2 Krunika 18 - Hanunuu

Pinasandaman ni Mikaya si Akab

¹ Nagyaman ag nagbaliw bantug yi si Husapat, ag nagbaliw mayad kay pakiusa sa kan Hari Akab sa Israil dahil sa pag-asawa niya katawuhan sa kanda magtal-anakan.

² Pagkalawuy pira ka timpu, nanabang si Husapat sa kan Akab sa Samarya. Nangiyaw si Akab mayamu manga karanidu ag baka sa karan-an para kan Husapat ag sa kay manga tawuhan. Ag ginarya niya si Husapat kuntay girahun ti Ramut Gilyad.

³ Magkun siya kan Husapat, “Manguyug aw kawu sa kanmi sa paglaban sa Ramut Gilyad?” Nagsagut si Husapat, “Alistu aku kumuyug sa kanmu, ag alistu aku ipagamit sa kanmu kang manga sundalu. Hu, manguyug kami sa kanyu sa paglaban.

⁴ Dapat paingan-un dap nita ti Panginuun nu unu kay sabihun.”

⁵ Nakan ipinatawag ni Akab ti manga purupita — 400 sida tanan, ag pinaingana, “Atag aw kami sa Ramut Gilyad hampay manlaban ngatay danga?” Sinmagut sida, “Sigi, paglakaw kamu, dahil papanaluhun kamu Panginuun!”

⁶ Dapat nagpaingana si Husapat, “Udyi aw may iba waya purupita Panginuun kanta mapaingan-an?”

⁷ Sinmagut si Akab kan Husapat, “May usa waya mahimu nita mapaingan-an nu unu ti sabihun Panginuun — si Mikaya kay anak ni Imla. Dapat magkagalit aku sa kanya dahil unman siya may marinu pag hula tungkul sa kangku nu unman pasay daut.” Sinmagut si Husapat, “Balaw kawu kailangan mamagaw katunda.”

⁸ Nakan ipinatawag ni Akab ti usa sa kay manga may kangaranan ag sinabihan, “Daran-a kadali niyu sitay si Mikaya kay anak ni Imla.”

⁹ Taynguna, sida ni Hari Akab taga Israil ag si Hari Husapat taga Huda, nakasulung kanda rutay sa pagkahari, matukawan sa kanda turukawan hari sa atubangan giriukan ati baliwa sa puwirtahan banwa Samarya, ag magpatingi sida sa pagsabihun manga purupita.

¹⁰ Si Sidikyas kay anak ni Kanaana, nagbuwat sungay baul. Magkun siya, “Inda ti pagsabihun Panginuun: ‘Sa panab-anan inda pag sungay, rurisun nimu, Hari Akab, ti manga Aramiyu tugka sa matabu sida.’ ”

¹¹ Kainda diman ti pagsabihun tanan purupita. Magkun sida, “Giraha nimu ti Ramut Gilyad, Hari Akab, ag manalu kawu, dahil ipinakaun inda sa kanmu Panginuun”

¹² Nakan ti manga sinigu sa pagbuul kan Mikaya magsabi sa kanya, “Ti tanan purupita pararihu kay pagsabihun manalu ti hari, nakan katida diman kanmu sabihun.”

¹³ Dapat magkun si Mikaya, “Magsumpa aku sa buhi pag Panginuun niku Diyus kuntay sabihun lang niku ti pag-ipasabi niya sa kangku.”

¹⁴ Pagras-ug ni Mikaya sa kan Hari Akab nagpaingana ti hari sa kanya, “Mikaya, girahun aw nimi ti Ramut Gilyad ngatay danga?” Sinmagut si Mikaya, “Giraha niyu ag manalu kamu, dahil ipakaun inda sa kanyu.”

¹⁵ Dapat magkun ti hari kan Mikaya, “Pira ka bisis pasumpaun kawu kuntay sabihun nimu kay tutuu sa ngaran Panginuun?”

¹⁶ Nakan magkun si Mikaya, “Nakitan niku sa pangakakitun mawayakan ti manga Israilita sa manga kabantudan parihu sa manga karanidu unman may manugbantay, ag magkun ti Panginuun, ‘Inda pag manga tawu unman yi may takinan. Pauliun sida sa mahusay.’ ”

¹⁷ Magkun si Akab sa kan Husapat, “Bukun aw pagsabihan yi kawu niku unman siya may marinu paghula tungkul sa kangku nu unman lunsay kadautan lang?”

