2 Hari 9 - Hanunuu

Binwat si Hihu Hari Israil

¹ Ipinatawag ni Ilisyu ti usa ka kaibahan sa gurupu manga purupita ag sinabihan, “Pag-alistu kawu sa pag-ati sa Ramut Gilyad, ag daraha inda pag sukadan lana ulibu.

² Pagras-ug nimu ati, hanapun nimu si Hihu kay anak ni Husapat kay laki ni Nimsi. Bul-a nimu siya sa kay manga kaibahan ag tabana sa usa ka sulud-sulud kamu lang duwa ati.

³ Bul-un nimu ti lana ag buhusi kay ulu bag-u sabiha, ‘Inda ti pagsabihun Panginuun: Pinili niku kawu humari sa Israil.’ Bag-u pagluwas kawu sa sabian ag palagiw madaldali.”

⁴ Nakan nag-atag ngani ti kan-akan pag purupita sa Ramut Gilyad.

⁵ Pagka rinmas-ug siya ati, nakitan niya ti manga takinan manga sundalu matukawan. Magsabi siya, “May tultulanun duy aku para sa kanmu.” Namaingana si Hihu, “Para sa kantapu tunda?” Sinmagut ti tawu, “Para duy sa kanmu.”

⁶ Tinmidug rargu si Hihu ag napaslud sa balay. Binuhusan siya rargu purupita lana ulibu sa ulu, ag sinabihan, “Inda ti pagsabihun Panginuun, ti Diyus Israil: ‘Pinili niku kawu humari sa kang nasakupan Israil.

⁷ Rurisun nimu ti magtal-anakan ni Akab kanmu amu, hampay mabalusan niku si Hisibil sa kay nagmatay sa kang manga manugsirbi pag manga purupita ag sa iba waya niku manga manugsirbi.

⁸ Maruris ti tanan magtal-anakan ni Akab. Panmatyun niku ti tanan kaibahan sa kay magtal-anakan pag manga lalaki, panawuhun man ngatay bukun.

⁹ Buwatun niku sa magtal-anakan ni Akab kang binuwat sa magtal-anakan ni Hirubuam kay anak ni Nabat, ag sa magtal-anakan ni Baasa kay anak ni Ahiyas.

¹⁰ Nu tungkul kan Hisibil, kan-un siya manga idu ati sa daga Hisriil, unman may manlubung sa kanya.’ ” Napalwas rargu ti purupita ag nalagiw.

¹¹ Pagka nagbalik si Hihu sa kay kaibahan manga takinan, ti usa sa kanda nagpaingana sa kanya, “Hintay ti nangyari? Hayga nag-atag sa kanmu tunda pag tawu paung?” Sinmagut si Hihu, “Alam diman waydi niyu nu si unu siya ag nu unu kay pagbagawun.”

¹² Sinmagut sida, “Danga kawu magpudil sa kanmi. Tultuli kami nu hintay gid kay pagsabihun.” Magkun si Hihu, “Sinabi niya sa kangku ti tungkul sa binagaw Panginuun kuntay aku ti pinili hari sa Israil.”

¹³ Linukas manga takinan kanda manga kulimpay bag-u linatag sa agdanan sa pagtindugan ni Hihu. Ipinatnug rargu nida ti budyung ag nanringgit, “Si Hihu yi ti hari!”

Minatay ni Hihu si Huram ag si Ahasiyas

¹⁴ Naggayak si Hihu kay anak ni Husapat kay laki ni Nimsi laban kan Huram. (Tunda katpung, pagbaliwahan ni Huram hanggan manga taga Israil ti Ramut Gilyad laban kan Hari Hasail taga Aram.

¹⁵ Dapat nabiyagan si Huram sa kanda maglalabanan sa manga Aramiyu, nakan nuli siya sa Hisriil hampay paayadun kay biyag.) Magsabi si Hihu sa kay kaparihu manga takinan, “Nu ibug niyu aku ti humari, danga niyu pagpasnui may makaluwas sa inda pag banwa. Dahil barang may mangatag sa Hisriil ag manultul ati kuntay binuwat niyu aku hari.”

¹⁶ Sinmakay si Hihu sa kay kalisa ag nag-atag sa Hisriil, nu naan pag magpaayad kay biyag si Huram. Ati diman si Hari Ahasiyas taga Huda, dahil nanabang siya kan Huram.

¹⁷ Taynguna, nakitan guwardiya bantayaw Hisriil si Hihu magras-ug kaibahan kay manga sundalu, nakan nanringgit siya, “May magras-ug manga sundalu!” Sinmagut si Huram, “Pagpadara kawu manugkabayu agud sulangun sida hampay alamun nu ngatay kahusayan kanda turunu ataytabug.”

¹⁸ Nakan linmakaw ti usa ka manugkabayu hampay sulangun si Hihu ag nagkumun, “Gustu maalaman hari nu kahusayan aw kanmu inataytag.” Sinmagut si Hihu, “Hintay kanmu labut? Pagdasun kawu sa kangku!” Nanringgit ti guwardiya sa hari, “Nakaras-ug yi duy sa kanda kanmu sinugu pag manugkabayu, dapat unman siya nagbalik.”

