2 Krunika 34 - Hanunuu

Kay Maghari ni Husyas sa Huda

¹ Si Husyas walu ka timpu kay idad pagka naghari siya. Sa Hirusalim siya nangulian, ag naghari siya sa sulud 31 ka timpu.

² Mayad kay binuwat sa magbantay Panginuun ag nagsunud siya sa pag-ugaliun niya ginurang ni Dabid. Sinunud gid niya ti mayad.

³ Pagka ikawalu pag timpu sa kay maghari niya, habang anak waya siya, nag-umpisa siya nagdangup sa Diyus niya ginurang si Dabid. Ag ati katpung 12 ka timpu kay maghari, linumpiyu niya ti Huda ag Hirusalim sa panab-anan pagdaut manga simbahan sa abwat pag manga rugar, manga tulduk tanda diyusa si Asira, manga diyus-diyusan ag manga larawan.

⁴ Ipinadaut diman niya ti manga harandugan para sa kan Baal hanggan ti manga harandugan pagsunugan kamangyan sa kay arani. Ipinarunut niya ti manga tulduk tanda diyusa si Asira, ti manga diyus-diyusan ag ti manga larawan, ag isinabug inda sa manga kalubngan manga tawu nansagda inda.

⁵ Ipinasunug diman niya ti manga but-ul manga manughandug manga diyus-diyusan sa babaw manga harandugan pagsagdahan inda. Sa kainda pag paraan, nalumpiyu niya ti Huda ag Hirusalim.

⁶ Kainda diman ti binwat niya sa manga banwa Manasis, Ipraim, ag Simyun, ag tugka sa Niptali, hanggan sa guba manga banwa sa sangput inda.

⁷ Ipinadaut niya ti manga harandugan ag ti manga tulduk tanda diyusa si Asira, ag ipinarunut ti manga diyus-diyusan ag ti manga harandugan pagsunugan kamangyan. Pagka nabwat niya inda tanan sa buu Israil, nuli siya sa Hirusalim.

Nakitan sa Balay Diyus ti Ribru Kasuguan

⁸ Katpung ika-18 pag timpu kay maghari ni Husyas, igu naipalumpiyu niya ti daga hanggan ti Balay Diyus, nagpasya siya ipahiwat ti Balay Diyus Panginuun, ti Diyus niya. Ipiniyar niya inda pag buruwatun sa kay manugsurat, sa kan Sapan kay anak ni Asalya, hanggan sa gubirnadur Huda si Maasiyas, ag sa manug-asikasu manga kasuratan sa kaharian si Huwa kay anak ni Huwahas.

⁹ Sida nag-atag kan Hilkiyas sa pangulu manughandug hampay ipakaun ti kuwarta dinara manga tawu sa Balay Diyus. Ti kuwarta linikum manga Libita magbantay sabian Balay Diyus ginan sa manga nasakupan Manasis, Ipraim, sa manga nasawad nasakupan Israil, ag sa manga nasakupan Huda ag Binhamin, hanggan yi sa Hirusalim.

¹⁰ Pagkatapus, ipinakaun ti kuwarta sa manga tawu piniyaran manguna sa pagpahiwat sa Balay Diyus Panginuun, ag ginamit nida inda pamayad sa manga manugbuwat.

¹¹ Kay iba pag kuwarta ipinakaun nida sa manga manugbuwat hampay ibili manga batu tinabas yi ag manga kayu para sa balayan Balay Diyus pinabay-anan dinaut manga hari sa Huda.

^12-13 Matinupadun ti manga manugtarabahu sa kanda buruwatun. Pagpangunahan sida manga Libita sida ni Hahat ni Ubadyas, ginan sa linahi ni Mirari, ag si Sakaryas hanggan si Misulam, ginan sa linahi ni Kuhat. Inda pag manga Libita antigu magpatunug manga pamatunug. Sida ti piniyaran manguna sa manga manugtarabahu sa tuhay-tuhay pag buruwatun. Ti iba manga Libita nagsirbi bilang manga manugsurat, manga antigu magsurat manga papilis, hanggan manga manugbantay manga sabian Balay Diyus.

¹⁴ Habang pagbul-un ti kuwarta linikum sa Balay Diyus Panginuun, nakitan ni Manug-asiwa Hilkiyas ti Ribru Kasuguan Panginuun ipinakaun sa manga Israilita sa panab-anan ni Muysis.

¹⁵ Ibinarita niya sa kan Sapan, imaw ti manugsurat hari, kuntay nakitan niya ti Ribru Kasuguan sa Balay Diyus Panginuun. Pagkatapus, ipinakaun niya inda sa kan Sapan,

¹⁶ ag dinara maan inda ni Sapan sa hari. Sinabi niya rargu sa hari, “Binwat nimi ti tanan ipinabwat nimu sa kanmi.

