2 Krunika 30 - Hanunuu

Ti Pag-alistu para sa Pista Pag-alaala sa Karibrihan

¹ Nagpadara si Isikyas barita sa tanan nasakupan Israil ag Huda, hanggan yi sa manga nasakupan Ipraim ag Manasis. Binan-awan niya sida pag-atag sa Balay Diyus Panginuun sa pagdaus Pista Pag-alaala sa Karibrihan bilang pagkilala sa Panginuun, ti Diyus Israil.

² Nagdisisyun si Hari Isikyas ag kay manga may kangaranan, ag ti tanan nasakupan sa Hirusalim, kuntay idaus ti Pista Pag-alaala sa Karibrihan sa ikadwa pag bulan.

³ Kailangan mana ganapun ti pista inda sa un-an pag bulan, dapat pira-pira lang ti manga manughandug naglumpiyu kanda sadili sa tida pag udas ag unman nagtipun ti manga tawu sa Hirusalim.

⁴ Nagustuhan hari ag tanan nasakupan ti gayak kuntay idaus ti pista,

⁵ nakan nagpadara sida tultulanun sa buu Israil, ginan sa Biirsiba tugka sa Dan, kuntay kailangan umatag ti manga tawu sa Hirusalim sa pagdaus Pista Pag-alaala sa Karibrihan para sa Panginuun, ti Diyus Israil. Sa manga nalawyan pagdaus, pira-pira lang ti nagluwang. Dapat pagsabihun sa kasuguan kuntay kailangan lumuwang ti tanan.

⁶ Sa sugu hari, nag-atag ngani ti manga manugbarita sa buu Israil ag Huda dara ti manga surat ginan sa hari ag sa kay manga may kangaranan. Inda ti nakasurat: “Manga nasakupan Israil, taynguna nakaribri kamu sa kamang manga hari sa Asirya, udas yi bumalik-nalub-anan kamu sa Panginuun, ti Diyus niyu manga ginurang nida ni Abraham, Isaak, ag Hakub, hampay bumalik diman siya sa kanyu.

⁷ Danga niyu paghuwada kanyu manga ginurang ag manga katawuhan unman nagbaliw matinupadun sa Panginuun kanda Diyus, kuntay dahil sitay binwat sida mayagting Panginuun parihu sa mag-akitan niyu taynguna.

⁸ Nakan danga maganit kanyu ulu parihu sa kanyu manga ginurang, nu unman pagpasakup kamu sa Panginuun. Pag-atag kamu sa Balay Diyus kay pinabanal hanggan aban. Ag pagsirbi kamu sa Panginuun niyu Diyus, hampay madura ti masyadu niya pag galit sa kanyu.

⁹ Dahil nu bumalik kamu sa Panginuun, kaawaan manga nagbihag kanyu manga anak ag manga katawuhan, ag pabalikun sida sa inda pag daga. Dahil mainawatun ag maawaun ti Panginuun niyu Diyus. Unman niya kamu patlikudan nu bumalik kamu sa kanya.”

¹⁰ Nag-atag ti manga manugbarita sa kada banwa sa buu Ipraim ag Manasis tugka sa Sabulun, dapat kinasarin-an lang sida ag pinuyaan manga tawu.

¹¹ Dapat may iba ginan sa Asir, Manasis, ag Sabulun ti nagpakumbaba ag nag-atag sa Hirusalim.

¹² Nagpasandam diman ti Panginuun sa manga taga Huda hampay magkausa sida sa pagtupad sa sugu hari ag manga may kangaranan, angay sa sugu Panginuun.

¹³ Nakan pagka sa ikadwa pag bulan, mayamu pag manga tawu ti nagtipun sa Hirusalim sa pagdaus Pista Tinapay Unman may Pamadaka.

¹⁴ Inighit nida ti manga harandugan sa Hirusalim pagsagdahan para sa manga diyus-diyusan, hanggan ti manga harandugan pagsunugan kamangyan, ag iyinamut nida inda tanan sa Luung Kidrun.

¹⁵ Pagka ika-14 pag sirang sa ikadwa pag bulan, iniyaw manga tawu kanda manga karanidu para sa Pista Pag-alaala sa Karibrihan. Ti manga manughandug ag manga Libita mauring nangay-a, nakan naglumpiyu sida ag namakaun manga handug pagsunugun sa Balay Diyus Panginuun.

¹⁶ Pagkatapus, tinmindug sida sa kanda manga rugar sa Balay Diyus, angay sa surundanun sa kasuguan ni Muysis ti manugsirbi Diyus. Iwinisik manga manughandug sa harandugan ti dugu dinara manga Libita sa kanda.

¹⁷ Dahil mayamu sa manga tawu ati ti unman naglumpiyu kanda sadili, ti manga Libita imaw ti nag-iyaw kanda manga karanidu para sa kanda hampay maisagda sa Panginuun.

¹⁸ Kayamuan sa manga nag-atag nag-ati sa Ipraim, Manasis, Isakar, ag Sabulun unman naglumpiyu kanda sadili, dapat nagkaun diman sida ihinandug para sa Pista Pag-alaala sa Karibrihan, una labag inda sa kasuguan. Dapat nandarangin si Hari Isikyas para sa kanda. Magkun siya, “Panginuun, sa kanmu duy kaayadan, mana patawadun nimu duy ti kada tawu

¹⁹ magkaibug magdangup sa kanmu, ti Diyus niya manga ginurang, una waya balaw siya malumpiyu angay sa manga surundanun sa Balay Diyus.”

²⁰ Pinatingihan Panginuun si Isikyas ag pinatawad niya ti manga tawu.

²¹ Sa sulud pitu ka sirang, ti manga Israilita ati sa Hirusalim nagdaus Pista Tinapay Unman may Pamadaka may daka pag kabayaan. Sirang-sirang magkanta ti manga Libita ag ti manga manughandug manga pagdayaw sa Panginuun, pagpatunugan marabisug pag manga pamatunug paggamitun sa pagdayaw sa Panginuun.

²² Dinayaw ni Isikyas ti tanan Libita sa mayad pag buwat ipinakakit nida sa pagsirbi sa Panginuun. Nakan parargu ti pagdaus nida sa sulud pitu ka sirang. Kinaun nida kanda bahagi sa manga handug, ag nanagda sida manga handug para sa mayad pag pakiusa, ag nagdayaw sa Panginuun, ti Diyus nida manga ginurang.

²³ Pagkatapus, nagpasya ti buu kadamlan mandaus waya sida pitu ka sirang. Nakan binwat nida inda may daka pag kabayaan.

²⁴ Nangayaw si Hari Isikyas sa manga tawu 1,000 ka tudu baka ag 7,000 ka karanidu ag kambing. Nangayaw diman ti manga may kangaranan 1,000 ka tudu baka ag 10,000 ka karanidu ag kambing. Mayamu sa manga manughandug ti naglumpiyu kanda sadili.

²⁵ Masulung nagdaus ti buu kadamlan Huda, ti manga manughandug, ti manga Libita, ag ti tanan nagtipun ginan sa Israil, hanggan ti manga day-uhan magpangulian sa Israil ag Huda.

²⁶ Subra pagkabayaan sa Hirusalim. Unman waya may kainda pag kabayaan nangyari sa Hirusalim ginan kaybi sa udas si Sulumun kay anak ni Dabid ti hari sa Israil.

²⁷ Pagkatapus, nagtindug ti manga manughandug ag ti manga Libita ag pinapaladan nida ti manga tawu. Ag pinatingihan inda Diyus sa langit, sa kay banal pag-ulian.