2 Krunika 12 - Hanunuu

Ginira ni Hari Sisak ti Hirusalim

¹ Pagka marig-un yi kay maghari ni Rihubuam ag makapangyarihan yi siya, binugyahan niya ag buu Israil ti kasuguan Panginuun.

² Dahil unman sida matinupadun sa Panginuun, ginira ni Hari Sisak taga Ihiptu ti Hirusalim katpung ikalima pag timpu kay maghari ni Rihubuam.

³ May dara si Sisak 1,200 kalisa, 60,000 manugkabayu, ag masyadu mayamu manga sundalu, ti iba sa kanda ginan waya sa Libya, Sukut, ag Itiyupya.

⁴ Sinakup ni Sisak ti may alad batu pag manga banwa sa Huda ag nan-gira tugka sa Hirusalim.

⁵ Pagkatapus, nag-atag si Purupita Simaya sa kan Rihubuam ag sa manga takinan sa Huda nalagiw sa Hirusalim dahil sa dala sakan Sisak. Magkun si Simaya sa kanda, “Inda ti pagsabihun Panginuun: Dinayu niyu aku, nakan kainda pabay-anan niku kamu sa kan Sisak.”

⁶ Nagpanagunsirung ti hari hanggan ti manga takinan Israil. Magkun sida, “Matadlung ti Panginuun!”

⁷ Pagka nakitan Panginuun nagpanagunsirung sida, magkun ti Panginuun sa panab-anan ni Simaya, “Dahil nagpanagunsirung sida, balaw niku sida rurisun ag balaw dumugay palpasan niku sida. Unman niku ibuhus kang pangagalit sa Hirusalim sa panab-anan ni Sisak.

⁸ Dapat ipasakup niku sida sa kanya hampay maalaman nida mas mayad ti magsirbi sa kangku kaysa magsirbi sa manga makababaw daga pag manga hari.”

⁹ Pagka ginira ni Hari Sisak taga Ihiptu ti Hirusalim, pinakabuul niya ti manga kayamanan sa Balay Diyus Panginuun hanggan sa balay hari. Bin-ul niya ti tanan, hanggan yi ti manga panangga gintu ipinabwat ni Sulumun.

¹⁰ Nakan nagpabuwat si Hari Rihubuam manga panangga galang kay ilis sa ati pag manga panangga, ag inintirga niya inda sa manga may kangaranan pag manga guwardiya sa sabian balay hari.

¹¹ Nu mangatag ti hari sa Balay Diyus Panginuun, magkuyug sa kanya ti manga guwardiya dara tunda pag manga panangga, pagkatapus pag-iuli maan nida inda sa kanda sulud-sulud.

¹² Dahil nagpanagunsirung si Rihubuam, nadura ti pangagalit Panginuun sa kanya, ag balaw siya nidamhak lubus. Sa tutuu lang, may nasawad waya maan kaayadan sa Huda.

¹³ Nagrig-un kay magpanguna ni Hari Rihubuam ag nagparargu siya maghari ati sa Hirusalim. Kay idad 41 pagka naghari siya, ag naghari siya 17 ka timpu sa Hirusalim, ti banwa pinili Panginuun sa tanan linahi Israil nu naan pagdayawun siya. Kay ngaran ina ni Rihubuam si Naama, usa ka Amunita.

¹⁴ Dapat nagbuwat kadautan si Rihubuam dahil unman siya naghingbut dumangup sa Panginuun.

¹⁵ Ti tultulanun tungkul sa maghari ni Rihubuam ginan sa umpisa tugka sa katapusan nakasurat sa libru ni Purupita Simaya ag libru ni Purupita Idu, listahan manga linahi. Pirmi yi lang kaybi maglalabanan si Rihubuam ag si Hirubuam.

¹⁶ Pagka namatay si Rihubuam, ilinbung siya sa Banwa ni Dabid. Ag si Abyas kay anak imaw ti kailis niya bilang hari.