2 Krunika 14 - Hanunuu

¹ Namatay si Abyas ag ilinbung sa Banwa ni Dabid. Kay anak niya si Asa ti nag-ilis sa kanya bilang hari. Sa panahun maghari siya, nagkaimaw kahusayan sa Huda sa sulud sampulu ka timpu.

Kay Maghari ni Asa sa Huda

² Matadlung ti binwat ni Asa sa magbantay Panginuun kay Diyus niya.

³ Ipinadaut niya ti manga harandugan para sa manga diyus-diyusan hanggan ti manga simbahan sa abwat pag manga rugar. Ipinadaut diman niya ti aramirawan pag manga batu ag ipinaplud ti manga tulduk tanda diyusa si Asira.

⁴ Sinugu niya ti nasakupan Huda kuntay pagdangup sa Panginuun, ti Diyus nida manga ginurang, ag sa pagsunud sa kay manga kasuguan.

⁵ Ipinadaut niya ti manga simbahan sa abwat pag manga rugar ag ti manga harandugan pagsunugan manga kamangyan sa tanan banwa Huda. Nakan may kahusayan ti kaharian Huda sa panahun maghari ni Asa.

⁶ Ag habang mahusay, pinaulian ni Asa manga alad batu ti manga banwa Huda. Unman may nanlaban sa kanya sa inda pag udas, dahil pinakan-an siya Panginuun kahusayan.

⁷ Magkun si Asa sa manga taga Huda, “Papag-unun nita inda pag manga banwa, paulian manga alad batu sa kay sangput inda may manga bantayaw, manga sabian ag manga pangagad. Kita diman ti may apu inda pag daga, dahil nagpaawat kita sa Panginuun kanta Diyus. Ag pinakan-an niya kita kahusayan sa kanta manga kalaban sa sangput.” Nakan pinapag-un nida ti manga banwa ag nag-alwan sida.

⁸ May 300,000 ka sundalu si Asa manga taga Huda, armadu daraka pag manga panangga ag manga bangkaw. Ag may imaw diman siya 280,000 ka sundalu taga Binhamin, armadu dariit pag manga panangga ag manga pamana. Inda sida tanan manga maisug pag manga sundalu.

⁹ Naglakaw si Sira taga Itiyupya kaibahan ti mayamu pag sundalu niya hanggan ti 300 kalisa hampay girahun ti Huda. Nakaras-ug sida tugka sa Marisa.

¹⁰ Nighit diman si Asa hampay lumaban kan Sira. Napauli sida sa Karatagan Sipata arani sa Marisa.

¹¹ Pagkatapus, nandarangin si Asa sa Panginuun sa kay Diyus, “Panginuun, unman yi may iba waya makaawat sa manga tawu unman may kaya lumaban sa manga makapangyarihan nu unman kawu lang. Awati nimu kami, Panginuun kanmi Diyus, dahil magsarig kami sa kanmu, ag sa kanmu ngaran nag-ataytag kami laban sa siyun pag mayamu manga sundalu. Panginuun, kawu kanmi Diyus; danga pagpahintuluti manalu ti tawu laban sa kanmu.”

¹² Nakan tinalu Panginuun ti manga taga Itiyupya sa atubangan ni Asa ag manga taga Huda. Nagpinalalagiw ti manga taga Itiyupya,

¹³ ag linagas sida ni Asa ag niya manga sundalu tugka sa Girar. Mayamu gid ti nagkaramatay sa manga taga Itiyupya nakan udyi nida kaya lumaban waya. Tinalu sida Panginuun ag niya manga sundalu. Mayamu gid pag kasiyunan ti nabuul manga sundalu Huda.

¹⁴ Rinuris nida ti manga baryu sa sangput Girar, dahil ti manga mag-uli inda pinadala Panginuun. Bin-ul nida ti manga kasiyunan sa inda pag manga baryu dahil mayamu gid kanda manga kasiyunan.

¹⁵ Ginira diman nida ti manga kampu manga manugbantay manga hayup, ag bin-ul ti mayamu pag manga karanidu ag manga kambing, ag manga kamilyu. Bag-u, nagbalik sida sa Hirusalim.