2 Krunika 20 - Hanunuu

Tinalu ni Husapat ti Muab ag Amun

¹ Pagkatapus, linmaban ti manga Muabita ag manga Amunita, kaibahan ti iba manga Miyunita, kan Husapat.

² May manga tawu nag-atag kan Husapat ag magkun, “Pagkayamu pag manga sundalu paras-ugun hampay manggira sa kanmu. Sida ginan sa Idum sa baliw dipay Dagat Namatay. Ati sida sa Hasasun Tamar” (pag-ingarnan diman In Gidi).

³ Nadala si Husapat, ag nagdangup siya sa Panginuun. Bag-u nagsugu siya danga maghandum karan-unun ti tanan taga Huda.

⁴ Nakan nagtipun ti manga tawu ginan sa tanan pag banwa Huda hampay manhagad awat sa Panginuun.

⁵ Tinmindug si Husapat sa atubangan nasakupan Huda ag Hirusalim ati sa atubang Balay Diyus Panginuun, sa atubangan bag-u pag sugkadan inda,

⁶ ag magkun, “Panginuun, Diyus nimi manga ginurang, kawu ti Diyus asan sa langit? Kawu ti magpamahala sa tanan pag kaharian sa kalibutan. Makamaskihan gid kawu ag unman may makalaban sa kanmu.

⁷ Diyus nimi, bukun aw tinabug nimu ti manga mag-uli sa inda pag daga sa panab-anan nimu manga nasakupan Israilita? Ag bukun aw ipinakaun nimu inda sa kanda, manga linahi ni Abraham kanmu kakilala, hampay bumaliw kanda tugka aban?

⁸ Nangulian sida sitay ag nagpatindug Balay Diyus para sa ikadayaw nimu pag ngaran. Magkun sida,

⁹ ‘Nu may kadamhakan rumas-ug sa kanmi parihu sa lalabanan, sarut, ngatay taglun-us, tumindug kami sa kanmu nabubut-un sa atubang inda pag Balay Diyus nu naan pagdayawun kawu. Manhagad kami kanmu awat sa kanmi kakurian, ag patingihan nimu kami ag iribri.’

¹⁰ “Taynguna, pag girahun kami manga tawu ginan sa Amun, Muab, ag Bantud Siir. Kaybi, kanda manga magkaakupahan unman nimu pinasnuan sakupun manga Israilita pagka nagluwas sida sa Ihiptu. Nakan nag-aman ti manga Israilita sa kanda ag unman sida rinuris.

¹¹ Dapat taynguna, bantayi nimu ti pag-ibalus nida sa kanmi. Pag girahun nida kami hampay palayasun kami sa daga nimu ipinakaun sa kanmi bilang maranahun.

¹² Diyus nimi, unman aw nimu sida parusahan? Dahil unman kami may kaya umatubang sa pagkayamu sundalu maggira sa kanmi. Unman nimi alam nu unu ti kanmi buwatun, dapat magsarig kami sa kanmu.”

¹³ Habang matindugan ati sa atubangan Panginuun ti tanan lalaki taga Huda, kaibahan kanda manga asawa kag anak, hanggan kanda manga lapsag,

¹⁴ giniyahan Ispiritu Panginuun si Yahasyil matindugan ati kaibahan nida. Si Yahasyil anak ni Sakaryas. Si Sakaryas anak ni Binaya. Si Binaya anak ni Yiil. Ag si Yiil, anak ni Matanyas, usa ka Libita ag linahi ni Asap.

¹⁵ Magkun si Yahasyil, “Patingi kawu Hari Husapat, ag tanan kamu pag mag-uli sa Huda ag Hirusalim! Inda ti pagsabihun Panginuun sa kanyu, ‘Danga kamu magkadala ngatay magpanlubay dahil sa pagkayamu manga sundalu inda, dahil balaw kamu ti manlaban sa kanda nu unman ti Diyus.

¹⁶ Aldaw, atihan niya sida. Makitan niyu sida manukad sa turukadan Sis, sa suru luung atabug sa pangawakawaan Hirwil.

¹⁷ Balaw yi kailangan manlaban waya kamu. Pag-alistu lang kamu ag pagpakarig-un, bantayi niyu ti panalu buwatun Panginuun para sa kanyu. Kamu pag manga taga Huda ag taga Hirusalim, danga kamu magkadala ngatay magpanlubay. Atubanga niyu sida aldaw ag ti Panginuun manguyug sa kanyu.’ ”

¹⁸ Linmuhud si Husapat ag ti tanan taga Huda ag taga Hirusalim sa pagsamba sa Panginuun.

