2 Krunika 36 - Hanunuu

Kay Maghari ni Hihuahas sa Huda

¹ Kay anak ni Husyas si Hihuahas imaw ti ipinailis manga tawu humari sa Hirusalim.

² Si Hihuahas 23 ka timpu kay idad pagka naghari siya. Sa Hirusalim siya pag nangulian, ag naghari siya sa sulud tulu ka bulan.

³ Bag-u pinaighit siya sa kay tukawan hari ni Niku hari Ihiptu, ag pinabayad ni Niku ti manga taga Huda buwis 3,500 kilu pilak ag 35 kilu gintu.

⁴ Dinara bihag ni Niku si Hihuahas sa Ihiptu, ag binwat niya hari sa Huda ag Hirusalim si Ilyakim kay patar-ari ni Hihuahas. Kay ngaran ni Ilyakim inilisan niya Hihuyakim.

Kay Maghari ni Hihuyakim sa Huda

⁵ Si Hihuyakim 25 ka timpu kay idad pagka naghari. Sa Hirusalim siya pag nangulian, ag naghari siya sa sulud 11 ka timpu. Daut kay binwat sa magbantay Panginuun niya Diyus.

⁶ Ginira siya ni Hari Nabukudunusur sa Babilunya ag tinarikadahan, ag dinara sa Babilunya.

⁷ Dinara diman ni Nabukudunusur sa Babilunya ti iba pag manga kagamitan sa Balay Diyus Panginuun ag ipinauli sa kay balay hari.

⁸ Ti iba waya ka tultulanun tungkul sa maghari ni Hihuyakim, ag ti manga mayagting hanggan daut pag manga bagay kay binuwat, nisurat sa Ribru Tultulanun manga Hari Israil ag Huda. Ag kay anak niya si Hihuyakin ti nag-ilis sa kanya bilang hari.

Kay Maghari ni Hihuyakin sa Huda

⁹ Si Hihuyakin 18 ka timpu kay idad pagka naghari. Sa Hirusalim siya pag nangulian, ag naghari siya sa sulud tulu ka bulan ag sampulu ka sirang. Daut kay binwat sa magbantay Panginuun.

¹⁰ Sa pag-umpisa timpu, binihag ni Hari Nabukudunusur si Hihuyakin sa Babilunya. Pinanbuul niya ti manga mahalaga pag kasiyunan sa Balay Diyus Panginuun, ag binwat niya hari sa Huda ag Hirusalim kay bapa ni Hihuyakin si Sidikyas.

Kay Maghari ni Sidikyas sa Huda

¹¹ Si Sidikyas 21 ka timpu kay idad pagka naghari. Sa Hirusalim siya pag nangulian, ag naghari siya sa sulud 11 ka timpu.

¹² Daut kay binwat sa magbantay Panginuun niya Diyus ag unman siya nagpakumbaba kan Hirimyas ti purupita Panginuun.

¹³ Naglaban diman siya kan Hari Nabukudunusur, una ipinasumpa niya siya sa ngaran Diyus kuntay balaw siya manlaban sa kanya. Nagbaliw maganit gid kay tagipusuun ni Sidikyas, ag dayu siya mamabalik sa Panginuun, ti Diyus Israil.

¹⁴ Katida diman ti tanan pangulu manughandug ag ti manga nasakupan unman nagbaliw matinupadun sa Diyus. Sinunud nida ti mayagting pag manga pagbuwatun iba pag manga nasyun ag inuringan nida ti Balay Diyus Panginuun, pag itigana banal sa Hirusalim.

Ti Pagkawayak Hirusalim

¹⁵ Pirmi magpakihampang sa kanda ti Panginuun, ti Diyus nida manga ginurang, sa panab-anan niya manga purupita, dahil magkaawa siya sa kanda hanggan sa kay Balay.

¹⁶ Dapat pinuyaan nida ti manga purupita Diyus, kinasarin-an, ag ipinalawuy kanda manga itinultul. Nakan nagalit ti Panginuun sa kanda, ag unman may makaampara sa kanya.

¹⁷ Ipinagira niya sida sa manga taga Babilunya. Pinanmatay manga taga Babilunya kanda manga kalay-awan lalaki una sa Balay Diyus. Unman gid sida may pangaawa una sa kantapu, lalaki man ngatay babayi, anak man ngatay gurangun, masakitun man ngatay bukun. Ipinabahala Diyus ti tanan niya nasakupan kan Nabukudunusur.

¹⁸ Dinara ni Nabukudunusur sa Babilunya ti tanan pag kagamitan sa Balay Diyus, dariit ag daraka, ag ti tanan kayamanan sa Balay Diyus, sa hari, ag sa kay manga may kangaranan.

¹⁹ Pagkatapus, sinunug nida ti Balay Diyus ag tinumpag ti alad batu Hirusalim. Sinunug diman nida ti tanan marig-un pag bahagi sa banwa, ag dinaut ti tanan mahalaga pag manga bagay.

²⁰ Binihag ni Nabukudunusur sa Babilunya ti balaw namatay pag manga Israilita, binwat niya sida panawuhun hanggan niya manga anak tugka sa nagmakapangyarihan ti kaharian Pirsiya.

²¹ Nakan natupad ti sinabi Panginuun sa panab-anan ni Purupita Hirimyas bumaliw mapung-aw ti daga ag makapahari inda sa sulud pitumpulu ka timpu.

Ipinabalik ni Sayrus ti manga Israilita sa Kanda Kadagaan

²² Katpung sa un-an pag timpu kay maghari ni Sayrus sa Pirsiya, tinupad Panginuun kay sinabi niya sa panab-anan ni Hirimyas. Inayuhap niya kay tagipusuun ni Sayrus hampay manmuwat usa ka paalam. Isinurat inda ag ipinadara sa kay buu kaharian.

²³ Inda ti tultulanun ni Hari Sayrus sa Pirsiya: “Ipinakaun sa kangku Panginuun, ti Diyus sa langit, ti tanan pag kaharian sitay sa kalibutan, ag piniyaran niya aku sa pag patindug sa Balay Diyus para sa kanya ati sa Hirusalim sa sakup Huda. Kamu tanan pag nasakupan Diyus, pagbalik yi kamu sa kanyu daga. Ag mana ibahan kamu Panginuun.”