2 Krunika 35 - Hanunuu

Idinaus ni Husyas ti Pista Pag-alaala sa Karibrihan

¹ Pagka ika-14 pag sirang sa un-an pag bulan, nagdaus si Hari Husyas Pista Pag-alaala sa Karibrihan sa Hirusalim bilang pagkilala sa Panginuun. Nangiyaw sida manga karanidu ag kambing para sa inda pag pista.

² Pinakan-an ni Husyas ti manga manughandug kanda katungkulan sa Balay Diyus Panginuun, ag pinarig-un niya sida sa kanda pagsirbi.

³ Pinakan-an diman niya manga katungkulan ti manga Libita manugtudlu sa Israil, kuntay itinigana sa pagsirbi sa Panginuun. Magkun siya sa kanda, “ipinauli yi ti banal pag kaban sa Balay Diyus ipinatindug ni Sulumun kay anak ni Dabid, ag balaw yi niyu inda kailangan darahun. Nakan gamitun yi niyu kanyu udas sa pagsirbi sa Panginuun niyu Diyus ag sa kay nasakupan manga Israilita.

⁴ Buwata yi niyu kanyu manga katungkulan sa Balay Diyus angay sa gurupu niyu magtal-anakan. Sunda niyu ti nakasurat pag manga surundanun ni Hari Dabid sa Israil, ag niya anak ni Sulumun.

⁵ Pagtindug kamu sa Balay Diyus angay sa kanyu gurupu, ag pag-awat kamu sa manga magtal-anakan maghandug, ti ipiniyar sa kanyu.

⁶ Paglumpiyu kamu ag pag-alistu kanyu sadili sa pagsirbi sa kanyu manga kasimanwa. Pagkatapus, iyawa niyu ti manga karanidu ag kambing para sa Pista Pag-alaala sa Karibrihan. Sunda niyu ti manga sugu Panginuun sa kanyu sa panab-anan ni Muysis.”

⁷ Buluntad nagpakaun si Husyas 30,000 karanidu ag kambing, ag 3,000 baka, para sa handug manga tawu sa udas Pista Pag-alaala sa Karibrihan.

⁸ Buluntad diman nagpakaun ti manga may kangaranan ni Husyas sa manga tawu, manga manughandug, ag manga Libita. Ti manga manug-asikasu sa Balay Diyus sida ni Hilkiyas, ni Sakaryas, ag ni Hiyil nagpakaun sa kanda kaparihu manga manughandug 2,600 karanidu hanggan kambing, ag 300 baka, bilang handug sa pista.

⁹ Ti manga takinan manga Libita sida ni Kunaniyas, kay manga patar-ari sida ni Simaya ag Natanyil, si Hasabya, Yiil, ag Husabad nagpakaun sa kanda kaparihu manga Libita 5,000 karanidu ag kambing, ag 500 baka, bilang handug sa pista.

¹⁰ Pagka alistu yi ti tanan para sa pista, tinmindug ti manga manughandug hanggan ti manga Libita sa Balay Diyus, angay sa buruwatun kada nida gurupu, dahil sa sugu hari.

¹¹ Iniyaw manga Libita ti manga karanidu ag manga kambing, ag ipinakaun kay dugu sa manga manughandug. Iwinidwisik inda manga manughandug sa harandugan habang pag-anitan manga Libita ti manga hayup.

¹² Pagkatapus, inayaw-ayaw nida sa manga tawu, angay sa gurupu nida manga magtal-anakan, ti manga handug pagsunugun para ihandug sa Panginuun, angay sa nakasurat sa ribru ni Muysis. Katida diman ti binwat nida sa manga baka.

¹³ Linitsun nida ti manga hayup pamista, angay sa nakasurat sa kasuguan. Ginulay nida sa manga anglit, manga kardiru, ag manga kawa ti banal pag manga handug bag-u inayaw-ayaw tunda sa manga tawu.

