2 Krunika 1 - Hanunuu

Nanhagad si Sulumun Kadunungan

¹ Marig-un kay maghari ni Sulumun kay anak ni Dabid sa kay kaharian dahil kaibahan niya ti Panginuun niya Diyus, ag binwat siya makapangyarihan gid.

² Nagpakihampang si Sulumun sa tanan Israilita, sa manga kumandir manga linibu ag ginatus manga sundalu, sa manga manughusay, sa tanan takinan Israil, hanggan sa tanan takinan manga magtal-anakan.

³ Bag-u nighit si Sulumun hanggan ti tanan tawu atabug sa simbahan sa abwat pag rugar sa Gibyun, dahil ati ti Turda Taragbuan Diyus. Inda pag Turda ati sa pangawakawaan pag ipinabwat ni Muysis ti manugsirbi Panginuun.

⁴ Ati katpung, naisalyu yi ni Dabid ti Kaban Kasunduan ginan sa Kiryat Harim atabug sa turda kay inalistu para siyun, ati sa Hirusalim.

⁵ Dapat ti galang pag harandugan binuwat ni Bisalil kay anak ni Uri ag kay laki ni Hur ati di sa Gibyun sa atubangan Turda Panginuun. Nakan ati pag nagtiripun si Sulumun hanggan ti tanan tawu hampay mamaingana sa Panginuun.

⁶ Pagkatapus, sinmaka si Sulumun sa galang pag harandugan sa atubangan Panginuun ati sa Turda Taragbuan, nansagda siya 1,000 handug pagsunugun.

⁷ Pagka ati pag yabi, napakakit ti Diyus sa kan Sulumun ag magkun sa kanya, “Paghagad kawu una hintay ag ipakaun niku inda sa kanmu.”

⁸ Sinmagut si Sulumun, “Pinakakitan nimu daka pag kaayadan kang ama si Dabid. Taynguna inilis nimu aku sa kanya bilang hari.

⁹ Nakan taynguna, Panginuun Diyus, tupada duy nimu kanmu taratu sa kang ama, sa kan Dabid, dahil binwat nimu aku hari sa manga tawu parihu sa baras kay kayamu.

¹⁰ Pakan-i aku kadunungan hanggan kaalaman hampay madumarahan niku inda pag manga tawu. Dahil si unu duy ti may kaya pumanguna sa kanmu nasakupan masyadu mayamu?”

¹¹ Magkun ti Diyus sa kan Sulumun, “Dahil naghagad kawu kadunungan hanggan kaalaman sa magpanguna sa kang nasakupan nu naan binuwat niku kawu hari ag unman kawu naghagad yaman, ngatay kadayawan, ngatay kamatayan nimu manga kalaban, ngatay aba pag buhi,

¹² ipakaun niku sa kanmu ti paghagadun nimu. Pakan-an diman niku kawu manga kayamanan hanggan kadayawan balaw waya nasamitan ni una si unu pag hari kaybi ginan hanggan sa rumas-ug pag panahun.”

¹³ Pagkatapus, nighit si Sulumun sa Turda Taragbuan ati sa simbahan sa abwat pag rugar sa Gibyun, nagbalik siya sa Hirusalim. Ag naghari siya sa Israil.

Kay manga Kayamanan ni Sulumun

¹⁴ Nakatipun si Sulumun 1,400 kalisa ag 12,000 kabayu. Ipinauli niya tunda kay iba sa manga banwa haramnuan niya manga kalisa, ag kay iba ati sa Hirusalim.

¹⁵ Katpung siya ti hari, ti pilak ag gintu sa Hirusalim ga urungan wadi manga batu, hanggan ti kayu sidru parihu kay kayamu sa urungan manga kayu sikumuru sa manga tagudtud sa isalpan.

¹⁶ Kay manga kabayu ni Sulumun ginan waya sa Ihiptu hanggan sa Silisya. Binili tunda niya manga manugbili sa Silisya sa kang-ud pag halaga.

¹⁷ Ati katpung, ti halaga kalisa ginan sa Ihiptu 600 pulud pilak, ag ti kabayu 150 ka pulud pilak. Pag-ipabili diman tunda manga tawuhan ni Sulumun sa tanan hari manga Hitiyu hanggan manga Aramiyu.