2 Krunika 8 - Hanunuu

Ti Iba waya Naipatindug ni Sulumun

¹ Pagkalawuy 20 ka timpu pagpatindug ni Sulumun sa Balay Diyus Panginuun ag sa balay hari,

² utru niya ipinatindug ti manga banwa ipinakaun sa kanya ni Hiram ag sitay pag-ipinauli ti Israilita.

³ Inda diman pag panahun ginira ni Sulumun ag nasakup ti Hamat Suba.

⁴ Ipinatindug diman niya utru ti Tadmur ati sa pangawakawaan ag ti manga banwa sa Hamat pinatindugan niya manga haramnuan.

⁵ Pinarig-un niya kay tungud ag sirung baliwa Bit Hurun. Pinalibutan niya inda manga alad batu ag pinaulian manga sabian may manga pangagad.

⁶ Kainda diman ti binwat niya sa Baalat ag sa tuhay waya pag manga banwa kay pinatindugan niya manga haramnuan, ag palaulian niya manga kalisa ag manga kabayu. Ipinatindug niya ti tanan gustu niya ipatindug sa Hirusalim, sa Libanun, ag sa tanan pag daga sakup niya.

^7-8 May manga tawu waya natayak sa Israil balaw Israilita. Sida ti manga linahi manga Hitiyu, Amuriyu, Pirisiyu, Hibiyu, ag manga Hibusiyu, balaw napapas manga Israilita pagka sinakup nida ti daga Kanaan. Binwat sida manga panawuhun ni Sulumun ag pinilit manarabahu, ag pirmaminti sida panawuhun tugka kainda.

⁹ Dapat balaw binuwat ni Sulumun panawuhun una si unu pag Israilita. Bagkus ngap, binwat niya sida kay manga sundalu, manga may kangaranan, manga takinan sundalu ag manga kumandir niya manga manugkalisa, hanggan manga manugkabayu.

¹⁰ Ti 250 sa kanda binwat ni Hari Sulumun manga may kangaranan magdumara sa manga manugbuwat sa kay manga buruwatun.

¹¹ Pagka namhan yi ti balay hari ti ipinabwat ni Sulumun para sa kay asawa, anak hari Ihiptu, isinalyu niya kay asawa ati ginan sa Banwa ni Dabid. Dahil magkun siya, “Unman mahimu umuli kang asawa sa balay hari ni Hari Dabid, dahil banal tida pag rugar dahil daan ati ti Kaban Panginuun.”

¹² Pagkatapus, nanagda si Sulumun manga handug pag sunugun para sa Panginuun sa harandugan kay ipinatindug sa atubangan sarakahan Balay Diyus.

¹³ Tinupad niya ti sugu ni Muysis kuntay maghandug angay sa dapat ihandug sirang-sirang ag sa panahun Sirang Pamahari, sa Pista Lapus Lati, ag sa inda pag tulu ka pista pag-idaus timpu-timpu: ti Pista Tinapay Unman may Pamadaka, ti Pista Tig-arani, ag ti Pista Pagpatindug manga Payag.

¹⁴ Ag angay sa surundanun niya ama ni Dabid, ginurupu niya ti manga manughandug hanggan ti manga Libita para sa kanda manga buruwatun. Ti manga Libita imaw ti mag-una sa manga tawu sa pagdayaw sa Diyus ag sida ti mag-awat sa manga manughandug sa kanda buruwatun sa Balay Diyus sirang-sirang. Ginurupu diman niya ti manga guwardiya sa kada sabian sa Balay Diyus, dahil inda ti sugu ni Dabid ti manugsirbi Diyus.

¹⁵ Sinunud nida ni Sulumun ti tanan sugu ni Hari Dabid tungkul sa manga manughandug hanggan sa manga Libita ag sa manga balay haramnuan.

¹⁶ Natapus ti tanan ipinabwat ni Sulumun sa Balay Diyus, ginan sa pagpauli paratukawan tugka sa matapus inda.

¹⁷ Pagkatapus, nag-atag si Sulumun sa Isyun Gibir ag sa Ilut, sa baybay Dagat Marara, sa daga Idum.

¹⁸ Pinadaran-an siya ni Hiram manga barku pagpamahalaan niya manga sadili may kangaranan antigu pag manga manugdagat. Nanakayan sida kaibahan ti manga tawuhan ni Sulumun atabug sa Upir. Sa pagbalik nida, may dara sida 16 ka tunilada gintu, ag dinara nida inda sa kan Hari Sulumun.