2 Krunika 9 - Hanunuu

Nanabang ti Rayna Shiba sa kan Hari Sulumun

¹ Pagka nabaritaan rayna Shiba ti kabantugan ni Sulumun, nag-atag siya sa Hirusalim hampay subukun ti kadunungan ni Sulumun sa panab-anan makuri pag manga paingana. Rinmas-ug siya sa Hirusalim kaibahan ti mayamu gid pag manga tawuhan niya, ag may dara siya manga kamilyu kargadu manga pamakaun panlakay, mayamu pag gintu, ag mahalaga pag manga batu. Pagka nakitan niya si Sulumun, ipinaingana ti tanan niya pag isipun.

² Sinagut ni Sulumun ti tanan niya manga paingana ag unman may una hintay pag bagay ti unman niya naipaliwanag sa kanya.

³ Pagka napatutuuhanan rayna Shiba ti kadunungan ni Sulumun, ag pagka nakitan niya ti rinu balay hari kay ipinatindug,

⁴ lubus siya naglingut. Katida diman pagka nakitan niya ti karan-unun sa lamisa hari, ti magpanguna niya manga may kangaranan, ti pagsirbi niya manga panawuhun, ti manga tagasirbi niya irinmun may sulung marinu pag manga rutay, ag ti manga handug pag sunugun kay ihinandug sa Balay Diyus Panginuun.

⁵ Magkun siya sa hari, “Tutuu ngani ti nabaritaan niku sa kang nasyun tungkul sa kanmu manga binwat ag kadunungan.

⁶ Unman aku magpaniwala tugka sa nag-ataytag aku ag nakitan niku ngapu inda. Kay tutuu, unman sa katunga sa nabaritaan niku tungkul sa kanmu ti kang nakitan. Ti kanmu kadunungan langbaw waya sa nabaritaan niku.

⁷ Mapalad kanmu manga tawuhan! Mapalad kanmu manga may kangaranan magsirbi sa kanmu dahil pirmi nida mag-adnugan kanmu kadunungan.

⁸ Dayawun ti Panginuun kanmu Diyus, ti nagbaya sa kanmu ag nagpauli sa kanmu sa turukawan hampay humari para sa kanya. Dahil sa pagmahal nimu Diyus sa Israil ag sa kay nagustuhan pumirmaminti inda pag nasyun tugka aban, binwat niya kawu hari sitay, hampay manguna kawu may katadlungan ag kaaydan.”

⁹ Bag-u pinakan-an niya si Hari Sulumun manga lima ka tunilada gintu, mayamu panlakay ag mahalaga pag manga batu. Unman yi gid may makatupung sa kayamuun panlakay ti ipinakaun rayna Shiba sa kan Hari Sulumun.

¹⁰ May dara waydi ti manga tawuhan ni Hari Sulumun ag ti manga tawuhan ni Hiram manga gintu ginan sa Upir, manga kayu almug, ag mahalaga pag manga batu.

¹¹ Ginamit ni Hari Sulumun ti manga kayu almug hampay buwatun agdan Balay Diyus Panginuun ag sa balay hari, bag-u ti iba binwat manga alpa ag manga lira para sa manga manugkanta. Unman waya una si unu ti nakakit katida pag manga bagay sa Huda.

¹² Ipinakaun ni Hari Sulumun sa rayna Shiba ti una hintay pag hinagad niya. Mas mayamu waya ti ipinakaun ni Sulumun sa kanya kaysa dinara niya. Pagkatapus, nuli ti rayna sa kay ulian kaibahan kay manga tawuhan.

Ti Kayamanan ni Sulumun

¹³ Timpu-timpu magtanggap si Sulumun manga 23 ka tunilada gintu,

¹⁴ tuhay waya sitay sa manga buhis ginan sa manga manugnigusyu. Magpakaun diman sa kanya manga gintu ag pilak ti tanan hari sa Arabya hanggan ti manga gubirnadur sa Israil.

