2 Krunika 13 - Hanunuu

Kay Maghari ni Abyas sa Huda

¹ Naghari sa Huda si Abyas katpung ika-18 pag timpu kay maghari ni Hirubuam sa Israil.

² Sa Hirusalim siya pag nangulian, ag naghari siya sa sulud tulu ka timpu. Kay ina si Maaka kay anak ni Uryil taga Gibiya. Nanlalabanan sida ni Abyas ni Hirubuam.

³ Gumira si Abyas kaibahan ti 400,000 maraisug pag manga sundalu, ag nag-alistu waydi si Hirubuam 800,000 maraisug pag manga sundalu sa paglaban.

⁴ Pagras-ug nida ni Abyas sa ababa pag bahagi Ipraim, tinmindug si Abyas sa bantud Simaraim, ag nanringgit sa kan Hirubuam ag sa manga taga Israil, “Pagpatingi kamu sa kangku.

⁵ Unman aw niyu alam kuntay ti Panginuun, ti Diyus Israil, nagbuwat unman may katapusan pag kasunduan sa kan Dabid kuntay siya ag kay manga linahi ti humari sa Israil hanggan aban?

⁶ Dapat kawu Hirubuam kay anak ni Nabat naglaban sa kanmu amu sa kan Sulumun kay anak ni Dabid.

⁷ Nagkuyug sa kanmu ti unman may pulus pag manga tawu, ag maglaban sa kan Rihubuam, anak ni Sulumun, katpung anak waya si Rihubuam ag unman waya may nalakawan hanggan unman may kakayahan sa paglaban sa kanyu.

⁸ Bag-u taynguna gustu niyu kalabanun ti kaharian Panginuun pagdumarahan linahi ni Dabid. Magpadayaw kamu kuntay mayamu kanyu manga sundalu ag dara niyu ti manga gintu baka kay ipinabwat ni Hirubuam bilang kanyu manga diyus.

⁹ Pinaighit niyu ti manga manughandug Panginuun, kay lahi ni Aarun, ag ti manga Libita. Ag nagpili kamu kanyu sadili manga manughandug parihu sa pagbuwatun iba manga nasyun. Una si unu ti may tudu baka ag pitu ka karanidu mahimu yi itigana bilang manughandug sa kanyu balaw tutuu pag manga diyus.

¹⁰ “Dapat kami, ti Panginuun imaw kanmi Diyus, ag unman nimi siya binugyahan. Kanmi manga manughandug magsirbi sa Panginuun manga lahi ni Aarun, ag pag-awatan sida manga Libita.

¹¹ Kada surip ag yabi, maghandug sida sa Panginuun manga handug pagsunugun ag kamangyan. Magpauli sida tinapay sa lamisa pag baliwun malumpiyu. Ag kada yabi, pagsantikan nida ti manga sulul-an asan sa gintu pag manga palaulian. Pagtupadun nimi ti manga sugu Panginuun kanmi Diyus. Dapat kamu, binugyahan niyu siya.

¹² Ti Diyus kaibahan nimi; siya ti takinan nimi. Patunugun niya manga manughandug ti manga budyung nida sa pagpanguna sa kanmi sa paglaban sa kanyu. Manga nasakupan Israil, danga kamu magsalumpang laban sa Panginuun, ti Diyus niyu manga ginurang, dahil balaw gid kamu manalu.”

¹³ Habang magbagaw si Abyas, lihim nanugu si Hirubuam manga sundalu sa dayuan manga taga Huda hampay puutan sida.

¹⁴ Pagka nakitan manga taga Huda paggirahun yi sida sa dayuan ag sa atubangan, naghagad sida awat sa Panginuun. Pinatunug rargu manga manughandug ti manga budyung,

¹⁵ ag nagringgit mabisug ti manga taga Huda sa paggira. Sa kanda pagringgit, tinalu Diyus si Hirubuam ag ti manga sundalu Israil. Linagas sida ni Abyas ag manga sundalu taga Huda.

¹⁶ Nagpinalagiw sida, ag ipinakaun sida Diyus sa manga taga Huda.

¹⁷ Mayamu gid ti namatay ni Abyas ag niya manga tawuhun — 500,000 maisug pag manga sundalu Israil.

¹⁸ Nakan natalu manga taga Huda ti manga taga Israil sa inda pag labanan, dahil nagsarig sida sa Panginuun, ti Diyus nida manga ginurang.

¹⁹ Linagas ni Abyas si Hirubuam ag naagaw niya sa kanya ti manga banwa Bitil, Hisana, ag Iprun, ag hanggan ti manga baryu sa kay sangput inda.

²⁰ Unman yi gid mabawi ni Hirubuam kay kapangyarihan katpung udas ni Abyas, sa uryan pinarusahan siya Panginuun ag namatay siya.

²¹ Lalu waya gid nagbaliw makapangyarihan si Abyas. May 14 siya ka asawa ag 22 ka anak lalaki ag 16 ka anak babayi.

²² Ti iba waya ka tultulanun tungkul sa maghari ni Abyas, kay manga sinabi ag manga binwat, nakasurat sa tultulanun binuwat ni Purupita Idu.