2 Krunika 6 - Hanunuu

¹ Bag-u nandarangin si Sulumun magkun, “Panginuun kanmu sabi mangulian kawu sa madamul pag rurum.

² Nakapatindug yi duy aku marinu gid pag Balay Diyus para sa kanmu, ti ulianan nimu hanggan aban.”

Ti Tultulanun ni Sulumun sa manga Nasakupan Israil

³ Bag-u inmatubang si Hari Sulumun sa buu kadamlan Israil matindugan ati, ag pinapaladan niya sida.

⁴ Magkun siya, “Dayawun ti Panginuun, ti Diyus Israil. Tinupad niya kay taratu sa kang ama sa kan Dabid. Dahil magkun siya,

⁵ ‘Ginan sa sirang ipinalwas niku kang manga nasakupan Israilita sa Ihiptu, unman aku nagpili banwa una naan ginan pag linahi Israil agud patindugan Balay Diyus para sa kadayawan niku, ag balaw diman aku nagpili hari mandumara sa manga nasakupan niku Israilita.

⁶ Dapat taynguna, pinili niku ti Hirusalim bilang rugar nu naan pag dayawun aku, ag pinili niku si Dabid hampay mandumara sa kang manga nasakupan Israilita.’

⁷ “Sa tagipusuun gid niku ama ni Dabid ti mamatindug Balay Diyus para sa kadayawan Panginuun, ti Diyus Israil.

⁸ Dapat magkun sa kanya ti Panginuun, ‘Mayad diman inda maghingbut gid kawu mamatindug Balay Diyus para sa kadayawan niku ngaran.

⁹ Dapat balaw kawu ti mamatindug inda nu unman kanmu sadili anak. Siya ti mamatindug sa Balay Diyus para sa kang kadayawan.’

¹⁰ “Tinupad Panginuun kay taratu. Aku ti nag-ilis sa kang ama sa kan Dabid bilang hari sa Israil, angay sa taratu Panginuun. Ag ipinatindug niku ti Balay Diyus para sa kadayawan Panginuun, ti Diyus Israil.

¹¹ Ati niku pag ipinauli ti Kaban pinaulian Kasunduan Panginuun kay binwat sa nasakupan Israil.”

Kay Darangin ni Sulumun para sa manga Nasakupan Israil

¹² Sa atubangan buu kadamlan Israil, nagpakarani si Sulumun sa atubangan harandugan Panginuun ag ipinaabwat niya kay manga kamang.

¹³ Tinmindug siya sa galang pag tirindugan kay ipinabwat. Kay aba hanggan bulang 5 ka luk-an siku, ag kay abwat 3 ka luk-an siku. Bag-u linmuhud si Sulumun sa atubangan buu kadamlan Israil maabwatan kay manga kamang,

¹⁴ ag magdarangin siya, “Panginuun, Diyus Israil, unman may Diyus parihu sa kanmu sa langit ngatay sa daga. Pagtupadun nimu kanmu taratu, ag pag-ipakakit nimu kanmu pagmahal sa manga matinupadun pag manugsirbi sa kanmu sa buu tagipusuun nida.

¹⁵ Tinupad nimu kanmu itinaratu sa kang ama sa kan Dabid kanmu manugsirbi. Kawu duy ti nagtaratu, ag kawu diman ti nagtupad inda taynguna pag sirang.

¹⁶ Ag taynguna, Panginuun, Diyus Israil, tupada diman nimu ti usa waya ka itinaratu nimu sa kanmu manugsirbi sa kan Dabid kang ama magkun kawu sa kanya, ‘Pirmi sa linahi nimu ginan ti humari sa Israil nu sundun mayad nimu manga linahi kang Kasuguan, parihu sa kanmu binwat.’

¹⁷ Nakan taynguna, Panginuun, Diyus Israil, tupada duy nimu kanmu itinaratu sa kanmu manugsirbi sa kan Dabid kang ama.

¹⁸ “Dapat makaulian gid aw ngani duy kawu, Diyus, sitay sa kalibutan kaibahan manga tawu? Unman ngani kawu magkang-ud una sa pinakaabwat pag langit, sitay aw waya nguna sa ipinatindug niku pag Balay Diyus?

¹⁹ Dapat patingihi nimu aku kanmu manugsirbi sa kang magdarangin ag magpaawa-awa, Panginuun niku Diyus. Patingihi duy kang magtawag ag magdarangin sa kanmu atubangan.

²⁰ Mana bantayan nimu inda pag Balay Diyus sirang yabi, ti pagkumnun nimu siyun pag rugar kawu pag dayawun. Mana patingihan nimu aku kanmu manugsirbi sa kang magdarangin maatubangan sa siyun pag rugar.

²¹ Patingihi duy kang manga paghagadun hanggan ti paghagadun nimu manga nasakupan Israilita nu sida mandarangin maatubangan sa siyun pag rugar. Patingihi nimu kami asan sa kanmu ulian sa langit. Ag nu masaydan nimu kami, patawada duy nimu kami.

²² “Nu ti usa ka tawu binangdanan nagsalan sa kay kaparihu, ag ipinaatag siya sa kanmu harandugan sa inda pag rugar hampay manumpa kuntay unman siya may salan,

²³ patingihi inda asan sa langit ag sintinsiyahi kanmu manga manugsirbi — ti magbangdan ag ti pagbangdanan. Parusahi ti nagsalan angay sa kay binwat, ag palpasi ti unman may salan hampay miburayhaw unman siya may salan.

