2 Krunika 29 - Hanunuu

Kay Maghari ni Isikyas sa Huda

¹ Si Isikyas 25 ka timpu kay idad pagka naghari. Sa Hirusalim siya nangulian, ag naghari siya sa sulud 29 ka timpu. Kay ina si Abya kay anak ni Sakaryas.

² Matadlung sa magbantay Panginuun kay binwat ni Isikyas, parihu sa binwat niya ginurang ni Dabid.

³ Sa un-an bulan sa un-an pag timpu sa kay maghari, pinabukasan maan niya ti manga sabian Balay Diyus Panginuun ag ipinahiwat.

⁴ Ipinatawag niya ti manga manughandug hanggan ti manga Libita ag ipinatipun sa sulud sugkadan baliwa sa butlakan Balay Diyus.

⁵ Magkun siya sa kanda, “Patingihi niyu aku, kamu pag manga lahi ni Libi. Lumpiyuha kanyu sadili taynguna, ag lumpiyuha diman niyu ti Balay Diyus Panginuun, ti Diyus niyu manga ginurang. Bul-a niyu sa Balay Diyus ti tanan mayagting pag bagay.

⁶ Unman matinupadun kanta manga ginurang. Daut ti binwat nida sa magbantay Panginuun nita Diyus ag siya kanda dinayu. Pinabay-anan nida ti Balay Diyus ag siya kanda ngani pinatlikudan.

⁷ Tinalakpan nida ti manga sabian sa sarakahan Balay Diyus ag pinus-an ti manga sulul-an. Unman sida nagsunug kamangyan ngatay nagpakaun manga handug pagsunugun sa Balay Diyus para sa Diyus Israil.

⁸ Nakan nagalit ti Panginuun sa Huda ag Hirusalim. Ag dahil sa kay parusa sa kanta, pagkayagtingan, pagpuyaan, ag pagdiitun kita manga tawu parihu sa kanyu mag-akitan taynguna.

⁹ Nagkaramatay kanta manga ginurang sa labanan, ag binihag kanta manga asawa ag anak.

¹⁰ Dapat taynguna, gustu gid niku manbuwat kasunduan sa Panginuun, ti Diyus Israil, hampay madura ti masyadu niya pag pangagalit sa kanta.

¹¹ Nakan manga pagmahalun, danga yi kamu magpabaya. Kamu ti pinili Panginuun hampay tumindug sa kay atubangan, sa pagsirbi hanggan sa pagsagda.”

¹² Nakan nag-umpisa sa pagbuwat ti manga Libita: Sa magtal-anakan ni Kuhat: si Mahat kay anak ni Amasay ag si Huwil kay anak ni Asariyas. Sa magtal-anakan ni Mirari: si Kis kay anak ni Abdi ag si Asariyas kay anak ni Hihalilil. Sa magtal-anakan ni Girsun: si Huwa kay anak ni Sima ag si Idin kay anak ni Huwa.

¹³ Sa manga linahi ni Ilisapan: sida ni Simri ni Yiil. Sa manga linahi ni Asap: sida ni Sakaryas ni Matanyas.

¹⁴ Sa manga linahi ni Himan: sida ni Hiyil ni Simiy. Sa manga linahi ni Hidutun: sida ni Simaya ni Usyil.

¹⁵ Tinipun nida kanda kadugu manga Libita ag linumpiyu nida kanda sadili. Linumpiyu diman nida ti Balay Diyus Panginuun angay sa isinugu hari. Sinunud nida ti sinabi Panginuun.

¹⁶ Sinmulud ti manga manughandug sa Balay Diyus hampay lumpiyuhun inda. Ipinalwas nida sa sugkadan Balay Diyus ti tanan nida nakitan pag kagamitan pagbaliwun mauring. Ag dinara inda manga Libita sa Luung Kidrun.

¹⁷ Inumpisahan nida lumpiyuhun ti Balay Diyus sa un-an pag sirang sa un-an pag bulan, pagka sa ikawalu pag sirang, nakaaput sida sa sarakahan Balay Diyus. Ipinarargu nida ti pag lumpiyu sa Balay Diyus sa sulud waya gid walu ka sirang, ag natapus nida ti pag lumpiyu pagka ika-16 pag sirang sa ati pag bulan.

¹⁸ Pagkatapus, nag-atag sida kan Hari Isikyas ag magkun, “Mayad pag Hari, nalumpiyu yi duy nimi ti buu Balay Diyus Panginuun hanggan ti harandugan manga handug pag sunugun ag ti tanan kagamitan inda, ag ti lamisa pagpaulian tinapay pag-isagda ag ti tanan pag kagamitan inda.

