2 Krunika 33 - Hanunuu

Kay Maghari ni Manasis sa Huda

¹ Si Manasis 12 ka timpu kay idad pagka nagbaliw siya hari. Sa Hirusalim siya nangulian, ag naghari siya sa sulud 55 ka timpu.

² Daut kay binwat sa magbantay Panginuun. Sinmunud siya sa mayagting pag manga buruwatun manga nasyun ipinalayas Panginuun sa panab-anan manga Israilita.

³ Utru niya ipinatindug ti manga simbahan sa abwat pag manga rugar, ti ipinadaut kaybi niya ama ni Isikyas. Nagpatindug diman siya manga harandugan para sa kan Baal ag nagbuwat manga tulduk tanda diyusa si Asira. Nanluhud siya ag nagsamba sa tanan pag bagay sa kalangitan.

⁴ Nagpabuwat waya gid siya manga harandugan sa Balay Diyus Panginuun, sa Hirusalim, angay sa Panginuun ti rugar nu naan pagdayawun siya tugka aban.

⁵ Ipinauli niya ti manga harandugan sa duwa ka sugkadan Balay Diyus Panginuun hampay sambahun ti tanan bagay sa langit.

⁶ Isinagda niya sa panab-anan apuy kay manga anak sa Karatagan Bin Hinum. Binwat diman niya ti manga pagbuwatun manga manughula ag panhirian, ag nagpaingana siya sa manga pandaniwan magpakihampang sa karadwa manga namatay. Pinakadaut kay binwat niya ag nakapagalit inda sa Panginuun.

⁷ Ipinauli niya sa Balay Diyus ti histuda kay ipinabwat, nu naan magkun ti Panginuun sa kan Dabid ag sa kay anak kan Sulumun, “Dayawun aku tugka aban sa inda pag Balay Diyus ag sa Hirusalim, ti rugar niku pinili ginan sa tanan rugar manga linahi ni Israil.

⁸ Nu tupadun lang nasakupan Israil ti tanan kasuguan ag surundanun niku ipinakaun sa kanda ni Muysis, balaw niku pahintulutan paighitun sida sitay pag daga ipinakaun niku sa kanda manga ginurang.”

⁹ Dapat ginarya ni Manasis ti manga nasakupan Huda ag Hirusalim sa pagbuwat daut, ag ti binwat nida mas subra waya sa binwat manga nasyun ipinaruris Panginuun sa manga Israilita.

¹⁰ Una pinasandaman Panginuun si Manasis ag kay manga nasakupan, unman diman sida namatingi sa kanya.

¹¹ Nakan ipinagira sida Panginuun sa manga sundalu Asirya. Binihag nida si Manasis, pinaulian barung sa irung, tinarikadahan, ag dinara sa Babilunya.

¹² Sa kay kakurian, nagpakumbaba gid siya kay sadili ag nagpaawa-awa sa Panginuun niya Diyus, kuntay siya diman ti Diyus niya manga ginurang.

¹³ Ag pagka nandarangin siya, pinatingihan siya Panginuun. Naawa ti Panginuun sa kay magpaawa-awa. Nakan ipinabalik siya Panginuun sa Hirusalim ag sa kaharian niya. Ag naalaman ni Manasis ti Panginuun lang ti Diyus.

¹⁴ Siyun ginan, ipinahiwat ni Manasis ti panluwas pag alad batu sa Banwa ni Dabid, ginan sa isalpan Gihun, sa may luung tugka sa Sabian pag-ingarnan Isda, palihud sa tagudtud Upil. Pinaabwat diman niya inda. Bag-u nagpauli siya manga kumandir sa tanan may alad batu pag manga banwa sa Huda.

¹⁵ Ipinaighit niya ti manga diyus-diyusan taga iba nasyun ag ti histuda sa Balay Diyus Panginuun. Ipinaighit diman niya ti manga harandugan ipinatindug niya sa bantud pagtindugan Balay Diyus ag ti manga harandugan sa iba pag bahagi Hirusalim, ag ipinayamut niya inda sa luwas banwa.

¹⁶ Pagkatapus, ipinahiwat niya ti harandugan Panginuun ag pinakan-an manga handug para sa mayad pag pakiusa ag manga handug pasalamat. Sinabihan niya ti manga nasakupan Huda kuntay pagsirbi sa Panginuun, ti Diyus Israil.

¹⁷ Katida man, maghandug diman ti manga tawu sa manga simbahan sa abwat pag rugar, dapat ti Panginuun lang nida Diyus ti pag handugan nida.

¹⁸ Ti iba waya ka tultulanun tungkul sa maghari ni Manasis, hanggan kay darangin sa Diyus ag ti manga sinabi manga purupita sa kanya sa ngaran Panginuun, ti Diyus Israil, nisurat sa Ribru Tultulanun manga Hari Israil.

¹⁹ Kay darangin hanggan ti sagut Panginuun sa kanya, hanggan ti tanan niya kasalanan ag paglabag sa Panginuun, nakasurat sa ribru manga Purupita. Nakalista diman sitay ti manga rugar pinatindugan niya manga simbahan, manga tulduk tanda diyusa si Asira, ag iba waya pag manga diyus-diyusan, bag-u waya siya nagpakumbaba sa Diyus.

²⁰ Pagka namatay si Manasis, ilinbung siya sa balay hari niya. Ag kay anak si Amun ti nag-ilis sa kanya bilang hari.

Kay Maghari ni Amun sa Huda

²¹ Si Amun 22 ka timpu kay idad pagka naghari. Sa Hirusalim siya nangulian, ag naghari siya sa sulud duwa ka timpu.

²² Daut kay binwat ni Amun sa magbantay Panginuun, parihu sa binwat ni Manasis niya ama. Sinamba ag sinagdahan niya ti manga diyus-diyusan ipinabwat ni Manasis.

²³ Dapat balaw parihu sa kay ama, unman siya nagpakumbaba sa Panginuun. Bagkus ngap, dinugangan waya gid niya kay kasalanan.

²⁴ Naggayak daut ti manga may kangaranan ni Amun laban sa kanya ag minatay siya sa kay balay hari.

²⁵ Dapat minatay manga nasakupan Huda ti tanan nagmatay kan Hari Amun. Ag kay anak niya si Husyas ti iinilis nida bilang hari.