2 Krunika 10 - Hanunuu

Naglaban ti Israil sa kan Rihubuam

¹ Nag-atag si Rihubuam sa Sikim, nu naan pag nagtipun ti manga Israilita hampay buwatun siya yi ti hari.

² Pagka nabaritaan inda ni Hirubuam kay anak ni Nabat, nagbalik siya sa Israil. (Dahil sa ati pag udas ati siya pag mag-uli sa Ihiptu, nu naan nalagiw siya sa kan Hari Sulumun.)

³ Ipinatawag manga Israilita si Hirubuam, ag nag-atag sida tanan sa kan Rihubuam ag magkun,

⁴ “Mabuyat ti manga pag-ipatupad nimu ama sa kanmi. Dapat nu pagaanun nimu inda, sirbihan nimi kawu.”

⁵ Sinmagut si Rihubuam, “Pakan-i dap niyu aku tulu ka sirang hampay pag-isipan inda, bag-u pagbalik kamu sa kangku.” Nakan nuli ti manga tawu.

⁶ Bag-u nagpasampak si Hari Rihubuam sa manga paggurangunun magsirbi sa kay ama sa kan Sulumun katpung buhi waya inda. Nagpaingana si Rihubuam sa kanda, “Unu nguna kanyu maipaanyu sa kang isagut sa paghagadun ati pag manga tawu?”

⁷ Sinmagut sida, “Nu ipakakit nimu kanmu kaayadan sa kanda, ag nu ipakaun nimu sa kanda ti kanda paghagadun, manirbi sida sa kanmu tugka aban.”

⁸ Dapat unman sinunud ni Rihubuam kanda paanyu. Bagkus, nagpasampak ngap siya sa kadungan niya pag manga kalay-awan magsirbi sa kanya.

⁹ Namaingana siya sa kanda, “Unu nguna kanyu maipaanyu sa kang isagut sa paghagadun ati pag manga tawu? Maghagad sida sa kangku pagaana niku ti manga mabuyat pag ipinatupad niku ama sa kanda.”

¹⁰ Sinmagut ti manga kalay-awan kadungan niya, “Inda ti isagut nimu ati pag manga tawu maghagad sa kanmu: ‘Kang itanggigis daka waya sa awak niku ama.

¹¹ Kang ibug sabihun mas mabuyat waya ti ipatupad niku sa kanyu kaysa pag-ipatupad niku ama. Nu binakul kamu niku ama latigu, bakulun niku kamu latigu may maratarum pag manga baul.’ ”

¹² Pagkalawuy tulu ka sirang, binmalik si Hirubuam hanggan ti manga tawu tabug sa kan Hari Rihubuam, angay sa sinabi hari sa kanda.

¹³ Dapat unman sinunud ni Rihubuam ti ipinaanyu manga paggurangunun. Bagkus, binagawan niya marasakit ti manga tawu

¹⁴ angay sa ipinaanyu manga kalay-awan kadungan niya. Magkun siya sa kanda, “Mabuyat ti pag-ipatupad niku ama sa kanyu, dapat subra waya gid mabuyat ti ipatupad niku sa kanyu. Nu binakul kamu niku ama latigu, bakulun niku kamu latigu may maratarum pag manga baul.”

¹⁵ Nakan ngani unman namatingi ti hari sa paghagadun manga tawu, dahil inda kagustuhan Diyus hampay matupad kay sinabi sa kan Hirubuam, kay anak ni Nabat, sa panab-anan ni Ahiyas taga Silu.

¹⁶ Pagka naalaman manga Israilita unman sida pinatingihan hari, magkun sida sa hari, “Unman yi kami may labut sa kanmu, linahi ni Dabid! Bahala yi kawu sa kanmu kaharian! Abala kamu manga Israilita, muli yi kita!” Nakan nuli ngani ti manga Israilita.

¹⁷ Ti manga Israilita lang ti mag-ulian sa manga banwa Huda ti pinamahalaan ni Rihubuam.

¹⁸ Taynguna, ipinaatag ni Hari Rihubuam sa manga Israilita si Aduram, ti manug-asikasu sa manga tawu pagpatarabahuun sa pilitan. Dapat binintuk siya manga Israilita tugka sa namatay. Bag-u nagdaldali sinmakay si Hari Rihubuam sa kay kalisa ag nalagiw atabug sa Hirusalim.

¹⁹ Hanggan taynguna, maglaban ti manga Israilita sa manga linahi ni Dabid.