2 Krunika 28 - Hanunuu

Kay Maghari ni Akas sa Huda

¹ Si Akas 20 ka timpu kay idad pagka naghari siya. Sa Hirusalim siya pag nuli, ag naghari siya sa sulud 16 ka timpu. Nagbuwat siya daut sa magbantay Panginuun, balaw parihu sa binwat niya ginurang ni Dabid.

² Sinmunud siya sa manga pag-ugaliun manga hari Israil, ag nagbuwat baul pag manga histuda ni Baal.

³ Nagsunug siya manga handug sa Luung Bin Hinum, ag ihinandug gid ngap niya sa apuy kay manga anak lalaki. Sinunud niya ti mayagting pag manga buruwatun manga nasyun ipinalayas Panginuun sa panab-anan manga Israilita.

⁴ Namakaun siya manga handug ag nanunug manga kamangyan sa manga simbahan sa abwat pag manga rugar, sa babaw manga bantud ag sa sirung kada maraybung pag puun kayu.

⁵ Nakan ipinakaun siya Panginuun niya Diyus sa hari taga Aram. Pinirdi siya manga Aramiyu ag mayamu sa kay nasakupan ti binihag sa Damasku. Ipinakaun diman siya sa hari taga Israil, ti nagmatay sa mayamu niya nasakupan.

⁶ Sa usa lang ka sirang 120,000 ka sundalu Huda ti minatay ni Hari Pika Israil, kay anak ni Rimalya. Nangyari inda sa manga taga Huda dahil dinayu nida ti Panginuun, ti Diyus nida manga ginurang.

⁷ Minatay ni Sikri, usa ka maisug pag sundalu Israil, sida ni Maasiyas kay anak ni Hari Akas, si Asrikam manug-asikasu sa balay hari, ag si Ilkana pangadwa sa hari.

⁸ Binihag manga taga Israil kanda manga kadugu taga Huda — 200,000 asawa ag manga anak. Pinanbuul diman nida ti manga kasiyunan manga taga Huda ag dinara sa pag-uli sa Samarya.

⁹ Dapat pagka rinmas-ug ti manga sundalu sa Samarya, sinulang sida ni Udid purupita Panginuun, ag magkun, “Ipinahintulut sa kanyu Panginuun niyu Diyus ti Huda dahil sa kay pangagalit sa kanda. Dapat subra kanyu binwat; pinanmatay niyu sida unman may awa, ag naalaman inda Panginuun ati sa langit.

¹⁰ Ag taynguna gustu waya niyu panawuhun ti manga lalaki ag babayi ginan sa Hirusalim ag sa iba waya pag banwa Huda. Unman aw may kasalanan diman kamu sa Panginuun niyu Diyus?

¹¹ Pagpatingi kamu sa kangku! Magkagalit ti Panginuun sa kanyu. Nakan paulia niyu kanyu manga kadugu kanyu binihag.”

¹² Kainda diman ti sinabi iba pag manga takinan Israil sa manga sundalu rinmas-ug ginan sa labanan. Ti manga takinan sida ni Asariyas kay anak ni Hihuhanan, Birikyas kay anak ni Misilimut, Hihiskiya kay anak ni Salum, ag Amasa kay anak ni Hadlay.

¹³ Inda ti sinabi nida sa manga sundalu: “Danga niyu pagdaran-a sitay ti manga bihag tunda, dahil saragtun nita inda sa Panginuun. Dugangan aw waya lugud niyu kanta kasalanan? Mayamu yi kanta kasalanan, ag magkagalit yi ti Panginuun sa Israil.”

¹⁴ Nakan binuhian manga sundalu ti manga bihag ag inuli kanda kasiyunan sa atubangan manga takinan ag manga nasakupan.

¹⁵ Pagkatapus, nagpakarani sa manga bihag ti upat ka nasambit kay ngaran pag takinan, ag inawatan ti manga bihag. Nagbuul sida manga rutay ginan sa manga kagamitan naagaw manga sundalu, ag ipinasulung inda sa manga lukas pag bihag. Pinakan-an nida ti manga bihag manga rutay, lapak, irinmun, ag bulung. Ipinasakay nida sa manga asnu ti manga malumuy, ag dinara nida pabalik ti tanan bihag sa kanda manga kasimanwa. Ati nida sida pag tinayakan sa Hiriku, sa Banwa manga Palma, ag pagkalawuy nuli sida sa Samarya.

Nanhagad Awat si Akas sa Asirya

¹⁶ Pagka ati pag udas, nanhagad awat si Hari Akas sa hari taga Asirya.

¹⁷ Dahil utru ginira manga taga Idum ti Huda ag binihag ti iba pag manga mag-ulian ati.

¹⁸ Tuhay waya sitay, ginira diman manga Pilistiyu ti manga banwa Huda ati sa manga katagudtudan sa isalpan ag ati sa Nigib. Naagaw nida ti Bit Simis, Ayalun, Gidirut, Suku, Timna, ag Gimsu, hanggan ti manga banwa sa kay sangput inda; ag ati yi sida pag nangulian.

¹⁹ Ipinakababa Panginuun ti Huda dahil ginarya ni Hari Akas ti manga nasakupan sa pagbuwat kadautan, ag unman gid siya sinmunud sa Panginuun.

²⁰ Nakan pagras-ug ni Hari Tigrat Pilisir taga Asirya, inapiki niya si Akas sa halip awatan.

²¹ Nam-ul si Akas manga kasiyunan sa Balay Diyus Panginuun, sa balay hari, ag sa manga balay manga may kangaranan, ag ipinakaun niya inda sa hari taga Asirya. Dapat unman inda nakaawat kan Akas.

²² Sa udas kakurian ni Hari Akas, lalu waya siya nagsupakil sa Panginuun.

²³ Nagpakaun siya manga handug sa manga diyus manga taga Damasku nagpirdi sa kanya. Dahil magkun siya, “Ti manga hari taga Aram inawatan nida manga diyus. Nakan manhandug diman aku sa inda pag manga diyus hampay awatan diman nida aku.” Dapat imaw inda ti nagpadamhak sa kanya ag sa manga taga Israil.

²⁴ Bin-ul ni Akas ti manga kagamitan sa Balay Diyus ag ipinarunut inda. Tinalakpan niya ti sabian Balay Diyus, ag nanpatindug siya manga harandugan sa kada pagsalakan Hirusalim.

²⁵ Nanpatindug diman siya manga simbahan sa abwat pag manga rugar sa tanan banwa sa Huda, hampay makahandug sa tuhay pag manga diyus. Ag subra nakapagalit sa Panginuun, ti Diyus niya manga ginurang.

²⁶ Ti iba waya ka tultulanun tungkul sa maghari ni Akas ag sa kay inugali, ginan sa umpisa tugka sa katapusan, nisurat sa Ribru Tultulanun manga Hari Huda ag Israil.

²⁷ Pagka namatay si Akas, ilinbung siya sa banwa Hirusalim, dapat balaw sa kalubngan manga hari Israil. Ag si Isikyas kay anak ti nag-ilis sa kanya bilang hari.