2 Krunika 31 - Hanunuu

Ti manga Pagbag-u Binwat ni Isikyas

¹ Pagkalawuy pista, ti manga Israilita naglinuwang ati nag-atag sa manga banwa Huda, ag pinanrunut nida ti aramirawan pag manga batu ag pinanmulud ti manga tulduk tanda diyusa si Asira. Ginuba nida ti manga simbahan sa abwat pag manga rugar ag ti manga harandugan sa buu Huda, Binhamin, ag sa Ipraim ag Manasis. Pagkalawuy nida dautun inda tanan, nuli sida tanan sa kanda manga banwa ag daga.

² Pinuru-puru ni Hari Isikyas ti manga manughandug ag ti manga Libita angay sa kanda buruwatun sa Balay Diyus Panginuun hampay magpakaun manga handug manga pagsunugun ag manga handug para sa mayad pag pakiusa, hampay magpasalamat ag kumanta pagdayaw sa manga sabian Balay Diyus.

³ Nangayaw si Hari Isikyas kay sadili manga hayup para sa manga handug pagsunugun sa surip ag sa yabi, ag para diman sa manga Sirang Pamahari, sa Pista Lapus Lati, ag sa iba waya pag manga pista, angay sa nakasurat sa Kasuguan Panginuun.

⁴ Sinugu diman niya ti manga tawu mag-uli sa Hirusalim kuntay iayaw sa manga manughandug ag manga Libita kanda kabahagi hampay makasirbi sida lubus sa Kasuguan Panginuun.

⁵ Pagka naipaalam yi inda sa manga tawu, maluag nagpakaun ti manga Israilita un-an pag patubas nida tirigu, irinmun ubas, lana ulibu, daykut, ag sa iba waya pag manga patubas sa daga. Ipinakaun nida ti ikasampulu tanan nida pag pinatubas.

⁶ Ti manga taga Israil napasalyu sa Huda, ag ti manga taga Huda nagpakaun diman ikasampulu pag bahagi nida manga baka, karanidu, ag manga bagay itinigana nida sa Panginuun kanda Diyus, ag tinipun nida inda.

⁷ Inumpisahan nida ti pagtipun inda pagka sa ikatlu pag bulan, ag natapus sa ikapitu pag bulan.

⁸ Pagka nakitan ni Isikyas ag niya manga may kangaranan ti manga matumpukan pag handug dinayaw nida ti Panginuun ag manga nasakupan niya Israilita.

⁹ Pinaingana ni Isikyas ti manga manughandug ag ti manga Libita tungkul sa manga matumpukan.

¹⁰ Sinmagut si Asariyas, ti pangulu manughandug ginan sa linahi ni Saduk, “Ginan sa nag-umpisa magdara ti manga tawu kanda manga handug sa Balay Diyus Panginuun nagkaimaw kami kang-ud pag karan-unun ag mayamu waya ti nagsubra, dahil pinapaladan Panginuun kay manga nasakupan.”

¹¹ Nagsugu si Isikyas kuntay pagbuwat manga haramnuan sa Balay Diyus Panginuun, ag nangyari ngani inda.

¹² Ag matinupadun dinara ati manga tawu kanda manga handug, manga ikasampu, ag ti manga bagay itinigana nida sa Panginuun. Si Kunaniyas usa ka Libita imaw ti piniyaran sa inda pag manga bagay, ag kay kaawat niya kay patar-ari lalaki si Simiy.

¹³ Nangawat diman sida ni Hiyil, ni Asasya, ni Nahat, ni Asahil, ni Hirimut, ni Husabad, ni Ilyil, ni Ismakya, ni Mahat, ag ni Binaya. Pinili sida ni Hari Isikyas hanggan ni Asariyas ti pinakaabwat pag takinan sa Balay Diyus.

¹⁴ Si Kuri kay anak ni Imna, usa ka Libita, guwardiya sa butlakan sabian Balay Diyus, siya ti piniyaran mag-asikasu sa manga buluntad pag handug sa Diyus. Karampatan niya ti mag-ayaw sa manga manughandug hanggan sa manga Libita manga bagay ihinandug yi sa Panginuun hanggan manga banal pag handug.

¹⁵ Ti matinupadun niya pag manga kaawat sida ni Idin, Minyamin, Hisuwa, Simaya, Amaryas, ag Sikanyas. Nag-atag sida sa manga banwa pag-ulian manga manughandug kanda kadugu ag ibinahagi sa kanda, kanda bahagi sa manga handug, angay sa kanda gurupu, anak man ngatay gurangun.

¹⁶ Pinakan-an ti tanan manughandug hanggan kanda manga anak lalaki may idad tulu ka timpu paabwat, mag-atag sa Balay Diyus sa pagbuwat kada sirang-sirang buruwatun angay sa garampanun kada gurupu nida. Kaibahan diman sitay ti manga manughandug balaw nakalista sa listahan manga linahi manga manughandug.

¹⁷ Sida hanggan ti manga manughandug nakalista sa listahan manga linahi pinakan-an kanda kabahagi, ag katida diman ti manga Libita kay idad 20 ka timpu paabwat, magsirbi angay sa katungkulan nida gurupu.

¹⁸ Pinakan-an diman ti manga magtal-anakan manga Libita — kanda manga asawa, manga anak, hanggan ti dariit nida pag manga anak. Binwat inda sa tanan Libita nakalista sa listahan nida manga linahi. Dahil matinupadun diman sida sa paglumpiyu sa kanda sadili.

¹⁹ Tungkul waydi sa manga manughandug kay lahi ni Aarun, mag-uli sa manga katanmanan sa sangput manga banwa ag sa tuhay pag manga banwa, may manga tawu piniyaran mangayaw kanda bahagi ag sa bahagi tanan Libita nakalista sa listahan nida manga linahi.

²⁰ Katida ti binwat ni Hari Isikyas sa buu Huda. Binwat niya ti mayad ag kang-ud, ag nagbaliw matinupadun siya sa atubangan Panginuun niya Diyus.

²¹ Nagbaliw marapanalu siya, dahil sa tanan binwat niya para sa Balay Diyus ag sa pagsunud niya sa kasuguan, nagdangup siya sa kay Diyus buu tagipusuun.