2 Krunika 24 - Hanunuu

Ipinahiwat ni Huas ti Balay Diyus

¹ Si Huas pitu ka timpu kay idad pagka pinili siya hari. Sa Hirusalim siya nangulian, ag naghari siya sa sulud upatpulu ka timpu. Kay ina niya si Sibya taga Biirsiba.

² Matadlung sa kay magbantay Panginuun kay binwat ni Huas sa buu buhi ni manughandug Hihuyada.

³ Nagpili si Hihuyada duwa ka asawa para sa kan Huas, ag may manga anak siya lalaki hanggan babayi.

⁴ Pagkalawuy pira ka timpu, nagdisisyun si Huas ipahiwat ti Balay Diyus.

⁵ Ipinatawag niya ti manga manughandug hanggan ti manga Libita, ag sinabihan, “Pag-atag kamu sa manga banwa Huda ag tipuna niyu ti manga buhis manga Israilita kada timpu, hampay maipahiwat nita ti Balay nita Diyus. Buwata niyu inda.” Dapat unman rargu sinmunud ti manga Libita.

⁶ Nakan ipinatawag ni Hari Huas si Hihuyada, ti pangulu manughandug ag pinaingana, “Hayga unman nimu ipinatipun sa manga Libita ti buhis manga nasakupan Huda ag Hirusalim? Unman aw nagsugu si Muysis sa nasakupan Israil kuntay ipakaun nida inda para sa Turda Kaban Kasunduan?”

⁷ (Kay manga anak ni Atalya, ti daut pag babayi, nanbuul manga banal pag kagamitan hampay gamitun sa pagsamba sa kan Baal.)

⁸ Nakan nagsugu si Hari Huas pagbuwat kaban palaulian kuwarta, ag ipauli inda sa luwas sabian Balay Diyus.

⁹ Pagkatapus, nagpadara barita sa Huda ag Hirusalim, kuntay kailangan daran-un manga tawu sa Panginuun kanda buhis angay sa isinugu ni Muysis sa nasakupan Israil sa pangawakawaan.

¹⁰ Masulung magpakaun buhis ti tanan may kangaranan ag ti manga tawu. Isinukad nida kanda kuwarta sa kaban tugka sa napunu inda.

¹¹ Nu punu yi ti kaban, pagdaran-un inda manga Libita sa takinan hari. Pagkatapus, pagbilangun inda manugsurat hari ag may kangaranan pangulu manughandug, ag pag-ibalik nida ti kaban ati sa sabian Balay Diyus. Pagbuwatun nida inda sirang-sirang tugka sa nagyamu ti natipun.

¹² Pagkatapus, ipinakaun nida ni Hari Huas ni Hihuyada ti kuwarta sa manga tawu magdumara sa pagpahiwat sa Balay Diyus. Ag nagbuul sida manga manugpanday ag manga manugbuwat mahusay sa baul ag galang.

¹³ Marasipag ti manga itinigana sa magtarabahu, nakan madali ti pagbuwat. Nahiwat nida ti Balay Diyus angay sa urungan pag kurti, ag pinarig-un waya inda.

¹⁴ Pagka natapus ti tarabahu, inuli nida sa hari ag kan Hihuyada ti sawad kuwarta. Ag ginamit inda sa pagpabuwat manga kagamitan sa Balay Diyus Panginuun — ti manga paggamitun sa pagsamba, sa pagpakaun manga handug pag sunugun, hanggan yi ti manga malukung ag manga sukadan gintu ag pilak. Ag habang buhi si Hihuyada, parargu ti pagsagda manga handug pag sunugun sa Balay Diyus Panginuun.

¹⁵ Nabuhi si Hihuyada aduk pag timpu, ag namatay siya kay idad 130.

¹⁶ Ilinbung siya sa kalubngan manga hari sa Banwa ni Dabid, dahil sa mayad pag manga binwat niya sa Israil para sa Diyus hanggan sa Balay Diyus.

¹⁷ Dapat pagkalawuy namatay si Hihuyada, nag-atag ti manga may kangaranan Huda kan Hari Huas. Nagyuk-ub sida sa hari bilang paggalang, ag binagyat siya pagpatingi sa kanda.

¹⁸ Nagpasya sida pabay-anan yi lang ti Balay Diyus Panginuun, ti Diyus nida manga ginurang, ag mansamba yi lang sa tulduk tanda diyusa si Asira ag sa iba waya pag manga diyus-diyusan. Dahil sa binwat nida, nagalit ti Diyus sa Huda ag Hirusalim.

¹⁹ Nagpadara ti Panginuun manga purupita sa manga tawu hampay pabalikun sida sa kanya. Ag una pag pasandaman sida manga purupita, unman diman sida magpatingi.

²⁰ Sinuldan Ispiritu Diyus si Sakaryas kay anak ni Hihuyada. Tinmindug siya sa atubangan manga tawu ag magkun, “Inda ti pagsabihun Diyus: Hayga balaw niyu sinunud ti manga sugu Panginuun? Unman kamu umalwan. Dinayu niyu ti Panginuun, nakan dayuun diman niya kamu.”

²¹ Naggayak ti manga may kangaranan matyun si Sakaryas. Sa sugu hari, binintuk nida si Sakaryas sa sulud sugkadan Balay Diyus Panginuun, ag namatay inda.

²² Kinalimtan ni Hari Huas ti ipinakakit pag kaayadan sa kanya ni Hihuyada, kay ama ni Sakaryas. Bagkus ngap, ipinamatay niya si Sakaryas. Inda ti sinabi ni Sakaryas pagka hirimugtasun yi siya, “Mana makitan Panginuun kanyu binuwat, ag suktun niya kamu.”

²³ Pagka umpisa bag-u timpu, ginira manga sundalu sa Aram ti Huda. Natalu nida ti Huda hanggan ti Hirusalim, ag minatay nida ti manga takinan Huda. Dinara nida sa kanda hari sa Damasku ti naaghas nida pag manga kasiyunan.

²⁴ Pira-pira lang ti nan-gira pag manga sundalu Aram nu ipaparihu sa manga sundalu Huda. Dapat ipinatalu Panginuun sa kanda ti Huda, dahil dinayu nida ti Panginuun, ti Diyus nida manga ginurang. Nakan rinmas-ug inda pag parusa kan Huas.

²⁵ Pag-ighit manga taga Aram, natayak may biyag si Huas. Dapat nagkausa kay manga may kangaranan, matyun nida siya dahil sa pagmatay niya sa kay anak ni Hihuyada. Nakan minatay ngani nida siya sa kay igyaan. Ilinbung siya sa Banwa ni Dabid, dapat balaw sa kalubngan manga hari.

²⁶ Ti manga nagmatay sa kanya si Sabad anak usa ka babayi Amunita si Simyat, ag si Hihusabad anak usa ka babayi Muabita si Simrit.

²⁷ Ti tultulanun tungkul sa manga anak ni Huas, sa manga ihinula tungkul sa kanya, ag sa pagpahiwat Balay Diyus nisurat sa kasuratan tultulanun manga hari. Kay anak niya si Amasiyas ti nag-ilis sa kanya bilang hari.