2 Krunika 16 - Hanunuu

Ti Uryan Timpu ni Asa

¹ Pagka ika-36 ka timpu kay maghari ni Asa, ginira ni Hari Baasa taga Israil ti Huda. Ag sinangput niya alad batu ti Rama hampay unman may makalwas ngatay makasulud sa magkaakupahan ni Asa taga Huda.

² Ipinab-ul ni Asa ti manga pilak ag manga gintu sa manga haramnuan sa Balay Diyus Panginuun hanggan balay hari. Ag ipinadara niya inda sa kan Hari Bin Hadad Aram ati sa Damasku nu naan siya pag mag-uli. Inda kay tultulanun ni Asa kan Bin Hadad:

³ Inda ti itinultul ni Asa sa kan Bin Hadad: “Mamwat kita kasunduan mangarampihan kita, parihu sa binwat nita manga ginurang. Tanggapa nimu ti ipinadara niku pilak ag gintu, ag paghagadun niku apasi yi nimu kanmu magkampi kan Hari Baasa Israil hampay pabay-anan yi niya aku.”

⁴ Nagpayag si Bin Hadad sa paghagadun ni Hari Asa, ag sinugu niya ti manga kumandir niya manga sundalu hampay girahun ti manga banwa Israil. Naagaw nida ti Ihun, Dan, Abil Mayim, ag ti tanan banwa sa Niptali pagbuwatun nida burudigahan.

⁵ Pagka nadnugan inda ni Baasa, ipinaapas niya ti pagpatindug alad batu sa Rama.

⁶ Pagkatapus, nagsugu si Hari Asa sa tanan lalaki sa Huda bul-a nida ti manga batu hanggan ti manga batang ginamit ni Baasa sa pagbuwat alad batu sa Rama. Ginamit inda ni Hari Asa sa pagbuwat alad batu sa Giba ag Mispa.

⁷ Pagka sa tunda pag panahun, nag-atag si Purupita Hanani kan Hari Asa sa Huda ag magkun sa kanya, “Dahil nagsarig kawu sa hari taga Aram ag balaw sa Panginuun nimu Diyus, naduraan yi kamu udas kuntay maruris ti manga sundalu hari taga Aram.

⁸ Magkahimatun-an di aw nimu nu unu ti nangyari sa manga taga Itiyupya ag taga Libya, kanda manga sundalu, manga kalisa, ag manga manugkabayu masyadu mayamu? Pagka ati pag panahun, nagsarig kawu sa Panginuun, ag ipinatalu niya sida sa kanyu.

⁹ Dahil magbantay gid ti Panginuun sa buu kalibutan hampay pabaskugun ti manga tawu matinupadun sa kanya. Kabuangan kanmu binwat! Nakan kainda ginan pirmi yi kawu manlaban.”

¹⁰ Dahil siti, masyadu nagalit gid si Asa sa purupita, nakan inda kay ipinapirisu. Ag sa tida diman pag udas, nag-umpisa pinakurianan ni Asa kay iba niya manga nasakupan.

¹¹ Ti manga tultulanun tungkul sa kay maghari ni Asa ginan sa umpisa tugka sa katapusan nakasurat sa kasuratan tultulanun manga Hari sa Huda ag Israil.

¹² Pagka ika-39 ka timpu kay maghari ni Asa, nag-agwanta siya sa kay karamdaman sa lulud. Una masyadu yi kay karamdaman, unman siya naghagad awat sa Panginuun nu unman sa manga manugbulung.

¹³ Namatay siya katpung ika-41 ka timpu niya maghari.

¹⁴ Ilinbung siya sa lulubngan kay ipinabwat niya para sa kay sadili ati sa Banwa ni Dabid. Ipinauli siya sa kabaung may tuhay-tuhay pag manga pamanglu, ag namagba ti manga tawu daka gid pag apuy sa paggalang sa kanya.