2 Krunika 17 - Hanunuu

Si Husapat Hari sa Huda

¹ Ti nag-ilis kan Asa bilang hari kay anak niya si Husapat. Pinarig-un ni Husapat ti kaharian niya hampay may laban siya sa Israil.

² Nagpauli siya manga sundalu ti tanan may alad batu pag manga banwa sa Huda, ag nagpauli diman siya manga kampu sundalu sa daga Huda ag sa manga banwa Ipraim nasakup niya ama ni Asa.

³ Inibahan Panginuun si Husapat dahil sa un-an pag manga timpu niya maghari, sinunud niya ti pangabuhi niya ginurang ni Dabid. Balaw siya nagdangup sa manga histuda ni Baal

⁴ bagkus nagdangup siya sa Diyus niya ama, ag sinmunud sa kay kasuguan kaysa sumunud sa ugali manga taga Israil.

⁵ Pinarig-un Panginuun ti kaharian sa sirung niya pagdumara. Nagdara manga pamakaun ti tanan taga Huda sa kanya, nakan nagyaman gid siya ag nagbaliw bantug.

⁶ Matinupadun siya sa magsunud sa manga palakaw Panginuun. Ipinadaut niya ti manga simbahan sa abwat pag manga rugar hanggan ti manga tulduk tanda diyusa si Asira.

⁷ Pagka sa ikatlu pag timpu niya maghari, dinara niya kay manga may kangaranan sida ni Bin Hail, ni Ubadyas, ni Sakaryas, ni Natanyil, ag ni Mikaya hampay manudlu sa manga banwa Huda.

⁸ Kaibahan nida ti iba pag manga Libita sida ni Simaya, Nitanyas, Sibadyas, Asahil, Simiramut, Hihunatan, Aduniyas, Tubyas, Tub Aduniyas, hanggan ti manga manughandug sida ni Ilisama ni Hihuram.

⁹ Dinara nida ti Ribru Kasuguan Panginuun ag linibut nida ti tanan banwa Huda ag nanudlu sa manga tawu.

¹⁰ Ipinahintulut Panginuun madala sa kanya ti tanan kaharian sa sangput Huda, nakan una di usa unman may nanlaban kan Husapat.

¹¹ Ti iba pag manga Pilistiyu nandara kan Husapat manga pamakaun ag pilak bilang buhis, ti manga taga Arabya nandara sa kanya 7,700 ka karanidu ag 7,700 ka kambing.

¹² Nakan nagbaliw lalu makapangyarihan waya gid si Husapat. Nagpatindug siya sa Huda mapag-un pag manga palalan-iban ag manga banwa palaulian manga haramnuan.

¹³ Mayamu panustus sa tuhay-tuhay pag pangailangan ti tinipun niya sa manga banwa Huda. Nanpauli diman siya maraisug pag manga sundalu sa Hirusalim.

¹⁴ Kay manga sundalu ilinista angay sa kanda manga magtal-anakan. Ginan sa lahi ni Huda, si Adnak ti kumandir sa 300,000 maraisug pag manga sundalu ginurupu sa tig 1,000.

¹⁵ Ti dinmasun sa kanya si Hihuhanan kumandir sa 280,000 sundalu.

¹⁶ Dinmasun si Amasiyas kay anak ni Sikri, kumandir sa 200,000 maraisug pag manga sundalu. Nagbuluntad siya para sa buruwatun Panginuun.

¹⁷ Ginan sa lahi ni Binhamin: si Ilyada, usa ka maisug pag tawu, ti kumandir sa 200,000 sundalu. Inda pag manga sundalu may manga panangga ag manga pamana.

¹⁸ Kay dinmasun sa kanya si Hihusabad kumandir sa 180,000 ka armadu manga sundalu.

¹⁹ Sida ti manga nanirbi sa kan Hari Husapat tuhay waya sa manga sundalu kay ipinauli sa tanan may alad batu banwa Huda.