2 Huwan 1 - Hanunuu

¹ Inda ti may surat imaw ti manug-asiwa sa iglisya, atag sa kay pinili Diyus pag babayi hanggan sa kay manga anak. Lubus duy aku magmahal sa kanyu dahil sa kanta magpakiusa sa katutuuhanan ag balaw lang aku nu ud tunda ngap hanggan tanan pag manga nakakilala sa katutuuhanan.

² Nakan katida dahil nangulian yi sa kanta ti katutuuhanan, sa kanta di gid, udyi may kaduraan hanggan waya aban.

³ Pagsa kanta mana ti papalad, ti pangaawa hanggan ti kahusayan ginan sa kanta Diyus Ama hanggan kay anak, si Hisu-Kiristu, habang magkabuhi kita sa katutuuhanan hanggan pagmahal.

Ti Katutuuhanan ag ti Pagmahal

⁴ Aku lalu ngap nakabaya pagka naalaman niku kanmu manga anak kay iba kanda ugali buhi angay sa katutuuhanan, angay sa sugu kanta tinanggap ginan sa Ama.

⁵ Taynguna duy, aku may ipaalaala sa kanmu, bukun lang bag-u pag sugu kang isinurat sa kanmu, nu unman tunda diman pag daan sugu sa kanta yi ginan waya sa kabag-u magkun, pagmalahalan kita sa usa kag sa usa.

⁶ Inda yi ngani kay kahulugan kang pagsabihun pagmahal, nu kita mag-ugali angay sa manga sugu Diyus. Inda imaw diman pag sugu kanyu nadnugan ginan sa kabag-u magkun, pag-ugali kamu angay sa pagmahal.

⁷ Dahil ngani nangalat yi sa kalibutan ti manga magdaya, tunda pag manga tawu unman magpasnu kuntay si Hisu-Kiristu nabilug tawu. Tunda yi ngani ti mandadaya ag anti-Kiristu.

⁸ Pag-aman kamu hampay unman madura ti kanyu binudlayan, ag hampay lubus gid matanggap niyu kanyu pirimyu.

⁹ Ti tawu nu unman magsunud sa kay itinudlu ni Kiristu ngatay magdagdag magpasubra sa kay itinudlu, balaw siya inulianan Diyus. Una si unu ti magsunud sa kay itinudlu ni Kiristu, nangulian sa kanya ti Ama hanggan ti Anak.

¹⁰ Una gid hintay ti rumas-ug sa kanyu nu bukun inda kay pag-itudlu, danga gid niyu tanggapun siya sa kanyu balay, danga gid niyu pagbatia.

¹¹ Dahil ungud ti tawu nu magbati sa tunda pag manugtudlu patalang, magkaminsan yi waydi sa kay daut buwat.

Pangatapusan pag Bagaw

¹² Mayamu waya mana kang sarabihun sa kanyu dapat balaw dapu kang gustu isurat sa kanyu. Magkaibug gid mana nakan aku umasan bag-u manharampangan kita sa mag-aratubangan hampay lubus yi lang kita sa kabayaan.

¹³ Ti manga anak nimu patar-ari babayi kay diman pinili Diyus magpaingana nu kabitay waydi kunu kawu asan.