw usa lang kanmi buruwatun?

¹⁹ Kanyu aw lugud isip kang lang pag-iiwas kang sadili bilug? Bukun duy. Magbagaw aku sa atubangan Diyus angay sa kanta pakiusa sa kan Kiristu. Kamu kang gid pagmahalun. Ti tanan kang pagbuwatun sa ikarig-un di niyu pagsarig.

²⁰ Magkadala aku barang nu asan tabug aku sa kanyu, may makitan aku manga bagay balaw angay sa kang gustu. Una kamu barang may makitan waydi sa kangku balaw angay sa kanyu pag gustu. Barang maras-ugan niku kamu mag-arawayan, maghirirakan, magpuruyaan, maglilibakan, magpalalabi-labihan, ag magkalaguluhan.

²¹ Magkadala aku nu asan tabug maan, barang pakay-ahun aku niku Diyus sa kanyu atubangan. Nu katunda kang gid ikalumi ti kayagtingan, ti panguragin hanggan kahalayan udwaya ipinatawad unman diman waya iinampu.