¹⁸ Magkun waya si Mikaya, “Patingihi ti tultulanun Panginuun! Nakitan niku ti Panginuun matukawan sa kay tukawan, may matindugan manga taga langit pag manga sundalu sa kay wala ag sikun.

¹⁹ Ag magkun ti Panginuun, ‘Si unu ti bumagyat kan Hari Akab kuntay girahun ti Ramut Gilyad hampay mamatay siya ati?’ Tuhay-tuhay ti sagut manga taga langit pag sundalu.

²⁰ May ispiritu nagpakarani sa Panginuun ag magkun, ‘Aku ti bumagyat sa kanya.’ Nagpaingana ti Panginuun, ‘Sa kabitay pag paraan?’

²¹ Sinmagut siya, ‘Atag aku ag pabagawun niku sa kapudilan ti manga purupita ni Akab.’ Magkun ti Panginuun, ‘Paglakaw kawu ag buwata tida. Manalu kawu sa pag bagyat sa kanya.’ ”

²² Pagkatapus, sinabi rargu ni Mikaya, “Pinadaran-an Panginuun kanmu manga purupita Ispiritu nagpabagaw sa kanda kapudilan. Pinahintulutan Panginuun matalu kawu.”

²³ Nagpakarani rargu si Sidikyas kan Mikaya ag sinampal siya. Sinabi rargu ni Sidikyas, “Kabitay nimu masabi ti Ispiritu Panginuun nighit sa kangku ag nanpakihampang sa kanmu?”

²⁴ Sinmagut si Mikaya, “Maalaman nimu inda sa sirang matalu kamu sa labanan ag patagu kawu sa pinakasulud pag sulud-sulud balay.”

²⁵ Nagsugu rargu si Akab, “Dakpa niyu si Mikaya ag daraha pabalik kan Amun banwa ag kan Huas sa kang anak.

²⁶ Ag sabihun niyu sa kanda kuntay nagsugu aku pirisuhun inda pag tawu. Tinapay ag danum lang ti ipakaun sa kanya tugka makabalik aku ribri ginan sa labanan.”

²⁷ Magkun si Mikaya, “Nu makabalik kawu unman nangyari sa kanmu, kay ibug sabihun unman nagbagaw ti Panginuun sa panab-anan niku.” Magkun si Mikaya sa tanan tawu ati, “Tandai niyu kang sinabi!”

Namatay si Akab

²⁸ Nakan nan-gira sa Ramut Gilyad si Akab hari sa Israil ag si Husapat hari sa Huda.

²⁹ Magkun si Akab kan Husapat, “Sa udas labanan balaw aku mamakilala kuntay aku ti hari, dapat kawu pagsulung kanmu rutay pagkahari.” Nakan nagpabalhingu ti hari sa Israil, ag nanlaban sida.

³⁰ Taynguna, nagsugu ti hari taga Aram sa kumandir niya manga manugkalisa, “Danga niyu pag giraha una si unu, nu unman ti hari lang sa Israil.”

³¹ Pagka nakitan manga kumandir manga manugkalisa si Husapat, ginira nida inda. Dapat nanhagad awat sa Panginuun si Husapat, ag inawatan siya ag ipinakarayu sa manga kalaban niya.

³² Pagka naalaman manga kumandir manga manugkalisa balaw maaw siya ti hari sa Israil, pinmat-ung sida sa paglagas sa kanya.

³³ Dapat habang magpana ti usa ka sundalu Aramiyu sa manga sundalu Israil, tinamaan niya ti hari Israil sa tab-anan niya panangga sa dubdub. Magkun si Akab sa tagadara niya kalisa, “Ipakarayu nimu aku sa labanan! Dahil nabiyagan aku.”

³⁴ Masyadu ti labanan pagka ati pag sirang, ag ti hari Israil maslandigan wadi sa kay kalisa maatubangan sa manga Aramiyu tugka malambung. Ag pagka mag-isalup yi ti init, namatay siya.