2 Krunika 21 - Hanunuu

¹ Pagka namatay si Husapat, ilinbung siya sa kalubngan niya manga ginurang sa Banwa ni Dabid. Ag kay anak si Hihuram ti kailis niya bilang hari.

² Kay manga patar-ari ni Hihuram sida ni Asariyas, Hiyil, Sakaryas, Asaryahu, Mikail, ag Sipatyas. Sida tanan kay anak ni Hari Husapat sa Huda.

³ Pinakan-an sida ni Husapat mayamu manga pamakaun pilak ag gintu, mahalaga pag manga bagay, ag may alad batu pag manga banwa sa Huda. Dapat si Hihuram ti iinilis niya bilang hari dahil siya ti panganay.

Kay Maghari ni Hihuram sa Huda

⁴ Pagka marig-un yi kay maghari ni Hihuram sa kaharian niya ama, ipinamatay niya ti tanan niya manga patar-ari, hanggan ti iba pag manga may kangaranan sa Huda.

⁵ Si Hihuram 32 ka timpu kay idad pagka naghari siya. Sa Hirusalim siya nangulian, ag naghari siya sa sulud walu ka timpu.

⁶ Sinmunud siya sa pangabuhi manga hari sa Israil, parihu sa binwat magtal-anakan ni Akab, dahil kay naasawa kay anak ni Akab. Daut kay binwat sa magbantay Panginuun.

⁷ Dapat dahil sa kasunduan Panginuun sa kan Dabid, balaw niya rinuris ti linahi ni Dabid. Dahil nagtaratu ti Panginuun sa kan Dabid kuntay unman maduraan si Dabid linahi humari tugka aban.

⁸ Pagka udas maghari ni Hihuram, naglaban ti Idum sa Huda, ag nagpili sida kanda sadili pag hari.

⁹ Nakan nag-atag si Hihuram hanggan kay manga may kangaranan sa Idum kaibahan ti tanan niya manga manugkalisa. Pinalibutan siya hanggan ti kumandir niya manga manugkalisa manga taga Idum, dapat pagkayabi ginira nida ti manga Idumita, ag nakapalagiw sida.

¹⁰ Taynguna tugka maglaban waya ti Idum sa Huda. Sa ati diman pag panahun, naglaban diman ti Libna sa Huda, dahil dinayu ni Hihuram ti Panginuun, ti Diyus niya manga ginurang.

¹¹ Nagpatindug siya manga simbahan sa manga kabantudan Huda imaw kay dahilan pagsamba manga taga Hirusalim ag taga Huda sa manga diyus-diyusan.

¹² Pinadaran-an ni Purupita Ilyas si Hihuram surat magkumun: “Inda ti pagsabihun Panginuun, ti Diyus nimu ginurang ni Dabid: Unman nimu sinunud ti pangabuhi nimu ama ni Husapat ngatay kanmu laki si Asa nagbaliw hari diman sa Huda.

¹³ Bagkus ngap, sinunud nimu ti pangabuhi manga hari Israil. Ginarya nimu ti manga taga Huda ag manga taga Hirusalim sa pagsamba sa manga diyus-diyusan parihu sa kay binuwat ni Akab. Minatay nimu diman kanmu sadili manga patar-ari mas mahusay waya kaysa kanmu.

¹⁴ Nakan taynguna parusahan kawu Panginuun, kawu ag kanmu manga nasakupan, manga anak, manga asawa, ag ti tanan nimu kasiyunan. Masyadu pag parusa ti ipadara niya sa kanyu.

¹⁵ Kawu ngapu mangagwanta sa masyadu pag panakitun sa tiyan tugka lumuwas kanmu puna.”

¹⁶ Pagkatapus, pinaisug Panginuun ti galit manga Pilistiyu ag manga Arabu, mag-uli arani sa manga taga Itiyupya, laban kan Hihuram

¹⁷ Ginira nida ti Huda, ag pinanbuul ti manga kasiyunan sa balay hari, hanggan kay manga asawa ag anak. Kay kap-usan lang pag anak niya si Ahasiyas ti unman nadara.

¹⁸ Pagkalawuy kaybi, pinakurianan Panginuun si Hihuram panakitun sa tiyan unman yi may bulung.

¹⁹ Pagkalawuy manga duwa ka timpu, linmuwang kay puna dahil sa panakitun, ag namatay siya sa masyadu pag sakit. Unman namamakut apuy kay nasakupan sa pagkilala sa kanya, balaw ga sa kanda binwat sa kay manga ginurang.

²⁰ Si Hihuram 32 ka timpu kay idad pagka naghari siya. Sa Hirusalim siya nangulian, ag naghari siya sa sulud walu ka timpu. Pagka namatay siya, unman may nanhimanglaw sa kanya. Ilinbung siya sa Banwa ni Dabid, dapat balaw sa kalubngan manga hari.