2 Kurintu 1 - Hanunuu

¹ Inda ti may surat si Pablu kay pinili Diyus hampay kay apustul ni Kiristu Hisus, hanggan kanta patar-ari si Timutiyu. Inda pag surat tabug sa iglisya sa Kurintu hanggan sa manga banal mag-uli sa buu daga Akaya.

² Pagsa kanyu ti papalad hanggan ti kahusayan ginan sa Diyus sa kanta Ama ag ginan diman sa Panginuun Hisu-Kiristu.

Kay Pasalamat ni Pablu sa Diyus

³ Kanta dayawun ti Diyus, ti Ama nita Panginuun Hisu-Kiristu, siya ti maawaun pag Ama, siya pag Diyus tigpakaun tanan maariwaya pag naisipan.

⁴ Pinaariwaya niya kita sa tanan nita manga kakurian hampay kita maan makaawat sa tanan may manga kakurian dahil sa kanta maariwaya pag naisipan kanta tinanggap ginan sa Diyus.

⁵ Angay sa kanta magpakiusa sa kan Kiristu sa kay kakurian, katunda waydi pag maariwaya kanmi pagtanggapun ginan diman sa kan Kiristu.

⁶ Nu kami waydi ti basad kakurian, tunda sa ikaariwaya ngap niyu naisipan ag sa ikaribri niyu. Pagka kami pinaariwaya, tunda sa ikaariwaya diman niyu naisipan. Bumisug kamu nu tis-un niyu ti manga kakurian malakawan niyu parihu sa kanmi paglakawan.

⁷ Nakan ngani marig-un kanmi sarig tungkul sa kanyu. Alam nimi magpaminsan kamu sa kanmi maariwaya pag naisipan dahil kamu minsan diman sa kanmi sa kakurian.

⁸ Manga patar-ari, kanmi pag-itultul sa kanyu ti kanmi nalakawan pag kakurian ati sa purubinsiya Asya. Ungud subra yi gid mabuyat pag kakurian kanmi nalakawan, nu sa kanmi di naisipan ga udyi gid lumapus kami.

⁹ Kanmi isip inda yi kanmi udas kamatayan. Dapat nangyari tunda hampay kami balaw magsarig sa sadili kabisugan, nu unman hampay kanmi ngap sarigan ti Diyus ti pumabuhi sa manga namatay.

¹⁰ Irinibri niya kami sa pingit pag kamatayan, ag parargu niya kami irinibri. Una ngap hanggan kainda kay di iribri kami. May pag-asa di kami una aban kay di iribri kami.

¹¹ Kailangan pag-awat waydi kamu sa darangin, hampay mayamu ti pumasalamat sa Diyus dahil sa kay papalad sa kanmi bilang sagut niya sa mayamu nandarangin.

Inutru ni Pablu kay Gayak

¹² Inda kanmi ipagdayaw sa Diyus, pagpatutuuhanan nimi naisipan unman may pabalhinguun kanmi magpakiusa sa tanan tawu ag lalu ngap sa kanyu angay sa kanmi magpasakup sa kay kabanalan hanggan katutuuhanan Diyus, dahil lang sa kay pakaun kaayadan Diyus, bukun yi sa kadunungan angay lang sa pagkatawu.

¹³ Nakan ngani danga waydi niyu pagpasiingi ti kaayadan nimi manga surat sa kanyu. Magsarig aku maintindihan niyu kami aban.

¹⁴ Dahil udwaya masyadu maintindihan niyu kainda kuntay nu rumas-ug aban ti kaudasan Panginuun Hisus, kamu dumayaw sa Panginuun dahil sa kanmi, kumun diman kami dumayaw sa kanya dahil sa kanyu.

¹⁵ Dahil imaw yi ngani kang pagpaniwalaan, nakan inisip niku asan tabug dapu aku hampay lalu dumaka kanyu pakinabang sa kang pag-asan sa kanyu.

¹⁶ Kang gayak makalakaw gid aku sa kanyu kang atabug sa Masidunya, nu aban aku mag-uli ginan sa Masidunya asan di maan lakaw sa kanyu hampay aku kanyu diman waydi awatan sa kang maglakaw atabug sa Hudiya.

¹⁷ Pagka unman nitarus aku mahimu aw nguna masabi kuntay aku pudilun? Kanyu aw isip pauman-uman kang gayak parihu sa ugali tawu taga kalibutan hampay magtalinduwa aku may “hu,” may “unman”?

¹⁸ Alam nita ti Diyus masarigan, katunda diman kang pagsabihun sa kanyu ti “hu,” “hu” yi gid.

¹⁹ Ti Anak Diyus si Hisu-Kiristu imaw ti itinudlu nimi ni Silbanu ni Timutiyu sa kanyu magkun unman magkatalinduwa si Kiristu, balaw may “hu”, may “unman,” nu “unman” tutuu yi gid “hu”.

²⁰ Dahil ngani si Kiristu ti ipinatupad sa tanan manga itinaratu Diyus. Dahil sa kan Kiristu kita makasagut magkun, “Amin” tungkul sa tanan itinaratu Diyus, sa ikadayaw sa kanya.

²¹ Diyus ti nagparig-un sa kanmi hanggan sa kanyu dahil sa kanta pakiusa sa kan Kiristu. Siya diman ti nagpili sa kanta.

²² Tinandaan niya kita kuntay kita kanya. Ipinakaun niya sa kanta ti Ispiritu mag-uli sa kanta tagipusuun, imaw kay puruyba matanggap nita kay manga itinaratu.

²³ Maghiling di ti Diyus, una sa kang tagipusuun. Nakan balaw dap aku nag-asan sa Kurintu dahil kamu kang pagdahanan diman.

²⁴ Balaw duy kanmi gustu kamu giyahan waya nimi sa kanyu pagsarig, dahil marig-un yi waydi kamu sa kanyu pagsarig. Magkaibug kami umawat hampay masulung kamu sa kanyu buhi sa kan Kiristu.