¹⁹ Pagkatapus, tinmindug ti iba manga Libita ginan sa manga magtal-anakan nida ni Kuhat ni Kura ag nagdayaw sa Panginuun, ti Diyus Israil, sa mabaskug gid pag busis.

²⁰ Pagka nasurip, nag-atag yi sida ni Husapat sa pangawakawaan Tikuwa. Habang maglakaw sida, pinmat-ung si Husapat ag magkun, “Patingihi niyu aku, kamu pag taga Huda ag taga Hirusalim! Pagpaniwala kamu sa Panginuun niyu Diyus, ag bumaliw marig-un kamu. Pagsarig kamu sa kay manga purupita, ag bumaliw marig-un kamu. Pagpaniwala kamu sa kay purupita, ag manalu kamu.”

²¹ Pagkalawuy niya nahampang ti manga tawu, nagpili siya manga manugkanta umuna sa kanda ag manganta sa Panginuun hampay dayawun siya sa kay banal pag nabubut-un. Inda kanda pag kantahun: “Pasalamatan ti Panginuun dahil kay pagmahal unman may katapusan.”

²² Pagka nag-umpisa sida kumanta manga pagdayaw, pinalaban Panginuun ti manga Muabita, Amunita ag manga taga Bantud Siir.

²³ Ginira manga Amunita ag Muabita ti manga sundalu manga taga Bantud Siir ag rinuris sida tanan. Pagkalawuy nida manmatay, sida maan ti nanmaratyan.

²⁴ Pagras-ug manga sundalu Huda sa abwat baliwa pangawakawaan, nakitan nida ti manga bangkay kalaban nida mabugtangan sa daga. Unman una di usa ti buhi.

²⁵ Nakan inatihan inda ni Husapat ag manga tawuhan niya, ag bin-ul kanda manga kasiyunan. Mayamu kanda nab-ul pag manga kagamitan, manga rutay, ag iba waya pag mahalaga pag bagay harus udyi nida madara. Inaput sida tulu ka sirang sa pagbuul dahil sa masyadu mayamu pag manga kasiyunan.

²⁶ Pagka sa ikap-at pag sirang nagtipun sida sa Karatagan Biraka nu naan nagdayaw sida sa Panginuun. Inda kay dahilan nu hayga pag-ingarnan inda Karatagan Biraka tugka taynguna.

²⁷ Pagkatapus, nagbalik sida sa Hirusalim pagpangunahan ni Husapat. Masulung sida dahil pinapanalu sida Panginuun sa kanda manga kalaban.

²⁸ Pagras-ug nida sa Hirusalim, nagdiritsu sida sa Balay Diyus Panginuun, magpatunug manga alpa, lira, ag manga budyung.

²⁹ Pagka nabaritaan tanan kaharian nu kabitay linmaban ti Panginuun sa manga kalaban Israil, nadala sida sa Diyus.

³⁰ Nakan may kahusayan ti kaharian ni Husapat dahil pinakan-an siya niya Diyus kahusayan sa kay palibut.

Ti Katapusan Paghari ni Husapat

³¹ Tida kay maghari ni Husapat sa Huda. Siya 35 ka timpu kay idad pagka naghari. Sa Hirusalim siya nangulian, ag naghari siya sa sulud 25 ka timpu. Kay ina si Asuba kay anak ni Silhi.

³² Sinunud niya ti pangabuhi niya ama si Asa ag unman niya kinalimtan ti mayad pagpangabuhi. Matadlung kay binwat sa pamantay Panginuun.

³³ Dapat unman niya bin-ul ti manga simbahan sa abwat pag manga rugar, ag ti manga tawu unman diman waya nagbaliw matinupadun sa pagsunud sa Diyus nida manga ginurang.

³⁴ Ti iba waya ka tultulanun sa maghari ni Husapat, ginan sa umpisa tugka sa katapusan nakasurat sa Manga Ribru ni Hihu kay anak ni Hanani, kuntay kaibahan sa kasuratan tultulanun manga hari sa Huda.

³⁵ Dapat sa uryan pag bahagi maghari ni Husapat sa Huda, napausa siya sa kan Hari Ahasiyas sa Israil, usa ka daut pag tawu.

³⁶ Nagkasundu sida mamabwat manga barku pan-ahinti. Ipinabwat nida inda sa Isyun Gibir.

³⁷ Magkun si Iliyisir kay anak ni Dudabahu taga Marisa sa kan Husapat, “Dahil nagpabliwa kawu kan Ahasiyas, dautun Panginuun ti manga ipinabwat niyu.” Nakan naguba ti manga barku ag unman inda napakinabangan hampay man-ahinti.