¹⁹ Naibalik diman nimi ti tanan kagamitan linukab ni Hari Akas pagka sa udas unman siya matinupadun sa Diyus. Linumpiyu yi duy nimi inda ag alistu yi gamitun. Ati yi duy inda kainda sa atubangan harandugan Panginuun.”

²⁰ Kinaaldawan, surip waya tinipun yi ni Hari Isikyas ti manga may kangaranan sa banwa ag nag-atag sida sa Balay Diyus Panginuun.

²¹ Nagdara sida pitu ka tudu baka, pitu ka lalaki karanidu, pitu ka anak karanidu, ag pitu ka lalaki kambing bilang handug sa paglumpiyu para sa kanda kaharian, sa Balay Diyus, ag sa manga nasakupan Huda. Sinugu ni Hari Isikyas ti manga manughandug ginan sa lahi ni Aarun hampay ihandug tida sa harandugan Panginuun.

²² Nakan iniyaw manga manughandug ti manga tudu baka ag iwinidwisik kay dugu inda sa harandugan. Katida diman ti binuwat sa manga lalaki karanidu ag manga anak karanidu.

²³ Ti manga kambing handug sa pag lumpiyu dinara nida sa hari ag sa manga tawu, ag ikinupa nida kanda manga kamang sa manga kambing.

²⁴ Pagkatapus, iniyaw manga manughandug ti manga kambing ag ibinuhus kay dugu inda sa harandugan bilang handug sa pag lumpiyu sa kasalanan tanan Israilita. Dahil nagsugu ti hari magpakaun manga handug pagsunugan ag manga handug sa pag lumpiyu para sa tanan Israilita.

²⁵ Pagkatapus, nagtigana si Isikyas manga Libita sa Balay Diyus Panginuun may manga simbals, manga alpa, ag manga lira. Inda angay sa sugu Panginuun sa kan Hari Dabid sa panab-anan ni Gad kay purupita ni Dabid ag kan Purupita Natan.

²⁶ Tinmindug ti manga Libita may manga garamitun magtunug ni Hari Dabid, hanggan ti manga manughandug may manga budyung.

²⁷ Bag-u nagsugu si Isikyas ihandug sa harandugan ti manga handug pagsunugun. Mintaras maghandug, magkanta manga pagdayaw sa Panginuun ti manga tawu, magpatunug kanda manga budyung ag iba waya pag manga kagamitan magtunug ni Hari Dabid taga Israil.

²⁸ Ti buu kadamlan nagluhud sa pagsamba sa Panginuun habang magkanta ti manga manugkanta ag magpatunug ti manga manugpatunug budyung tugka maipakaun ti tanan handug pagsunugun.

²⁹ Pagka nakahandug, linmuhud si Hari Isikyas hanggan ti tanan kaibahan niya, ag nagsamba sa Panginuun.

³⁰ Nagsugu si Hari Isikyas hanggan kay manga may kangaranan sa manga Libita hampay dayawun ti Panginuun sa panab-anan manga kanta binwat ni Hari Dabid ag ni purupita Asap. Nakan nanganta sida manga kanta pagdayaw may kabayaan habang mayungduan sida sa pagsamba sa Diyus.

³¹ Pagkatapus, magkun si Isikyas, “Taynguna naihandug yi niyu kanyu sadili sa Panginuun, pagdara kamu manga handug, hanggan manga handug pagpasalamat sa Balay Diyus Panginuun.” Nakan nagdara ti manga tawu inda pag manga handug sa Balay Diyus Panginuun, ti iba buluntad nagpakaun manga handug pagsunugun.

³² Ti bilang manga handug pagsunugun dinara manga tawu 70 ka tudu baka, 100 lalaki karanidu, ag 200 ka anak karanidu.

³³ Nandara diman sida tuhay waya pag manga handug 600 tudu baka ag 3,000 karanidu hanggan kambing.

³⁴ Dapat pira-pira lang ti manga manughandug mag-iyaw inda pag manga hayup. Nakan nangawat sa kanda ti katawuhan nida pag manga Libita tugka sa natapus tida pag buruwatun ag tugka sa nagyamu ti manga manughandug naglumpiyu kanda sadili. Dahil mas matinupadun waya ti manga Libita sa paglumpiyu kanda sadili kaysa manga manughandug.

³⁵ Pagkayamu handug pagsunugun, hanggan manga taba manga hayup ihinandug para sa mayad pag pakiusa, ag manga handug irinmun pag-ipakaun kaibahan manga handug pagsunugun. Sa kainda pag paraan, naibalik maan ti manga buruwatun sa Balay Diyus Panginuun.

³⁶ Subra kay kabayaan ni Isikyas hanggan ti manga tawu sa awat binwat Diyus, dahil siti nabwat nida ti tanan inda sa madali.