¹⁴ Pagkatapus, nag-alistu ti manga Libita karan-unun para sa kanda sadili hanggan sa manga manughandug, dahil ti manga manughandug ginan sa lahi ni Aarun balag gid sa pagpakaun manga handug pagsunugun ag manga taba hayup tugka sa magkayabi.

¹⁵ Ti manga manugkanta ginan sa linahi ni Asap ati sa kanda rugar, angay sa surundanun ipinakaun ni Dabid, ni Asap, ni Himan, ag ni Hidutun ti purupita hari. Ti manga guwardiya sa sabian unman yi nighit sa kanda rugar dahil kanda kaparihu manga Libita imaw ti nag-alistu kanda karan-unun.

¹⁶ Pagka tida diman pag sirang, natapus ti tun-anun para sa Pista Pag-alaala sa Karibrihan idinaus para sa Panginuun, hanggan ti pagpakaun manga handug pagsunugun sa harandugan Panginuun, kay isinugu ni Hari Husyas.

¹⁷ Idinaus manga Israilita nagluwang inda pag pista, ag ti Pista Tinapay Unman may Pamadaka sa sulud pitu ka sirang.

¹⁸ Ginan sa udas ni Samwil, unman naidaus ti Pista Pag-alaala sa Karibrihan parihu sa kainda. Unman gid nakadaus ti manga nakalawuy pag manga hari parihu sa pagdaus ni Husyas ag manga manughandug, manga Libita, manga nasakupan Hirusalim, ag manga nasakupan Huda ag Israil.

¹⁹ Idinaus ti pista katpung ika-18 pag timpu maghari ni Husyas.

Kay Pagkamatay ni Husyas

²⁰ Pagkalawuy manga binwat ni Husyas para sa Balay Diyus, pinangunahan ni Hari Niku taga Ihiptu kay manga sundalu sa paglaban ati sa Karkimis, sa may Sapa Iyupratis. Nag-atag ati si Husyas ag kay manga sundalu hampay lumaban sa kan Niku.

²¹ Dapat nagsugu si Niku manga manugtultul sa kan Husyas ag magkun, “Hintay kanmu labut, Hari Husyas? Balaw kawu ti pag girahun niku nu unman ti nasyun maglaban sa kangku. Ag magkun ti Diyus sa kangku kusgi niku ti paggira. Kaibahan niku ti Diyus, nakan danga nimu aku paglabani, dahil barang wayakun kawu niya.”

²² Dapat unman nagbag-u kay isip ni Husyas. Nagdisisyun siya lumaban. Unman siya nagpaniwala sa sinabi Diyus sa kan Niku. Bagkus ngap, napabalhinguun siya ag nighit hampay labanan si Niku sa karatagan Migidu.

²³ Pinana si Husyas ag nabiyagan siya. Magkun siya sa kay manga may kangaranan, “Ipakarayu niyu aku sitay, dahil garabi kang biyag.”

²⁴ Nakan bin-ul nida siya sa kay kalisa ag isinakay sa usa waya niya ka kalisa bag-u dinara sa Hirusalim. Namatay siya ati ag ilinbung sa kalubngan niya manga ginurang. Naghimanglaw para sa kanya ti tanan nasakupan Huda hanggan Hirusalim.

²⁵ Nagbuwat si Hirimyas manga kanta panhimanglaw para kan Husyas, ag tugka taynguna pagkantahun di inda manga manugkanta sa pag-alaala sa kanya. Ti manga kanta panhimanglaw pirmi pagkantahun sa Israil, ag nakasurat sa Ribru manga Panhimanglaw.

^26-27 Ti iba waya ka tultulanun tungkul sa maghari ni Husyas, ginan sa umpisa tugka sa katapusan, nisurat sa Ribru Tultulanun manga Hari Israil ag Huda. Nakasurat diman sitay ti tungkul sa pagmahal ni Husyas sa Panginuun kay ipinakakit niya sa panab-anan pagsunud sa Kasuguan Panginuun.