2 Krunika 4 - Hanunuu

Ti manga Garamitun sa Balay Diyus

¹ Nagpabuwat diman si Sulumun galang pag harandugan may 20 ka luk-an siku kay aba, 20 ka luk-an siku kay bulang ag 10 ka luk-an siku kay abwat.

² Nagpabuwat diman siya daka pag palaulian danum ga kawa, pag-ingarnan Dagat. Kay kaabasad inda 5 ka luk-an siku, 10 ka luk-an siku kay bulang, ag 30 ka luk-an siku kay sukat palibuyung.

³ Pinalibutan inda duwa ka hatay pamarinu kay riruk tudu baka baliwa sa sirung bibig — unum sa kada usa ka luk-an siku. Ti manga pamarinu kaibahan yi pagka binwat inda.

⁴ Matungbawan ti sukadan sa dayu 12 ka tudu baka galang magpalatlikudan. Ti tulu ka tudu baka masaranguhan sa kanaway, ti tulu sa isalpan, ti tulu sa salatan, ag ti tulu sa butlakan.

⁵ Kay damul palaulian danum tulu ka purgada, ag kay bibig inda parihu sa bibig tasa pinasingara parihu sa maggimlad busang liryu. Mahimu inda masukadan manga 17,500 ka galun danum.

⁶ Nagpabuwat diman siya sampulu ka palanggana urugasan manga garamitun sa manga handug pagsunugun. Ipinauli kay lima baliwa sa salatan ag kay lima baliwa sa kanaway. Ti danum sa sukadan pag-ingarnan Dagat paggamitun manga manughandug pangugas.

⁷ Nagpabuwat diman siya sampulu ka palaulian sulul-an gintu angay sa gayak, ipinauli inda sa Balay Diyus, lima sa kanaway, lima sa salatan.

⁸ Nagpabuwat diman siya sampulu ka lamisa, ipinauli inda sa Balay Diyus, lima baliwa sa salatan, lima baliwa sa kanaway. Nagpabuwat diman siya 100 ka malukung gintu paggamitun sa pagwidwisik.

⁹ Nagpabuwat diman siya sugkadan manga manughandug hanggan maluang pag sugkadan sa luwas. Pinabwatan niya manga sabian ti manga lakawan atabug sa sulud sugkadan Balay Diyus ag pinahaklupan galang.

¹⁰ Ipinauli niya ti sukadan danum pag-ingarnan Dagat baliwa sa butlakan Balay Diyus.

¹¹ Nagpabuwat diman siya manga anglit, manga pala, ag manga malukung paggamitun sa pagwidwisik. Tinapus ni Huram Abi ti tanan pag-ipabuwat ni Sulumun para sa Balay Diyus. Inda kay manga binuwat:

¹² ti duwa ka tulduk; ti duwa ka malukung ga histuda ulu sa tungud manga tulduk; ti duwa ka magkasugdung manga tarikada pamarinu sa manga ulu tulduk;

¹³ ti 400 ka pamarinu kay histuda ga burak kayu pumigranata (nakapakput ti duwa ka hatay sa kada magkasugdung manga tarikada masabudan sa manga ulu tulduk);

¹⁴ ti manga karitun ag manga palanggana;

¹⁵ ti sukadan danum pag-ingarnan Dagat hanggan kay pagtungbawan 12 ka tudu baka;

¹⁶ ti manga anglit, manga pala, manga daraka pag manga panubuk para sa taguban, ag ti iba waya pag kagamitan. Ti tanan pag bagay ipinabwat ni Hari Sulumun sa kan Huram Abi para sa Balay Diyus Panginuun buwat tanan sa pinasinglaw galang.

¹⁷ Ipinabwat inda ni Hari Sulumun sa panab-anan hulmaan ati sa Karatagan Hurdan, sa tab-anan Sukut ag Saritan.

¹⁸ Pagkayamu pag galang ti ginamit ni Sulumun, nakan udyi alam nu pira inda tanan kay timbang.

¹⁹ Nagpabuwat diman si Sulumun inda pag manga kagamitan para sa Balay Diyus: ti gintu pag harandugan; ti manga lamisa pagpaulian tinapay pag-isagda sa kadayawan Diyus;

²⁰ ti manga palaulian sulul-an lunsay gintu hanggan ti manga sulu pag-ipasnag sa atubangan Pinakabanal pag Sulud-sulud angay sa surundanun tungkul siyun;

²¹ ti pamarinu pag manga busang, ti manga sulul-an hanggan ti manga pangilpit, tanan lunsay gintu;

²² ti manga pamulud sa mitsa, manga malukung paggamitun sa pagwidwisik, manga sanduk, manga sukadan kamangyan hanggan ti palaulian baga, lunsay diman tanan gintu; ti manga sabian sa Balay Diyus, ti manga sabian pasulud sa Pinakabanal pag Sulud-sulud, pinahaklupan gintu.