2 Krunika 5 - Hanunuu

¹ Pagka natapus yi ni Sulumun ti tanan buruwatun para sa Balay Diyus Panginuun, dinara niya sa haramnuan Balay Diyus ti tanan bagay itinigana niya ama ni Dabid hanggan yi ti gintu, pilak, ag iba waya pag kagamitan.

Dinara sa Balay Diyus ti Kaban Kasunduan

² Ipinatawag ni Hari Sulumun sa Hirusalim ti manga manugpamahala sa Israil hanggan ti tanan takinan manga linahi ag manga magtal-anakan sa Israil, hampay bul-un ti Kaban Kasunduan Panginuun ginan sa Siun, sa Banwa ni Dabid.

³ Nag-atag sida tanan sa kan Hari Sulumun katpung udas Pista Pagpatindug manga Payag, sa ikapitu pag bulan.

^4-5 Pagka tiripun yi ti tanan manugpamahala sa Israil, bin-ul manga manughandug hanggan manga Libita ti Kaban, ti Turda Taragbuan ag ti manga banal pag kagamitan inda. Dinara nida tanan inda sa Balay Diyus.

⁶ Nansagda si Hari Sulumun hanggan ti buu nasakupan Israil sa atubangan Kaban Kasunduan. Pagkayamu karanidu hanggan manga baka kanda ihinandug, balaw inda mabilang dahil sa kayamuun.

⁷ Pagkatapus, dinara manga manughandug ti Kaban Kasunduan Panginuun sa kay palaulian ati sa pinakasulud Balay Diyus, sa Pinakabanal pag Sulud-sulud, sa sirung manga pakpak kirubin.

⁸ Mabukladan ti manga pakpak kirubin, nakan magkatabunan ti Kaban hanggan kay manga hiriyaptan rayayungan.

⁹ Inda pag manga hiriyaptan rayayungan araba, kay suru maglangbaw sa kaban mag-akitan di sa Banal pag Sulud-sulud, sa atubangan pinakasulud Balay Diyus, dapat balaw inda mag-akitan sa luwas Banal pag Sulud-sulud. Ati di inda tugka taynguna.

¹⁰ Unman may iba sukad ti Kaban purya sa duwa ka malapad pag batu kay ipinauli ni Muysis katpung ati siya sa Hurib, nu naan nagbuwat kasunduan ti Panginuun sa manga Israilita pagkalawuy nida linmuwas sa Ihiptu.

¹¹ Pagkatapus, linmuwas ti manga manughandug sa Banal pag Sulud-sulud. Ti tanan ati pag manughandug nanlumpiyu, udas man nida pagsirbi ngatay unman.

¹² Ti manga manugkanta pag manga Libita sida ni Asap, ni Himan, ni Hidutun hanggan kanda manga anak ag manga katawuhan nagtindug baliwa sa butlakan harandugan. Nakasulung sida mahal pag linu bag-u magpatunug manga pumpiyang, alpa, ag lira. Kaibahan nida ti 120 ka manughandug magpatunug budyung.

¹³ Ti manga manugkanta magdayaw ag magpasalamat sa Panginuun pagpatunugan manga turumpita, pumpiyang, ag iba waya pag manga kagamitan. Kaindaay kanda pagkantahun: “Mayad ti Panginuun; kay pagmahal balaw may katapusan.” Pagkatapus, may rurum sinmaput sa Balay Diyus Panginuun.

¹⁴ Unman yi makaparargu ti manga manughandug sa kanda buruwatun sa Balay Diyus dahil sa rurum, dahil sinaput kadayawan Panginuun ti Balay Diyus.