¹⁵ Nagpabuwat si Hari Sulumun 200 daraka pag panangga ti kada usa nahaklupan manga pitu ka kilu gintu.

¹⁶ Nagpabuwat diman siya 300 ka dariit pag manga panangga ti kada usa nahaklupan manga tulu may tunga ka kilu gintu. Ipinauli niya inda tanan ati baliwa sa balay hari pag-ingarnan Kapuruan Libanun.

¹⁷ Nagpabuwat diman ti hari usa ka daka pag turukawan hari binwat sa manga bangkil ilipanti, ag pinahaklupan inda lunsay gintu.

¹⁸ May unum ka halintang ti tukawan hari, ag inda may gintu tarat-an lulud. Sa kada giriw may turungbawan kamang may imaw histuda liyun matindugan.

¹⁹ Ag may imaw diman histuda liyun sa kada giriw halintang. Ti histuda liyun sa unum ka halintang 12 tanan. Unman may tukawan hari makaparihu una naan pag kaharian.

²⁰ Ti tanan pag ungut ni Hari Sulumun lunsay gintu, ag ti tanan pag kagamitan baliwa sa balay hari pag-ingarnan Kapuruan Libanun lunsay diman gintu. Bukun inda binwat sa pilak dahil diit lang kay halaga inda pagka sa kapanahunan ni Sulumun.

²¹ May manga barku diman si Sulumun pan-ahinti, ti tagadara kay manga tawuhan ni Hiram. Inda pag manga barku usa ka bisis mag-uli sa kada ikatlu pag timpu, may karga manga gintu, pilak, bangkil ilipanti, hanggan manga daraka ngatay dariit pag kalasi manga amu.

²² Unman may una si unu pag hari sa kalibutan makatupung sa kadunungan ag sa kayamanan ni Hari Sulumun.

²³ Ti tanan hari sa kalibutan maghingabut kuntay makitan si Sulumun hampay makapatingi sa kadunungan ipinakaun Diyus sa kanya.

²⁴ Timpu-timpu, ti kada magsabang sa kanya may dara manga pamakaun — manga bagay binwat ginan sa pilak ag gintu, manga rutay, manga armas, manga panlakay, manga kabayu, ag manga mula.

²⁵ May 4,000 ka tudir si Sulumun para sa kay manga kabayu hanggan manga kalisa. May 12,000 siya ka kabayu ipinauli niya sa manga banwa sa palaulian niya manga kalisa, kay iba ati sa kanya sa Hirusalim.

²⁶ Sinakup niya ti tanan hari ginan sa Sapa Iyupratis tugka sa daga manga Pilistiyu ag sa katugkaan Ihiptu.

²⁷ Katpung udas siya ti hari, ti pilak sa Hirusalim ga parihu wadi sa urungan manga batu, ag ti kayu sidru ga parihu wadi kay kayamu sa urungan kayu sikumuru sa manga tagudtud sa isalpan.

²⁸ Ti manga kabayu ni Sulumun ginan waya sa Ihiptu ag sa iba pag manga nasyun.

Ti Pagkamatay ni Sulumun

²⁹ Ti iba waya ka tultulanun tungkul sa maghari ni Sulumun ginan sa umpisa tugka sa katapusan nisurat sa ribru ni Purupita Natan, sa Manga Itinultul ni Ahiyas Taga Silu, ag sa Manga Pangakakitun ni Purupita Idu, magtultul diman tungkul sa kay maghari ni Hirubuam kay anak ni Nabat.

³⁰ Sa Hirusalim pag mag-uli si Sulumun mintaras siya ti maghari sa buu Israil sa sulud upatpulu ka timpu.

³¹ Pagka namatay siya, ilinbung siya sa banwa niya ama ni Dabid. Ag kay anak si Rihubuam ti nag-ublus sa kanya bilang hari.