¹⁹ Nakan nagpadara maan ti hari kay usa ka manugkabayu. Pagras-ug niya sa kanda magkun siya, “Gustu maalaman hari nu kahusayan kanmu inataytag.” Sinmagut si Hihu, “Hintay kanmu labut sa kahusayan? Pagdasun kawu sa kangku!”

²⁰ Nagringgit maan ti guwardiya sa hari, “Nakaras-ug yi duy sa kanda kanmu ikadwa sinugu pag manugkabayu, dapat unman diman siya nagbalik! Ag ti takinan manga sundalu masyadu mabisug magpalagiw, parihu kan Hihu!”

²¹ Nagsugu si Huram, “Alistuhan niyu kang kalisa.” Igu alistu yi, linmakaw si Huram hari Israil hanggan si Ahasiyas hari Huda agud sulangun si Hihu. Masakyan sida sa kanda kalisa. Ag nasulang nida si Hihu sa daga ni Nabut taga Hisriil.

²² Pagka nakitan ni Huram si Hihu, pinaingana niya siya, “Kahusayan aw kanmu inataytag Hihu?” Sinmagut si Hihu, “Kabitay bumaliw kahusayan nu may imaw diman pamulungan ag pagsamba sa manga diyus-diyusan ti inumpisahan nimu ina ni Hisibil?”

²³ Linisud rargu ni Huram kay kabayu ag pinapalagiw gid mabisug. Nanringgit siya kan Ahasiyas, “Nandaya si Hihu sa kangku!”

²⁴ Bin-ul ni Hihu kay pamana ag pinana si Huram sa dayu. Linmapus ti pamana sa kay pusu, ag nalagpak siya sa kay kalisa.

²⁵ Magkun si Hihu sa kan Bidkar kay takinan, “Bul-a ti bangkay ni Huram, ag yamtan sa tanman ni Nabut taga Hisriil. Magkaala-ala aw nimu katpung masakyan kita duwa sa dayu baliwa ni Akab kay ama? Nagbagaw ti Panginuun inda pag tultulanun laban sa kanya:

²⁶ ‘Nakitan niku kaaldaw kanmu nagmatay sa kan Nabut hanggan sa kay manga anak. Ag magtaratu aku balusan gid niku kawu sitay gid ngap sa tanman ni Nabut. Aku, ti Panginuun, ti magsabi inda.’ Nakan bul-a siya ag yamtan sa tanman ni Nabut angay sa sinabi Panginuun.”

²⁷ Pagka nakitan ni Hari Ahasiyas taga Huda ti nangyari, nalagiw siya atabug sa Bit Hagan. Linagas siya ni Hihu magringgit, “Matya diman niyu siya!” Nakan pinana nida siya sa kay kalisa sa dalan atabug sa Gur, arani sa Ibliyam. Nakapalagiw siya may biyag tugka sa Migidu, dapat namatay siya ati.

²⁸ Bin-ul niya manga suruguun kay bangkay ag ikinarga sa kalisa atabug sa Hirusalim. Ilinbung siya sa lulubngan niya manga ginurang sa Banwa ni Dabid.

²⁹ Naghari sa Huda si Ahasiyas sa ika-11 pag timpu katpung maghari si Huram, kay anak ni Akab, sa Israil.

Minatay si Hisibil

³⁰ Nag-ati si Hihu sa Hisriil. Pagka naalaman tunda ni Hisibil, namarinu siya kay mata ag hinusay niya kay buhuk bag-u nangalantaw sa may gaha balay hari.

³¹ Pagka nakaslud si Hihu sa sabian balay hari, magsabi si Hisibil sa kanya, “Kahusayan aw kanmu turunu ataytabug? Kawu parihu kan Simri manugmatay sa kay amu.”

³² Nagtangda si Hihu sa gaha ag nagpaingana, “May imaw aw asan sa tungud magpabliwa sa kangku?” May duwa ngatay tulu ngap ka takinan ti napatamwa sa kanya sa gaha.

³³ Magsabi si Hihu sa kanda, “Lagpakan niyu siya!” Nakan ilinagpak ngani nida si Hisibil. Kay manga dugu nagtaramsig sa alad batu hanggan sa manga kabayu, bag-u tinatatataan siya manga kabayu ni Hihu.

³⁴ Sinmulud si Hihu sa balay hari bag-u nangaun ag nanginum. Pagkatapus magkun siya, “Bul-a niyu tunda ti sinaadan pag babayi ag lubngan, dahil anak diman siya hari.”

³⁵ Dapat pagka bul-un yi nida kay bangkay hampay ilubung, unman yi may nasawad sa kanya, purya lang kay barut-ulu, manga lulud, ag manga kamang.

³⁶ Nakan binmalik sida ag tinultulan si Hihu. Magsabi si Hihu, “Imaw inda ti pagsabihun Panginuun sa panab-anan niya suruguun si Ilyas taga Tisbi: ‘Sa usa ka daga Hisriil, kan-un manga idu kay nayi ni Hisibil.

³⁷ Kay bilug magkarawayak ati parihu sa ugat, unman yi may makakilala sa kanya.’ ”