2 Krunika 22 - Hanunuu

Kay Maghari ni Ahasiyas sa Huda

¹ Si Ahasiyas kay kap-usan pag-anak ni Hihuram imaw ti ipinatukaw nasakupan Hirusalim kuntay kanda hari. Dahil kay iba pag manga anak ni Hihuram pinanmatay manga Arabu nan-gira sa Huda. Nakan naghari sa Huda si Ahasiyas kay anak ni Hari Hihuram.

² Si Ahasiyas 22 ka timpu kay idad pagka naghari siya. Sa Hirusalim siya nangulian, ag naghari siya sa sulud usa ka timpu. Kay ina niya si Atalya kay laki ni Umri.

³ Sinmunud diman si Ahasiyas sa pangabuhi magtal-anakan ni Akab, dahil ginarya siya niya ina sa pagbuwat kadautan.

⁴ Daut kay binwat sa magbantay Panginuun parihu sa binwat magtal-anakan ni Akab, dahil pagka lawuy mamatay kay ama, nagbaliw manugpaanyu niya ti manga kasunu magtal-anakan ni Akab.

^5-6 Sinunud niya ti paanyu nida sa pagpakampi sa kan Huram kay anak ni Hari Akab sa Israil. Kinmuyug siya kan Huram sa paglaban kan Hari Hasail taga Aram. Nanlalabanan sida sa Ramut Gilyad, ag nabiyagan si Huram. Nakan nuli siya sa banwa Hisriil hampay magpaayad sa biyag niya. Habang ati siya, sinabang siya ni Hari Ahasiyas sa Huda.

⁷ Ti pagsabang ni Ahasiyas kan Huram ginamit Diyus hampay matyun si Ahasiyas. Pagka ati si Ahasiyas sa Hisriil, inawatan niya si Huram sa paglaban kan Hihu kay anak ni Nimsi. Si Hihu ti pinili Panginuun hampay rurisun kay magtal-anakan ni Akab.

⁸ Habang pagmatyun ni Hihu ti magtal-anakan ni Akab, nakitan niya ti manga may kangaranan sa Huda ag ti manga anak manga katawuhan ni Ahasiyas nagkuyug kan Ahasiyas. Ag minatay niya sida.

⁹ Pagkatapus, ipinahanap ni Hihu sa kay manga tawuhan si Ahasiyas, ag nakitan nida siya napatagu sa banwa Samarya. Dinara nida siya kan Hihu ag minatay. Ilinbung nida ti bangkay niya dahil magkun sida, “Laki siya ni Husapat, ti tawu nagdangup sa Panginuun buu niya tagipusuun.” Unman una di usa ti natayak sa manga kasunu magtal-anakan ni Ahasiyas ti may kakayahan humari.

Si Atalya ag si Huas

¹⁰ Pagka naalaman ni Atalya kuntay namatay yi kay anak si Ahasiyas, nagdisisyun siya matyun ti tanan kasunu magtal-anakan hari sa Huda.

¹¹ Dapat irinibri ni Hihusiba kay anak ni Ahasiyas si Huas pagka pagmatyun yi inda ag ti iba waya pag manga anak hari. Si Hihusiba kay patar-ari ni Ahasiyas ag kay anak babayi ni Hari Hihuram, ag asawa manughandug ni Hihuyada. Itinagu niya si Huas ag kay manug-alaga anak sa usa ka sulud-sulud sa Balay Diyus, nakan unman siya namatay ni Atalya.

¹² Sa sulud unum ka timpu, napatagu sa Balay Diyus Panginuun si Huas habang si Atalya ti magdumara bilang rayna sa Huda.