2 Kurintu 11 - Hanunuu

Ti manga Magpanaguabi kuntay Sida manga Apustul

¹ Pagtiis dapu kamu una aku ga buang-buang. Alam niku kamu matiniisun ngani.

² Aku hanggan ga sa Diyus kang mag-irang sa kanyu tabug sa kasalanan. Parihu kamu ga usa ka daraga mabuut, kang itinaratu sa usa ka lalaki, sa kan Kiristu ngani hampay siya ga kanyu asawa.

³ Dapat naala-ala niku barang maakit kanyu naisipan ga kan Iba nadaya waydi ulay, barang kamu rumamig sa marig-un niyu pagmahal sa kan Kiristu.

⁴ Dahil ungud gid matiniisun kamu sa kanyu magtanggap sa una hintay pag tawu nu magras-ug asan magpanudlu tuhay pag Hisus sa kanmi itinudlu sa kanyu ag pagtanggapun diman waydi niyu ti tuhay pag ispiritu hanggan tuhay pag adal sa kanmi itinudlu sa kanyu.

⁵ Dapat kang isip aku balaw lang ga tunda kanyu pagkumnun mayad pag manga apustul.

⁶ Mahimu aku balaw marinu sa pinamagawan, dapat balaw ungud kurang sa kadunungan. Pirmi yi waydi ipinakilala nimi inda sa kanyu sa tanan nimi buruwatun.

⁷ Kang nanudlu sa kanyu balaw hinagadan niku kamu una hintay pag kabaydanan sa Mayad pag Barita Diyus. Aku nagpakumbaba hampay kamu maan ti pahalgaan. Masabi aw lugud kuntay inda kasalanan niku?

⁸ Iba pag iglisya ti nagpakaun kang manga pangailangan katpung sa kang magsirbi sa kanyu. Bilang ga kang inagawan sida, basta maawatan lang niku kamu.

⁹ Pagka aku naiwdan kang asan, unman diman aku nagpabyat sa una hintay sa kanyu, dahil rinmas-ug ti manga patar-ari ginan sa Masidunya kanda dinarahan aku kang-ud pag awat sa tanan niku pangailangan. Ginan waya sa kabag-u inamanan niku sa danga mabyatan kamu sa una hintay pag bagay. Ag inda pag ugali niku balaw umanun niku hanggan waya aban.

¹⁰ Dahil ti katutuuhanan ni Kiristu nangulian sa kangku nakan aku dayu umapas kang magpadayaw-dayaw sa inda pag ugali niku una naan katpung aku sa daga Akaya.

¹¹ Kang yi waydi ugali balaw parahagad. Nakan aw dahil unman kamu kang pagmahalun? Alam di Diyus pagmahalun gid ngap niku kamu.

¹² Dapat iparargu di gid niku kang pagbuwatun inda hampay balaw masabi manga magpadayaw sa kanda buruwatun kuntay kanda pagsirbi parihu diman sa kanmi pagbuwatun.

¹³ Bukun sida tutuu pag manga apustul. Magdaya lang sida. Magpanaguabi sida kuntay manga apustul ni Kiristu.

¹⁴ Unman waydi kailangan paglingutan nita tunda. Dahil una si Satanas madunung magpanaguabi kuntay siya anghil karayawan.

¹⁵ Nakan ngani balaw paglingutan nu kay manga suruguun ni Satanas magpanaguabi waydi kuntay sida manga manugsirbi sa katadlungan. Kanda patabgan aban angay lang sa kanda pagbuwatun.

Kay Tiniis ni Pablu sa kay Pagka-Apustul

¹⁶ Kang pag-ulitun waya, danga mag-isip una si unu kuntay aku patalang-talang, dapat nu katida kanyu isip, pagpasnui yi lang niyu aku hampay aku pumadayaw-dayaw waydi usa ka ngalay-ngalay, ga usa ka tawu patalang-talang.

¹⁷ Ti kang pagsabihun magpadayaw-dayaw, balaw duy ginan sa Panginuun. Unman ngap may kabuluhan ti pag-iyabang-yabang usa ka tawu patalang-talang.

¹⁸ Mayamu tawu ti magpadayaw-dayaw sa manga bagay sa babaw daga. Hayga aku dayu hanggan pumadayaw-dayaw diman.

¹⁹ Pagbayaun pag-agwantahun niyu ti manga patalang-talang dahil kamu kabay mapininsarun!

²⁰ Pag-agwantahun di niyu una kamu buwatun suruguun, una kamu pagdayaun, una kamu pagsakupun nida, una kamu pagpalabi-labihan nida, una pagsampalun waya.

²¹ Una waya aku mangay-a, mag-amin yi lang aku dayu buwatun nimi ti katida sa kanyu. Dapat nu may tawu magpadayaw-dayaw, aku pumadayaw-dayaw waydi. Kang bagaw inda ga talang-talang.

²² Manga Hibriyu aw lugud sida? Aku diman Hibriyu. Manga Israilita aw sida? Aku imaw diman. Linahi aw sida ni Abraham? Aku imaw diman.

²³ Sida aw manga suruguun ni Kiristu? Magbagaw aku ga usa ka paung-paung, dapat aku lalu man mayad pag suruguun ni Kiristu balaw lang ga kanda. Subra man sa kanda kang nagbudlay, balaw lang pira ka pag-ulit aku napirisu, lagat-lagat paglipgutun, pirmi arani yi sa kamatayan.

²⁴ Kalima yi ginan kang nalakawan manga Hudiyu nagbakul pudu tigtatlumpulu may siyam ka paghampak.

²⁵ Tulu waydi ka pag-ulit kang nalakawan linipgut manga taga Ruma, binatu waya aku kas-a. Katlu yi ginan nakalakaw aku nagkaratulag kang sinakyan pag bangka. Ag kas-a waydi usa ka yabi usa ka sirang aku mayataw-yatawan lang sa dagat.

²⁶ Sa tanan niku lakaw, nalabanan di niku ti tuhay-tuhay pag manga madala, ti manga sapa, ti manga tulisan, ti kang manga kaparihu Hudiyu, una ti manga balaw Hudiyu, manga madala sa manga banwa, sa pangawakawaan, sa dagat, sa manga tawu magpabalhinguun kuntay patar-ari.

²⁷ May nalakawan diman aku subra gid pag kakurian hanggan budlay, pirmi unman makaturug, pirmi masyadu pag nalun-usan ag nauwawan. Nakasamit diman sa maramig dapat unman may ikulimpay.

²⁸ Bukud waya sa siti, sirang-sirang pagdumdumun niku ti kaaburiduhan dahil sa tanan manga iglisya.

²⁹ Nu may linmumuy sa kay pagsunud, aku magpakidamay sa kay kalumuyan. Nu may nalagpak sa kasalanan, subra yi kang karukuan sa kang tagipusuun.

³⁰ Nu kailangan aku mamadayaw-dayaw, ti kang ipadayaw-dayaw kang gid kalumuyan.

³¹ Bukun gid ungud aku magpudil. Tunda ungud alam di Diyus, imaw kay Ama Panginuun Hisus, dayawun kay ngaran hanggan aban.

³² Pagka ati aku sa Damasku ti manga puwirtahan banwa pinabantayan gubirnadur kay sakup ni Hari Aritas, hampay aku madakup nida.

³³ Dapat aku isinukad sa balulang bag-u itinuntun sa gaha atag sa luwas alad batu nakan aku nakaribri di.