¹⁷ Bin-ul nimi ti kuwarta sa Balay Diyus Panginuun ag ipinakaun sa manga piniyaran sa pagpahiwat sa Balay Diyus.”

¹⁸ Magkun waya gid siya sa hari, “May ipinakaun ribru sa kangku si Hilkiyas ti manughandug.” Ag binasa niya inda sa atubangan hari.

¹⁹ Pagka nadnugan hari ti nakasurat sa Kasuguan, ginisi niya kay rutay bilang pagpakakit kay karukuan niya.

²⁰ Nagsugu rargu siya sa kanda ni Hilkiyas, Ahikam kay anak ni Sapan, Abdun kay anak ni Mikas, kan Sapan manugsurat, ag kan Asayas kay sadili pag manugsirbi. Magkun siya,

²¹ “Pagpaingana kamu sa Panginuun para sa kangku ag para sa manga nasawad nasakupan Israil ag Huda tungkul sa nakasurat sa nakitan pag ribru. Masyadu gid ti pangagalit Panginuun sa kanta dahil unman nagsunud kanta manga ginurang sa binagaw Panginuun nakasurat sa inda pag ribru.”

²² Nakan nag-atag si Hilkiyas ag ti manga sinugu hari mangiba sa kanya sa usa ka purupita babayi sa kan Hulda hampay mamaingana. Inda si Hulda mag-uli sa bag-u pag baliw Hirusalim ag kay asawa niya si Salum kay anak ni Tukat ag kay laki ni Hasra. Si Salum ti magbantay manga rutay sa Balay Diyus.

^23-24 Magkun si Hulda sa kanda, “Sabihun niyu sa tawu nagpadara sa kanyu sa kangku kuntay inda ti pagsabihun Panginuun, ti Diyus Israil: Rurisun niku inda pag rugar ag ti manga nasakupan inda, angay sa nakasurat sa ribru binasa sa kanmu atubangan.

²⁵ Ipakakit gid niku kang pangagalit sa inda pag rugar ag balaw inda maparaw, dahil dinayu aku niku manga nasakupan ag nagsamba sida sa tuhay pag manga diyus. Pinagalit gid nida aku sa kanda manga binwat.

²⁶ “Dapat sabihun niyu sa hari Huda ti nagpadara sa kanyu hampay mamaingana sa Panginuun, kuntay danga siya kailangan magkataranta sa inda pag tultulanun, dahil inda ti pagsabihun Panginuun, ti Diyus Israil:

²⁷ Pinatingihan niku kanmu darangin, dahil nag-ampu kawu ag nagpakumbaba sa atubangan niku pagka nadnugan nimu ti sinabi niku laban sa inda pag rugar ag sa manga mag-uli sitay. Ginisi nimu waya kanmu rutay ag nanlumi sa kang atubangan bilang pagpakakit karukuan nimu. Nakan aku, ti Panginuun, magsabi

²⁸ tugka buhi waya kawu, unman rumas-ug ti pagruris ipinadara niku sa inda pag rugar ag sa manga mag-uli sitay. Mamatay kawu sa mahusay.” Ag sinabi nida sa hari kay isinagut ni Hulda.

Nanaratu Tupadun ni Husyas ti Sugu Diyus

²⁹ Pagkatapus, ipinatawag ni Hari Husyas ti tanan paggurangunun sa Huda ag Hirusalim.

³⁰ Nag-atag siya sa Balay Diyus Panginuun kaibahan ti tanan nasakupan Huda ag Hirusalim ginan sa pinakabantug tugka sa pinakaababa. Nagkuyug diman ti manga manughandug ag manga Libita. Binasa sa kanda ni Husyas ti tanan nakasurat sa Ribru Kasuguan Diyus, ti nakitan sa Balay Diyus Panginuun.

³¹ Pagkatapus, tinmindug si Husyas sa saruy tulduk pirmi pag tindugan hari. Ag nagbuwat siya kasunduan sa nabubut-un Panginuun kuntay sumunud siya sa Panginuun sa panab-anan pagtupad sa kay manga sugu, itinudlu, ag surundanun may buu tagipusuun ag karadwa. Nanaratu siya tupadun niya ti manga pag-ipatupad kasunduan Diyus nakasurat sa ribru.

³² Ag ipinataratu diman niya ti manga nasakupan Hirusalim ag Binhamin kuntay pagtupad sa kasunduan Diyus. Nakan nagtupad sida sa kasunduan Diyus, ti Diyus nida manga ginurang.

³³ Pagkatapus, ipinaighit ni Husyas ti tanan mayagting pag manga diyus-diyusan sa buu daga Israil, ag pinasirbi ti manga tawu sa Panginuun nida Diyus. Tugka buhi siya, sinunud gid nida ti Panginuun, ti Diyus nida manga ginurang.