2 Krunika 32 - Hanunuu

Ginira Asirya ti Huda

¹ Makalawuy mabwat may katupadan ni Isikyas kay manga buruwatun inda, ginira ni Hari Sinakirib taga Asirya ti Huda. Pinuutan niya ag niya manga sundalu ti manga may alad batu pag manga banwa, dahil kay inisip niya masakup niya inda.

² Pagka nakitan ni Isikyas hanggan ti Hirusalim girahun ni Sinakirib,

³ hinampang niya kay manga may kangaranan ag sa manga takinan niya manga sundalu. Nagkausa sida paapasun ti pagbulus manga bulbugan sa luwas banwa.

⁴ Nakan nagtipun sida mayamu pag manga tawu ag tinap-ukan nida ti manga bulbugan ag luung pagbulusan danum sa daga. Dahil magkun sida, “Pagras-ug sitay manga hari taga Asirya, kurangun sida sa danum.”

⁵ Pagkatapus, pinapag-un waya ni Isikyas ti manga palalan-iban sa panab-anan pagpahiwat manga alad batu ag pagpatindug manga bantayaw. Sinangputan waya gid niya usa waya ka alad batu ti banwa, ag pinatap-ukan daga ti ababa pag bahagi Banwa ni Dabid. Nagpabuwat diman siya mayamu manga armas ag manga panangga.

⁶ Nagtalaga siya manga kumandir sa manga tawu, ag ipinatipun niya sida sa buruybuyahan, arani sa may puwirtahan banwa. Pinabisug niya kanda nalub-anan, magkun siya,

⁷ “Pagmatutum kamu ag pagpakaisug. Danga kamu magkadala ngatay manlubay dahil sa hari taga Asirya ngatay sa mayamu niya pag manga sundalu. Dahil higit makamaskihan ti sa kanta kaysa sa kanya.

⁸ Manga tawu lang kay kaibahan niya; dapat kita, kaibahan nita ti Panginuun kanta Diyus. Siya ti mangawat sa kanta ag lumaban para sa kanta.” Nakan tumutum ti manga tawu dahil sa sinabi ni Hari Isikyas sa Huda.

⁹ Habang pag girahun ni Hari Sinakirib ag niya manga sundalu ti banwa Lakis, pinasugu niya kay manga may kangaranan sa Hirusalim hampay sabihun inda sa kan Hari Isikyas ag sa manga nasakupan ati:

¹⁰ “Inda kay sinabi ni Hari Sinakirib taga Asirya: Unu nguna ti pagsarigan niyu ag magpirmaminti waya kamu sa Hirusalim una sinangaputan yi kamu?

¹¹ Magkun si Isikyas sa kanyu iribri kamu Panginuun niyu Diyus sa kamang hari sa Asirya, dapat pagpatalangun lang niya kamu hampay mamatay kamu sa lun-usan ag uwaw.

¹² Unman aw si Isikyas ngapu ti nagpaguba manga simbahan Panginuun sa abwat pag manga rugar, hanggan manga harandugan inda? Nagsugu waya siya sa kanyu manga taga Huda ag Hirusalim kuntay sa usa lang ka harandugan kamu pag mansamba ag mansunug manga handug.

¹³ “Magkaalaman niyu nu unu ti binwat niku, ag niku manga ginurang sa manga nasakupan sa iba pag manga nasyun. Naribri aw sida nida manga diyus ginan sa kang manga kamang?

¹⁴ Unman una di usa sa manga diyus manga nasyun ti rinuris niku lubus ngatay niku manga ginurang ti nakaribri sa kay nasakupan sa kang kamang. Makaparibri aw sa kanyu ti kanyu diyus sa kang kamang?

¹⁵ Danga kamu magpaluku sa kan Isikyas. Danga kamu magpaniwala sa kanya, dahil unman may diyus sa una naan pag nasyun ngatay kaharian ti nakaparibri sa kay nasakupan sa kang kamang ngatay sa kamang niku manga ginurang. Ag lalu yi gid kanyu diyus!”

¹⁶ May idinugang waya gid daut pag manga bagaw ti manga may kangaranan ni Sinakirib laban sa Panginuun Diyus ag sa kay manugsirbi sa kan Isikyas.

¹⁷ Nagpadara waya gid si Hari Sinakirib manga surat hampay alukayuhun ti Panginuun, ti Diyus Israil. Inda kay surat niya: “Ti manga diyus iba manga nasyun unman nairibri kanda nasakupan sa kang kamang. Nakan ti Diyus ni Isikyas unman diman mairibri kay manga nasakupan sa kang kamang.”

