2 Krunika 26 - Hanunuu

Kay Maghari ni Usyas sa Huda

¹ Ti itinulus manga nasakupan Huda sa kan Amasiyas bilang hari kay anak si Usyas may 16 ka timpu kay idad.

² Siya ti nagbawi Ilat ag ti utru nagpatindug inda makalawuy mamatay kay ama si Amasiyas.

³ Si Usyas 16 ka timpu kay idad pagka naghari siya. Sa Hirusalim siya nangulian, ag naghari siya sa sulud 52 ka timpu. Kay ina niya si Hikulya taga Hirusalim.

⁴ Matadlung kay binwat ni Usyas sa magbantay Panginuun, parihu sa binwat niya ama ni Amasiyas.

⁵ Nagdangup siya sa Diyus sa panahun ni Sakaryas, imaw ti nagtudlu sa kanya sa paggalang sa Diyus. Habang parargu kay magdangup sa Panginuun, pagpaalwanun siya Diyus.

⁶ Linmaban siya sa manga Pilistiyu ag winayak niya ti manga alad batu sa manga banwa Gat, Habni, ag Asdud. Pagkatapus, nanpatindug siya bag-u pag manga banwa arani sa Asdud ag sa iba waya pag manga banwa Pilistiya.

⁷ Inawatan siya Diyus sa kay paglaban sa manga Pilistiyu, manga Miyunita, ag sa manga Arabu mag-uli sa Gur Baal.

⁸ Magbayad buwis ti manga Amunita sa kanya, ag nibantug siya tugka sa Ihiptu, dahil nagmakapangyarihan yi gid siya.

⁹ Pinarig-un waya ni Usyas ti Hirusalim sa panab-anan pagpatindug manga bantayaw sa Suuk pag Sabian, sa Sabian Maatubangan sa Luung, hanggan sa likuan alad batu.

¹⁰ Nagpatindug diman siya manga bantayaw sa pangawakawaan ag namakutkut manga bubun tipunan danum, dahil mayamu kay manga hayup sa manga tagudtud sa isalpan ag sa karatagan. May manga tawuhan siya mag-alaga sa kay tanman hanggan sa kay taranuman ubasan sa kabantudan ag sa karatagan, dahil maraibgun siya magtanum.

¹¹ May manga mahusay pag manga sundalu si Usyas pirmi alistu sa labanan. Sida pagpanguluhan nida ni Yiil ti manugsurat hanggan ni Maasiyas ti may kangaranan, sa sirung karampatan ni Hananiyas usa sa manga takinan hari.

¹² Ti manga kumandir maisug pag manga sundalu imaw ti manga takinan manga magtal-anakan 2,600 tanan.

¹³ Ti kabuuhan bilang manga sundalu 307, 500. Sida mahusay sa labanan, ag alistu sa mangawat sa hari laban sa kay manga kalaban.

¹⁴ Pinakan-an sida ni Usyas manga panangga, bangkaw, hilmit, rutay panagang sa bilug, pamana, ag lampitaw.

¹⁵ Nagpabuwat diman si Usyas sa mahusay pag manugbuwat kagamitan hampay gamitun sa pamana ag sa pagyamut daraka pag manga batu ginan sa manga bantayaw ag sa manga suuk manga alad batu. Nibantug bantug si Usyas una naan, dahil inawatan siya Panginuun tugka nagmakapangyarihan siya.

¹⁶ Dapat pagka nag makapangyarihan yi siya, nag padayaw siya. Ag inda ti nakapaababa sa kanya. Unman siya sinmunud sa Panginuun niya Diyus, dahil sinmulud siya sa Balay Diyus Panginuun ag nagsadili nagsunug kamangyan sa harandugan.

¹⁷ Dinasun siya ni Asariyas takinan manughandug ag 80 waya ka maisug pag manga manughandug Panginuun,

¹⁸ ag tinamyaw. Magkun sida, “Usyas, balaw kawu dapat magtuub kamangyan para sa Panginuun. Inda pag buruwatun para lang sa manga manughandug ginan sa lahi ni Aarun. Sida ti pinili Panginuun magtuub kamangyan. Pagluwas kawu sa Balay Diyus, dahil unman kawu magsunud sa Panginuun. Unman kawu papaladan Panginuun Diyus sa binwat nimu tunda.”

¹⁹ Subra yi nagalit si Usyas sa manga manughandug. Ag habang hiyaput niya ti sukadan kamangyan sa may harandugan sa Balay Diyus, tinubuan dilikadu pag sakit sa lukub ag bangas.

²⁰ Pagka nakitan ni Asariyas ag kaibahan niya manga manughandug tinubuan panakitun sa lukub ag bangas ni Usyas, nag-apura sida ipalwas inda. Unman waydi nagbugya dahil nadamdaman niya siya pinarusahan Panginuun.

²¹ May panakitun sa lukub si Hari Usyas tugka sa sirang namatay siya. Mag-uli siya masamanan pag balay, ag unman siya pinasnuan makasaka sa Balay Diyus. Si Hutam kay anak imaw ti nagdumara sa balay hari ag sa nasakupan Huda.

²² Ti iba waya ka tultulanun tungkul sa maghari ni Usyas, ginan sa umpisa tugka sa katapusan, isinurat ni Purupita Isayas kay anak ni Amus.

²³ Pagka namatay si Usyas, ilinbung siya arani sa kalubngan niya manga ginurang hari. Unman siya ipinaamut sa kanda, dahil may sakit siya sa lukub. Si Hutam kay anak imaw ti kailis niya bilang hari.