2 Krunika 11 - Hanunuu

Pinasandaman ni Simaya si Rihubuam

¹ Pagkaras-ug ni Rihubuam sa Hirusalim, tinipun niya ti manga mahusay pag manga sundalu manga linahi nida ni Huda ni Binhamin. Nakatipun siya 180,000 ka sundalu, manlaban sa nasakupan Israil hampay bawiun kay kaharian.

² Dapat magkun ti Panginuun sa kay manugsirbi sa kan Simaya,

³ “Sabiha nimu sa kan Hari Rihubuam taga Huda, kay anak ni Sulumun, hanggan sa tanan Israilita sa Huda ag Binhamin

⁴ kuntay aku, ti Panginuun, magkumun: ‘Danga kamu manggira sa kanyu kadugu. Pag-uli kamu, dahil kagustuhan niku inda tanan.’ ” Sinmunud sida sa Panginuun ag balaw nida ginira si Hirubuam.

⁵ Napatayak si Rihubuam sa Hirusalim ag pinarig-un niya inda pag manga banwa hampay maalagaan ti Huda:

⁶ Bitlihim, Itam, Tikwa,

⁷ Bit Sur, Suku, Adulam,

⁸ Gat, Marisa, Sip,

⁹ Aduraim, Lakis, Asika,

¹⁰ Sura, Ayalun, ag Hibrun. Inda ti may alad batu pag manga banwa sa Huda ag Binhamin.

¹¹ Kinaayad niya ti manga palalan-iban ag pinaulian inda manga kumandir. Pinakan-an niya sida manga karan-unun, lana ulibu ag intus.

¹² Pinaulian niya ti manga banwa manga panangga ag manga bangkaw bilang dugang panagang. Nakan ti Huda ag ti Binhamin pirmaminti sakup niya.

¹³ Dapat ti manga manughandug ag manga Libita mag-uli sa tuhay-tuhay pag bahagi Israil ay napakampi sa kan Rihubuam.

¹⁴ Ti manga linahi inda ni Libi tinayakan kanda balay ag daga ag napasalyu sa Huda ag Hirusalim dahil binugyahan sida ni Hirubuam ag niya manga anak bilang manga manughandug Panginuun.

¹⁵ Nagtigana si Hirubuam kay sadili manga manughandug sa manga simbahan sa abwat pag manga rugar, nu naan ati pag magsamba sida sa kanda manga diyus-diyusan kambing ag baka ipinabwat ni Hirubuam.

¹⁶ Ti manga Israilita sa tuhay-tuhay pag bahagi Israil ti may gustu mandangup sa Panginuun, ti Diyus Israil, dinmasun sa manga lahi ni Libi sa Hirusalim, hampay makahandug sida manga handug sa Panginuun, ti Diyus nida manga ginurang.

¹⁷ Pinarig-un nida ti kaharian Huda, ag sa sulud tulu ka timpu inawatan nida si Rihubuam kay anak ni Sulumun. Sinmunud sida sa Panginuun parihu sa kanda binwat katpung maghari sida ni Dabid ni Sulumun.

Ti Magtal-anakan ni Rihubuam

¹⁸ Inasawa ni Rihubuam si Mahalat, kay anak ni Hirimut ag anak ni Dabid ag kay ina si Abihail kay anak ni Ilyab ag umput ni Isai.

¹⁹ Si Rihubuam ag si Mahalat may tulu ka anak lalaki sida ni Hius, Samarya, ag Saham.

²⁰ Inasawa diman ni Rihubuam si Maaka kay anak ni Absalum. Kanda manga anak lalaki sida ni Abyas, Atay, Sisa, ag Silumit.

²¹ Mas pagmahalun ni Rihubuam si Maaka kaysa iba niya manga asawa. May 18 ka asawa si Rihubuam bag-u may 60 waya gid siya ka asawa panawuhun. Ag kay manga anak 28 ka lalaki ag 60 ka babayi.

²² Kay anak niya sa kan Maaka si Abyas ti pinili niya bumaliw takinan niya manga anak pirinsipi, kay kahulugan si Abyas ti umilis sa kanya bilang hari.

²³ Si Rihubuam matinudukun nagpakaun katungkulan sa iba waya niya manga anak. Ipinamahala niya sida sa tanan may alad batu pag manga banwa Huda ag Binhamin. Pinakan-an niya sida kanda manga pangangailangan ag mayamu asawa.