¹⁸ Binagaw inda mabaskug manga may kangaranan ni Sinakirib sa bagaw Hibriyu hampay padalaun ti manga nasakupan Hirusalim magtipun ati katpung sa may alad batu. Ag nu nadala yi ti manga tawu, madali yi nida masakup ti banwa.

¹⁹ Ti manga may kangaranan nagbagaw daut laban sa Diyus Hirusalim parihu sa kanda binagaw laban sa manga diyus iba manga nasyun binwat lang tawu.

²⁰ Nandarangin sida sa Diyus sa langit ni Hari Isikyas ag ni Purupita Isayas kay anak ni Amus.

²¹ Ag nagpadara anghil ti Panginuun imaw ti nanruris sa maisug pag manga sundalu, manga kumandir, ag manga may kangaranan sa kampu hari sa Asirya. Nakan nuli si Hari Sinakirib, nangay-a gid. Ag pagka nagsaka siya sa balay niya diyus-diyusan, minatay siya niya iba ka manga anak sa panab-anan baladaw.

²² Nakan irinibri Panginuun si Isikyas ag ti manga nasakupan Hirusalim sa kamang ni Hari Sinakirib taga Asirya ag sa kamang iba waya nida pag manga kalaban. Pinakan-an niya sida kahusayan sa kanda sangput.

²³ Mayamu pag manga tawu ti nagdara manga handug sa Hirusalim para sa Panginuun. Nandara diman sida manga mahalaga pag manga pamakaun para kan Hari Isikyas. Ati ginan pag-ipadayaw si Isikyas tanan pag nasyun.

Kay Nasakit ni Isikyas

²⁴ Pagka tida pag udas, nasakit si Isikyas ag harus mamatay yi siya. Nandarangin siya sa Panginuun, ag pinakan-an siya Panginuun usa ka palatandaan umayad siya.

²⁵ Dapat nagpadayaw si Isikyas ag ipinalawuy niya ti kaayadan ipinakakit Panginuun sa kanya. Nakan nagalit ti Panginuun sa kanya ag sa manga nasakupan Huda ag Hirusalim.

²⁶ Pagkatapus, nag-ampu si Isikyas sa kay pagpadayaw, ag katida diman ti nasakupan Hirusalim. Nakan unman pinadayun Panginuun kay pangagalit sa kanda habang magkabuhi waya si Isikyas.

²⁷ Si Isikyas mayaman ag bantug. Nagpabuwat siya manga haramnuan para sa kay manga pilak, gintu, mahalaga pag manga batu, panlakay, panangga, ag iba waya mahalaga manga bagay.

²⁸ Nagpabuwat diman siya manga haramnuan para sa kay manga tirigu, irinmun ubas hanggan lana ulibu. Tuhay waya sa sitay, nagpabuwat diman siya manga tudir para sa kay manga hayup,

²⁹ dahil masyadu gid mayamu kay manga hayup. Nagpatindug diman siya manga banwa, dahil pinakan-an siya Diyus mayamu gid pag yaman.

³⁰ Si Isikyas ti nagsugu kuntay puniti ti lakawan danum ginan sa bulbugan Gihun ag pabulusun inda atabug sa isalpan Banwa ni Dabid. Nagmarapanalu si Isikyas sa tanan niya binwat.

³¹ Dapat sinubukan siya Diyus pagka rinmas-ug ti manga may kangaranan ginan sa Babilunya mag-usisa tungkul sa makadululaw pag nangyari sa Huda. Binwat inda Diyus hampay maalaman nu unu ungud sa tagipusuun ni Isikyas.

Ti Katapusan Paghari ni Isikyas

³² Ti iba waya ka tultulanun tungkul sa maghari ni Isikyas ag sa kay pagmahal sa Panginuun nakasurat sa Pangakakitun ni Purupita Isayas kay Anak ni Amus, ti kabaliw kasuratan tultulanun manga Hari sa Huda ag Israil.

³³ Pagka namatay si Isikyas, ilinbung siya sa tungud baliwa kalubngan manga linahi ni Dabid. Ginalang siya tanan nasakupan Huda hanggan Hirusalim katpung sa kay pagkamatay. Ag kay anak si Manasis imaw ti nag-ilis sa kanya bilang hari.