2 Krunika 23 - Hanunuu

¹ Pagka sa ikapitu pag timpu, nagbuwat yi tiklang si Hihuyada. Nagbuwat siya kasunduan sa lima ka kumandir ginatus pag manga sundalu. Sida ni Asariyas kay anak ni Hiruham, Ismail kay anak ni Hihuhanan, Asariyas kay anak ni Ubid, Maasiyas kay anak ni Adayas, ag Ilisapat kay anak ni Sikri.

² Namalibut sida sa buu Huda hampay patipunun ti manga Libita hanggan ti manga takinan manga magtal-anakan. Pagras-ug manga tawu sa Hirusalim,

³ nag-atag sida sa Balay Diyus ag nagbuwat kasunduan sa kan Huas kay anak hari. Magkun si Hihuyada sa manga tawu, “Inda yi ti panahun kuntay humari ti anak hari, angay sa itinaratu Panginuun kuntay pirmi may humari sa linahi ni Dabid.

⁴ Taynguna, inda ti buwatun niyu: Ti usa sa tulu ka gurupu manga manughandug ag manga Libita, magtanud nu Sirang Pamahari, mananud sa manga sabian Balay Diyus.

⁵ Ti pangadwa sa tulu ka gurupu nida mamantay sa balay hari. Ag ti uryan sa tulu ka gurupu mamantay sa Sabian Patakinan. Ti iba pag manga tawu ati sa manga sugkadan Balay Diyus Panginuun.

⁶ Unman may sumulud sa Balay Diyus Panginuun, purya lang sa manga manughandug ag manga Libita magsirbi sa tida pag udas. Puydi sida makasaka dahil itinigana sida para sa inda pag buruwatun. Dapat ti iba kailangan ati sa luwas lang pag mamantay angay sa sugu Panginuun.

⁷ Kailangan bantayan kamayad manga Libita ti hari, nakaalistu kanda manga armas, ag dasunun nida siya una naan siya pag-umatag. Una si unu ti sumulud sa Balay Diyus balaw manughandug ngatay Libita kailangan matyun.”

⁸ Binwat manga Libita ag manga taga Huda ti isinugu ni Hihuyada manughandug. Tinipun manga kumandir ti manga tawuhan nida magbantay nu Sirang Pamahari, hanggan diman ti unman magbantay sa tida pag sirang. Balaw dapu pinauli ni Hihuyada ti manga Libita una natapus yi ti tagka pag udas nida tarabahu.

⁹ Pagkatapus, ti manga kumandir pinakan-an ni Hihuyada manga bangkaw hanggan daraka ag dariit pag manga panangga pag-apuun kaybi ni Hari Dabid, itinagu ati sa Balay Diyus.

¹⁰ Ipinauli niya ti armadu pag manga lalaki sa sangput Balay Diyus hanggan sa harandugan hampay alagaan ti hari.

¹¹ Pagkatapus, ipinalwas ni Hihuyada hanggan niya manga anak si Huas ti anak hari ag pinakurunahan. Pinakan-an niya siya kupya manga surundanun tungkul sa magpanguna hari, ag ipinamarita siya hari. Pinayidan siya lana ulibu hampay ipakakit kuntay siya yi ti hari, ag namaragritan ti manga tawu, “Mabuhi ti hari!”

¹² Pagka nadnugan ni Atalya ti iringayan manga tawu magpalalagiwan ag magparagritan hampay pagdayawun ti hari, nag-atag siya sa kanda ati sa Balay Diyus Panginuun.

¹³ Ag nakitan niya ati ti bag-u pag hari matindugan arani sa tulduk pirmi pagtindugan hari, sa may sabian Balay Diyus. Ati sa arani hari ti manga kumandir ag ti manga magpatunug budyung, ag ti tanan tawu masulung. Ti manga manugkanta magpanguna sa pagdayaw sa Diyus, magpatunug manga kagamitan pamatnug. Pagka nakitan inda tanan ni Atalya, ginisi niya kay rutay sa daut niya nalub-anan, ag nagringgit, “Manga manugdaya! Manga manugdaya!”

¹⁴ Sinugu ni Hihuyada ti manga kumandir sa manga sundalu, “Daran-a niyu sa luwas si Atalya ag matya una si unu ti manribri sa kanya. Danga niyu siya pagmatya sitay sa sulud Balay Diyus Panginuun.”

¹⁵ Nakan dinakup nida siya ag dinara sa luwas sabian pag lakawan manga kabayu atabug sa balay hari, ag ati siya pag minatay.

Ti manga Pagbag-u Binwat ni Hihuyada

¹⁶ Nagbuwat kasunduan si Hihuyada kaibahan ti manga tawu hanggan ti hari kuntay sida nasakupan yi Panginuun.

¹⁷ Bag-u ti tanan tawu nangatag sa simbahan ni Baal ag dinaut nida inda. Rinunut nida ti manga harandugan ag ti manga diyus-diyusan ati, ag minatay nida si Matan kay manughandug ni Baal sa atubangan manga harandugan.

¹⁸ Pagkatapus, ipiniyar ni Hihuyada sa manga manughandug manga lahi ni Libi ti magpanguna sa Balay Diyus Panginuun parihu sa kay binwat ni Dabid. Mansagda sida manga handug pagsunugun angay sa nakasurat sa Kasuguan ni Muysis, bag-u manhuruyawan ag mangarantahan angay sa isinugu ni Dabid.

¹⁹ Nagpauli diman si Hihuyada manga manugbantay sa manga sabian Balay Diyus Panginuun hampay unman may makasaka tawu pagkilalan-un mayagting.

²⁰ Pagkatapus, tinaban niya ti manga kumandir, ti manga pagkilalahun pag tawu, ti manga may kangaranan ag ti tanan pag tawu, ag kanda itinibu ti hari sa balay hari ginan sa Balay Diyus Panginuun. Ati sida pag linmakaw sa Kanaway pag Sabian. Bag-u ipinatukaw nida ti hari sa kay turukawan sa pagkahari.

²¹ Nagdaus ti manga tawu, ag nagbaliw mahusay yi ti banwa pagka namatay si Atalya.