2 Krunika 19 - Hanunuu

¹ Pagka nagbalik si Husapat ti hari sa Huda sa balay hari niya sa Hirusalim ribri di,

² sinulang siya ni Hihu kay anak ni Hanani ag magkun, “Hayga inawatan nimu ti daut ag kinaibgan ti maglaban sa Panginuun? Dahil sitay, nagalit ti Panginuun sa kanmu.

³ Dapat may imaw di mayad sa kanmu. Bin-ul nimu sa Huda ti manga tulduk tanda diyusa si Asira ag sinikap nimu sumunud sa Diyus.”

Nagpili si Husapat manga Manughusay

⁴ Mag-uli si Husapat sa Hirusalim, dapat pag-atihun niya ti manga tawu ginan sa Biirsiba tugka sa mabantud Ipraim hampay bagyatun sida bumabalik sa Panginuun, ti Diyus nida manga ginurang.

⁵ Nagpauli siya manga manughusay sa kada may alad batu pag banwa sa Huda.

⁶ Magkun siya sa kanda, “Pag-isip dapu kamu kaayad bag-u kamu magpihu dahil balaw kamu mamihu para sa tawu nu unman para sa Panginuun, imaw siya ti asan-sakanyu sa kada kamu mamakaun pagpihu.

⁷ Paggalang kamu sa Panginuun, ag pagpihu kamu matadlung dahil balaw pagpasnuan Panginuun nita Diyus ti unman may katadlungan, ti maghusay may pagkilingan, ag ti magtanggap suhul.”

⁸ Nagpauli diman sa Hirusalim si Husapat manga Libita, manga manughandug, ag manga takinan manga magtal-anakan manga Israilita sa pagpatingi sa manga kasaba may kalabutan sa kasuguan Panginuun ag sa paghusay sa manga irisgan. Ag sida nangulian sa Hirusalim.

⁹ Inda ti sugu niya sa kanda: “Kailangan pagsirbi kamu matinupadun ag buu tagipusuun, may paggalang sa Panginuun.

¹⁰ Nu may kasaba rumas-ug sa kanyu ginan sa manga kasimanwa niyu sa una naan pag banwa may kalabutan sa pagmatay ngatay paglabag sa manga sugu ag manga surundanun, pasandami niyu sida danga magkasala sa Panginuun, dahil nu unman, idugang niya kay pangagalit sa kanyu ag sa kanda. Buwata niyu inda hampay balaw kamu sumalan.

¹¹ Nu may manga kasaba tungkul sa Panginuun unman niyu magkahusay, si Amarya pangulu manughandug imaw ti humusay inda. Ag nu may kasaba tungkul sa gubirnu unman niyu magkahusay, si Sibadyas kay anak ni Ismail ag takinan lahi ni Huda imaw ti humusay inda. Ti manga Libita mangawat sa kanyu hampay masiguradu maipalantag ti katadlungan. Pagpakarig-un kamu sa pagbuwat kanyu katungkulan. Mana giyahan Panginuun ti manga tawu magbuwat matadlung.”