2 Krunika 25 - Hanunuu

Kay Maghari ni Amasiyas sa Huda

¹ Si Amasiyas 25 ka timpu kay idad pagka naghari. Sa Hirusalim siya pag nangulian, ag naghari siya sa sulud 29 ka timpu. Kay ina niya si Hihuwadan taga Hirusalim.

² Matadlung kay binwat ni Amasiyas sa magbantay Panginuun, dapat balaw lubus kay magsunud niya sa Panginuun.

³ Pagka marig-un yi kay maghari ni Amasiyas, ipinamatay niya ti manga may kangaranan nagmatay sa kay ama hari.

⁴ Dapat unman niya ipinamatay inda kay manga anak, dahil angay sa nisurat sa Ribru Kasuguan ni Muysis, magkun ti Panginuun, “Balaw dapat matyun ti manga gurang dahil sa kasalanan nida manga anak, ag ti manga anak danga diman dapat matyun dahil sa kasalanan nida manga gurang. Matyun lang ti tawu dahil sa kay sadili niya kasalanan.”

⁵ Tinipun ni Amasiyas kay manga sundalu ginan sa Huda ag Binhamin. Ginurupu niya sida angay sa kanda magtal-anakan ag pinaulian manga kumandir mandumara sa tig 100 ag tig 1,000 ka sundalu. Pagkatapus, binilang niya kay manga sundalu may idad 20 ka timpu paabwat, ag ti kayamuun 300,000. Inda sida mahusay sa bangkaw ag panangga.

⁶ Nagbuul diman siya 100,000 matutum pag manga sundalu ag sinuhulan inda sida 3,500 ka kilu pilak.

⁷ Dapat may usa ka manugsirbi sa Diyus nag-atag kan Amasiyas ag magkun, “Mahal Hari, danga kawu magbuul manga sundalu ginan sa Israil, dahil tida pag banwa unman yi pag giyahan Panginuun. Ti manga nasakupan Ipraim unman yi pag-awatan Panginuun.

⁸ Nu pakuyugun nimu sida sa labanan, matalu gid kamu una manlaban waya kamu mayad. Ti Diyus lang ti makapanalu ngatay makapatalu sa kanyu.”

⁹ Magkun si Amasiyas sa manugsirbi sa Diyus, “Dapat kabitay ti ibinayad niku 3,500 ka kilu pilak?” Sinmagut ti manugsirbi sa Diyus, “Mas subra waya sa siyun ti ipakaun Panginuun sa kanmu.”

¹⁰ Nakan pinauli ni Amasiyas ti manga sundalu taga Ipraim. Nuli sida magkagalit gid sa Huda.

¹¹ Nagmatutum si Amasiyas sa paggira, ag pinangunahan niya kay manga sundalu sa pag-atag sa karatagan pag-ingarnan Asin, nu naan nakamatay sida 10,000 ka manga Idumita.

¹² Nakadakup waya gid sida 10,000 sundalu, ag dinara nida inda sa usa ka yangpas ag ati pag ilinagpak, nakan nagkarabari-bari kay manga but-ul nida inda.

¹³ Ti manga sundalu ipinauli ni Amasiyas ag unman ipinakuyug sa labanan nan-gira sa manga banwa Huda ginan sa Samarya tugka sa Bit Hurun. Nakamatay sida 3,000 tawu, ag mayamu pag manga kasiyunan kanda pinanbuul.

¹⁴ Pagbalik ni Amasiyas ginan sa pagmatay sa manga Idumita, dinara niya ti manga diyus-diyusan manga Idumita. Binwat niya inda kay sadili diyus, sinamba, ag sinagdahan manga handug.

¹⁵ Nakan subra kay galit ti Panginuun sa kan Amasiyas. Nagpadara siya purupita kan Amasiyas hampay sabihun, “Hayga nagpakarani kawu sa manga diyus-diyusan balaw ngani nakaparibri sa kanda manga nasakupan sa kanmu manga kamang?”

¹⁶ Habang magbagaw ti purupita, sinmagut ti hari, “Hayga pagpaanyuan nimu aku? Binwat aw kawu niku tagapaanyu? Paghim-ung kawu, dahil nu unman, ipamatay niku kawu.” Nakan naghim-ung ti purupita makalawuy niya sabihun: “Pihu rurisun kawu Diyus dahil sinamba nimu ti manga diyus-diyusan ag unman kawu namatingi sa kangku.”

¹⁷ Pagka natapus kay hampang ni Hari Amasiyas sa kay manga tagapaanyu, nagpadara siya tultulanun sa hari Israil sa kan Hihuas kay anak ni Hihuahas kay laki ni Hihu. Ginanyat niya si Hihuas manlalabanan sida.

¹⁸ Dapat sinagut siya ni Hari Hihuas sa panab-anan inda pag tultulanun: “Ati sa Libanun may madugi pag halaman nagpadara tultulanun sa puun kayu sidru: ‘Ipaasawa nimu kanmu anak babayi sa kang anak lalaki.’ Dapat may linmawuy hayup ginan sa talun ag tinatatataan niya ti madugi pag halaman.

¹⁹ Amasiyas, tutuu natalu nimu ti Idum ag pag-ipadayaw nimu inda. Dapat mayad waya balaw yi lang kawu manggira sa kanmi nu unman pumirmaminti yi lang kawu sa kanmu rugar. Hayga gustu gid nimu ti gulu mandara lang kadamhakan sa kanmu ag sa Huda?”

²⁰ Dapat unman namatingi si Amasiyas, dahil inda ti kagustuhan Diyus hampay wayakun siya ni Hihuas dahil sa kay pagsamba sa manga diyus Idum.

²¹ Nakan ginira siya ni Hari Hihuas ag niya manga sundalu. Naglaban sida sa Bit Simis sakup Huda.

²² Tinalu Israil ti Huda, ag ti kada sundalu Huda nalagiw nag-inuli sa kanda balay.

²³ Nadakup ni Hari Hihuas si Hari Amasiyas ati sa Bit Simis, ag dinara niya siya sa Hirusalim. Pagkatapus, dinaut ni Hihuas ti manga alad batu sa Hirusalim ginan sa Sabian Ipraim tugka sa Suuk pag Sabian, manga 400 luk-an siku kay aba.

²⁴ Bin-ul niya ti tanan gintu, pilak ag kagamitan kay nakitan sa Balay Diyus paghamnuun kaybi ni Ubid Idum. Bin-ul diman niya ti manga kayaman sa balay hari. Dinara niya inda ag ti manga bihag sa kay pagbalik sa Samarya.

²⁵ Nabuhi waya si Hari Amasiyas sa Huda 15 ka timpu makalawuy mamatay si Hari Hihuas sa Israil.

²⁶ Ti iba waya ka tultulanun tungkul sa maghari ni Amasiyas, ginan sa umpisa tugka sa katapusan, nakasurat sa kasuratan tultulanun manga Hari sa Huda ag sa Israil.

²⁷ Makalawuy napatlikud si Amasiyas sa Panginuun, may manga taga Hirusalim naggayak matyun siya. Nakan nalagiw siya atabug sa banwa Lakis dapat nagpadara sida tawu hampay usigun siya ati ag matyun.

²⁸ Ikinarga sa kabayu ti bangkay niya pabalik sa Hirusalim ag ilinbung sa kalubngan niya manga ginurang sa Banwa ni Dabid.