2 Krunika 2 - Hanunuu

Ti Pag-alistu sa Pagpatindug Balay Diyus

¹ Naggayak si Sulumun mamatindug Balay Diyus, para sa kadayawan Panginuun, hanggan balay para sa kay sadili.

² Nagtalaga siya 70,000 manug-akut, 80,000 manugbagasbas manga batu sa kabantudan, ag 3,600 tagapatigayun.

³ Nagpadara si Sulumun kaindaay pag tultulanun sa kan Hari Hiram taga Tiru: “Padaran-i aku manga kayu sidru parihu sa ipinadara nimu sa kang ama sa kan Dabid katpung nagpatindug siya kay balay.

⁴ Mamatindug aku Balay Diyus para sa kadayawan Panginuun niku Diyus. Bumaliw banal inda pag rugar pagsunugan mabanglu pag kamangyan ag pirmi may handug banal pag tinapay. Sitay diman pag mamakaun manga handug pagsunugun kada surip ag yabi, una sa manga Sirang Pamahari, sa Pista Lapus Lati ag sa iba waya pag manga pista sa ikadayaw sa Panginuun nimi Diyus. Inda pag surundanun kailangan tupadun manga taga Israil tugka aban.

⁵ “Pinakadaka gid pag Balay Diyus ti ipatindug niku, dahil makamaskihan kanmi Diyus kaysa iba pag manga diyus.

⁶ Dapat si unu nguna ti may kaya pumatindug Balay Diyus para sa kanya? Dahil unman ngani siya magkang-ud sa langit, una sa pinakaabwat pag kalangitan. Nakan si unu nguna aku hampay pumatindug Balay Diyus para sa kanya? Ti maipatindug lang niku ti rugar pagsunugan manga handug sa kay kadayawan.

⁷ Nakan taynguna, padaran-i nimu aku tawu madunung magbuwat human sa gintu, pilak, galang, baul, ag mahusay magbuwat pisahan kulay dungun, marara ag malatuy, hanggan marutum, ag mahusay magkurti. Manarabahu siya kaibahan niku manga mahusay pag manugtarabahu taga Huda hanggan taga Hirusalim, ti pinili niku ama ni Dabid.

⁸ Padaran-i diman nimu aku manga kayu sidru, sipris, ag algum ginan sa Libanun, dahil alam niku mahusay kanmu manga tawuhan magpukan kayu. Mangawat di ti manga tawuhan niku sa manga tawuhan nimu

⁹ sa pag-alistu mayamu gid pag kayu, dahil daka ag marinu pag Balay Diyus ti ipatindug niku.

¹⁰ Bayadan niku kanmu manga manugpukan kayu manga 60,000 saku tirigu, 60,000 saku sibada, 110,000 galun intus, ag 110,000 galun lana ulibu.”

¹¹ Inda kay isinagut ni Hari Hiram taga Tiru sa surat tabug sa kan Sulumun: “Dahil pagmahalun Panginuun kay manga nasakupan, binwat niya kawu hari nida.

¹² Dayawun ti Panginuun, ti Diyus Israil, ti naglalang langit ag daga! Pinakan-an niya si Hari Dabid matinudukun pag anak, punu kaalaman ag pan-intindi, ti mamatindug Balay Diyus para sa Panginuun hanggan balay para sa kay sadili.

¹³ “Ipadara niku sa kanmu si Huram Abi, usa ka mahusay pag manugtarabahu.

¹⁴ Kay ina ginan sa Dan, kay ama ginan sa Tiru. Anad siya magbuwat manga bagay ginan sa gintu, pilak, galang, baul, batu, ag kayu, hanggan magbuwat pisahan kulay dungun, maragang, malatuy ag pisahan linu. Antigu siya sa una hintay pag kalasi pangurti, ag makabuwat siya una hintay pag kalasi histuda kurti ti ipabwat sa kanya. Manarabahu siya kaibahan nimu manga manugbuwat hanggan manga manugbuwat pinili nimu kagalang-galang pag ama si Dabid.

¹⁵ “Taynguna, kagalang-galang Sulumun, ipadara nimu sa kanmi ti tirigu, sibada, intus, ag lana ulibu kanmu itinaratu,

¹⁶ ag mamukan kami kayu sa Libanun kanmu kailanganun. Pagkatapus, gapusun nimi ga barsa ipayataw sa dagat atabug sa Hupi. Kamu yi ti pagdara inda sa Hirusalim.”

¹⁷ Binilang ni Sulumun ti tanan day-uhan sa Israil parihu sa binwat niya ama ni Dabid, 153,600 sida kay kayamu.

¹⁸ Ti 70,000 sa kanda binwat niya manug-akut, ti 80,000 manugbagasbas manga batu sa kabantudan, ag ti 3,600 tagapatigayun magpanguna sa manga manugtarabahu.