2 Krunika 3 - Hanunuu

Ipinatindug ni Sulumun ti Balay Diyus sa Hirusalim

¹ Inumpisahan yi ni Sulumun ti pagpatindug sa Balay Diyus Panginuun sa Hirusalim ati sa bantud Muriya, nu naan pag napakakit ti Panginuun sa kay ama sa kan Dabid. Ati niya inda pag ipinatindug sa giriukan ni Arauna usa ka Hibusiyu, ti rugar inalistu ni Dabid.

² Inumpisahan niya inda ipinatindug katpung sa ikadwa pag sirang sa ikadwa pag bulan, pagka ikap-at pag timpu kay maghari.

³ Ti paratukawan Balay Diyus may imaw 60 ka luk-an siku kay kaaba ag kay bulang 20 ka luk-an siku.

⁴ Ti sarakahan sa atubangan Balay Diyus 20 ka luk-an siku kay aba, parihu sa bulang Balay Diyus, ag kay abwat 20 ka luk-an siku diman. Pinahaklupan ni Sulumun kay sulud lunsay gintu.

⁵ Pinalinguban niya ti sarakahan Balay Diyus sipris pag kayu ag pinahaklupan lunsay gintu, pinarinuan manga histuda kayu palma hanggan manga tarikada.

⁶ Pinaulian diman niya pamarinu ti Balay Diyus manga mahalaga pag manga batu ag gintu ginan waya sa Parbaim.

⁷ Pinahaklupan niya gintu ti manga balayan, bakalan sabian, manga lingub hanggan manga talakup. Ag pinarirukan niya kirubin ti manga lingub.

⁸ Ti Pinakabanal pag Sulud-sulud may bulang 20 ka luk-an siku ag kay aba 20 ka luk-an siku diman, parihu sa bulang Balay Diyus. Kay sulud inda hinaklupan 21 ka tunilada gintu.

⁹ Ti manga paku ginamit pinahaklupan diman gintu kay timbang tunga sa kilu. Kay manga lingub sulud-sulud sa tungud pinahaklupan diman gintu.

¹⁰ Nagpabuwat si Sulumun sa sulud Pinakabanal pag Sulud-sulud duwa ka histuda kirubin ag pinahaklupan niya inda gintu.

^11-13 Ti kada kirubin may duwa ka pakpak, ag ti kada pakpak may aba 5 ka luk-an siku. Nakan ti kabuuhan kaabaan magtaklub pag manga pakpak duwa ka kirubin 20 ka luk-an siku. Kay baliw suru nida pakpak mag-araputan, ag kay baliw waydi pakpak mad-utan sa lingub.

¹⁴ Ti limbun matakluban sa Pinakabanal pag Sulud-sulud human sa pisahan linu malatuy, dungun hanggan marara, may burda tunda kirubin.

Ti Duwa ka Tulduk sa Atubangan Balay Diyus

¹⁵ Nagbuwat diman si Sulumun duwa ka tulduk sa atubangan Balay Diyus kay abwat ti kada usa 35 ka luk-an siku. Ti kada tulduk may pamarinu sa tungud, kay abwat 5 ka luk-an siku.

¹⁶ Ti kada tulduk pinarinuan manga tarikada may pamarinu ga burak kayu pumigranata. Inda pag manga pamarinu 100 ka bilug.

¹⁷ Ipinatindug niya ti manga tulduk sa atubangan Balay Diyus. Kay usa baliwa sa salatan ag kay usa baliwa sa kanaway. Ti tulduk baliwa sa salatan iningarnan niya Hakin ag ti tulduk baliwa sa kanaway iningarnan niya Buus.