2 Krunika 27 - Hanunuu

Kay Maghari ni Hutam sa Huda

¹ Si Hutam 25 ka timpu kay idad pagka naghari siya. Sa Hirusalim siya pag nangulian, ag naghari siya sa sulud 16 ka timpu. Kay ina si Hirusa kay anak ni Saduk.

² Matadlung kay binwat ni Hutam sa magbantay Panginuun, parihu sa binwat niya ama ni Usyas. Ag mas matadlung waya siya dahil balaw niya hinuwad ti kasalanan pagbuwatun niya ama sa panab-anan labag kay pag sulud sa Balay Diyus Panginuun. Sa baliw manga kaayadan kay binwat ni Hutam, parargu diman ti manga tawu sa kanda daut pag manga buruwatun.

³ Si Hutam ti nagpatindug sa Kanaway pag Sabian Balay Diyus Panginuun, ag mayamu kay ipinahiwat sa alad batu sa kabantudan Upil.

⁴ Siya diman ti nagpatindug manga banwa sa kabantudan Huda, ag nagpatindug manga alad batu hanggan manga bantayaw sa manga kapuruan.

⁵ Nanlaban si Hutam sa manga Amunita ag sa kanda hari, ag pinirdi niya sida. Sa ati diman pag timpu, nagpakaun sa kanda ti manga Amunita manga 3,500 kilu pilak, 30,000 saku tirigu, ag 30,000 saku sibada. Binwat nida inda tugka sa ikatlu pag timpu.

⁶ Nagbaliw makapangyarihan waya gid si Hutam dahil matinupadun siya magsunud sa Panginuun niya Diyus.

⁷ Ti iba waya ka tultulanun tungkul sa maghari ni Hutam, hanggan ti tanan niya paglaban ag manga binwat, nisurat sa Ribru Tultulanun manga Hari Israil ag Huda.

⁸ Si Hutam 25 ka timpu kay idad pagka naghari siya. Sa Hirusalim siya pag nuli, ag naghari siya sa sulud 16 ka timpu.

⁹ Pagka namatay si Hutam, ilinbung siya sa Banwa ni Dabid. Ag kay anak si Akas ti nag-ilis sa kanya bilang hari.