2 Krunika 15 - Hanunuu

Ti manga Pagbag-u Binwat ni Asa

¹ Sinuldan Ispiritu Diyus si Asariyas kay anak ni Ubid.

² Napasampak siya kan Asa ag magkun, “Patingihi niyu aku Hari Asa, hanggan kamu tanan pag taga Huda ag taga Binhamin. Pumirmaminti ti Panginuun sa kanyu habang pirmaminti kamu sa kanya. Nu mandangup kamu sa kanya, awatan niya kamu. Dapat nu patlikudan niyu siya, patlikudan waydi niya kamu.

³ Sa kadugayun pag panahun nangabuhi ti manga taga Israil unman may tutuu pag Diyus, unman may manga manughandug magtudlu sa kanda, ag unman may kasuguan.

⁴ Dapat sa kanda kakurian, nagdangup sida sa Panginuun, ti Diyus Israil, ag inawatan niya sida.

⁵ Sa ati pag udas, mahawag ti maglakaw dahil magkaguluhan ti manga tawu.

⁶ Maglalabanan ti manga nasyun hanggan ti manga banwa, dahil pinagulu sida Diyus sa panab-anan tuhay-tuhay pag manga kakurian.

⁷ Dapat kamu waydi, pagpakarig-un kamu, danga magpanlumuy, dahil kanyu manga binwat pirimyuhan.”

⁸ Pagka nadnugan ni Asa ti itinultul ni Asariyas kay anak ni Udid, nagmaisug siya. Bin-ul niya ti mayagting pag manga diyus-diyusan sa buu Huda hanggan Binhamin, ag sa manga banwa kay naagaw sa kabantudan Ipraim. Ipinahiwat niya ti handugan Panginuun asan sa atubangan sarakahan sa Balay Diyus Panginuun.

⁹ Pagkatapus, ipinatipun niya ti tanan nasakupan Huda ag Binhamin, hanggan ti manga nasakupan ginan sa Ipraim, Manasis, ag Simyun nangulian kaibahan nida. Mayamu ti napasalyu sa Huda ginan sa Israil pagka nakitan nida si Asa pag-ibahan Panginuun niya Diyus.

¹⁰ Nagtipun sida sa Hirusalim sa ikatlu pag bulan ika-15 pag timpu kay maghari ni Asa.

¹¹ Sa ati pag udas, naghandug sida sa Panginuun manga hayup naagaw nida ginan sa labanan — 700 baka, 7,000 karanidu hanggan kambing.

¹² Nagbuwat sida kasunduan kuntay mandangup sida sa Panginuun, ti Diyus nida manga ginurang, sa buu nida tagipusuun ag karadwa.

¹³ Una si unu ti balaw mandangup sa Panginuun, ti Diyus Israil, matyun, anak man ngatay gurangun, lalaki man ngatay babayi.

¹⁴ Nanaratu sida sa Panginuun sa mabaskug pag busis, may tapil huruyawan hanggan pagpatunug manga turumpita hanggan manga budyung.

¹⁵ Nagbaya gid ti tanan taga Huda dahil nanaratu sida buu tagipusuun. Nagdangup sida sa Diyus buluntad gid sa kanda tagipusuun, ag nakitan nida kay kaayadan. Pinakan-an sida Panginuun kahusayan sa kanda manga kalaban sa sangput.

¹⁶ Pinaighit diman ni Hari Asa kay idu si Maaka sa kay pagkarayna dahil nagbuwat siya mayagting pag tulduk tanda diyusa si Asira. Ipinaplud ni Asa inda pag tulduk ag ipinasib-ak, bag-u ipinasunug sa Luung Kidrun.

¹⁷ Una unman nadura ti tanan simbahan sa abwat pag manga rugar sa Israil, matinupadun di si Asa sa Panginuun sa buu niya buhi.

¹⁸ Dinara niya sa Balay Diyus ti manga pilak, manga gintu, ag ti iba waya pag manga bagay kay ihinandug hanggan niya ama sa Diyus.

¹⁹ Unman gid may kaguluhan tugka sa ika-35 pag timpu kay maghari ni Asa.