²⁴ “Nu kanmu manga nasakupan Israilita matalu nida manga kalaban dahil nagsalan sida sa kanmu, ag nu bumalik sida sa kanmu ag mandayaw sa kanmu bag-u mandarangin sa inda pag Balay Diyus,

²⁵ patingihi nimu sida asan sa langit. Patawada nimu sida sa kanda kasalanan ag daran-a nimu sida pabalik sa ipinakaun nimu pag daga sa kanda hanggan sa manga ginurang nida.

²⁶ “Nu balaw nimu pauranun dahil nagsalan kanmu manga nasakupan sa kanmu, ag nu mandarangin sida maatubangan sa inda pag Balay Diyus ag mandayaw sa kanmu, ag man-ampu kanda manga kasalanan dahil pinarusahan nimu sida,

²⁷ patingihi nimu sida asan sa langit. Patawada nimu sida kanmu manga manugsirbi, kanmu manga nasakupan Israilita. Tudlui nimu sida sa matadlung pag magkabuhi, ag padaran-i uran ti daga kanmu ipinakaun sa kanda imaw ti magkaapu nida.

²⁸ “Nu may rumas-ug taglun-us sa daga nimu manga nasakupan, ngatay kadautan, ngatay malawig pag init ngatay sarut sa manga tanum parihu sa manga apan ag manga basul, ngatay sangputun sida manga kalaban una naan sa kanda manga banwa, ngatay rumas-ug sa kanda ti una hintay pag durungugun,

²⁹ ag nu may imaw sa kanda mandarangin ngatay manhagad sa kanmu, patingihi nimu sida. Nu pagkilalan-un nida dahil sa kanda manga kasalanan rinmas-ug ti manga kakurian hanggan karamdaman sa kanda, bag-u magdarangin sida maabwatan kanda manga kamang, masranguhan sa inda pag Balay Diyus,

³⁰ patingihi sida asan sa kanmu ulian sa langit. Patawada nimu sida ag buwata sa kada usa sa kanda ti angay sa kanda manga buwat, dahil alam nimu nu hintay ti asan sa kanda tagipusuun. Ungud duy, kawu lang gid ti may alam tagipusuun tanan tawu.

³¹ Nakan gumalang sida sa kanmu ag sumunud sa kanmu manga palakaw habang mag-uli sida sa ipinakaun nimu pag daga sa kanmi manga ginurang.

³² “Nu ti day-uhan mag-uli sa arayu pag rugar nakadnug sa kanmu kadayawan ag kamaskihan, bag-u umataytag sida hampay mansamba sa kanmu ag mandarangin maatubangan sa inda pag Balay Diyus,

³³ patingihi nimu sida asan sa kanmu ulian sa langit. Ag buwata una hintay ti paghagadun nida, hampay ti tanan tawu sa kalibutan kumilala sa kanmu ag gumalang parihu sa kanmu manga nasakupan Israilita. Ag hampay maalaman nida pagdayawun kawu sa inda pag Balay Diyus kang ipinatindug.

³⁴ “Nu kanmu manga nasakupan man-gira angay sa kanmu sugu, ag nu mandarangin sida sa kanmu maatubangan sa inda pag banwa kanmu pinili hanggan sa Balay Diyus kang ipinatindug para sa kadayawan nimu ngaran,

³⁵ patingihi nimu kanda manga darangin hanggan manga paghagadun asan sa langit, ag pakan-i sida panalu.

³⁶ “Nu magkasala sida sa kanmu — dahil unman may tawu nu unman magsalan — ag sa kanmu pangagalit ipinatalu nimu sida sa kanda manga kalaban ag binihag sida atag sa arayu ngatay sa arani pag rugar,

³⁷ bag-u sa uryan bumag-u kanda tagipusuun, man-ampu sida ag magpaawa-awa sa kanmu magkumun, ‘Nagsalan duy kami, ag daut kanmi manga binwat,’

³⁸ patingihi nimu kanda darangin. Nu bumalik sida sa kanmu sa buu tagipusuun nida ag naisipan ati sa rugar nu naan pag binihag sida, ag mandarangin sida maatubangan sa inda pag daga kanmu ipinakaun sa kanda manga ginurang, sa inda pag banwa kanmu pinili hanggan sa Balay Diyus kang ipinatindug para sa kanmu kadayawan,

³⁹ patingihi nimu kanda manga darangin ag manga paghagadun asan sa kanmu ulian sa langit, ag pakan-i sida panalu. Patawada nimu sida sa kanda manga kasalanan laban sa kanmu.

⁴⁰ “Diyus niku, mana patingihan duy nimu ti manga darangin sa inda pag rugar.

⁴¹ “Taynguna, Panginuun Diyus, pag-atag yi duy kawu sa kanmu Balay, sa rugar nimu paraharyan, nu naan pag maulian ti Kaban Kasunduan, tanda sa kanmu kamaskihan. Mana malakawan nimu manga manughandug kanmu pagribri sa kanda. Mana makabaya kanmu matinupadun pag manga nasakupan sa kanmu kaayadan.

⁴² Panginuun Diyus, danga duy pagbugyahi kanmu pinili pag hari. Alalahana duy kanmu pagmahal sa kan Dabid kanmu manugsirbi.”