2 Hari 8 - Hanunuu

Binmalik ti Babayi Taga Sunim

¹ Magkun si Ilisyu sa babayi imaw kay binuhi kaybi kay anak, “Daraha kanmu magtal-anakan ag pangulian kamu sa iba rugar dahil ti Panginuun namadara lun-us sa Israil sa sulud pitu ka timpu.”

² Nakan sinunud ngani babayi ti pagsabihun suruguun Diyus sa kanya. Nighit siya kaibahan kay magtal-anakan ag nangulian sa daga manga Pilistiyu sa sulud pitu ka timpu.

³ Pagka natapus ti pitu ka timpu, binmalik siya atag sa Israil ag nag-ati siya sa hari hampay manpaawa-awa kuntay ulian di kay balay hanggan kay daga sa kanya.

⁴ Tunda katpung sa kay magsaka, kahampang hari si Gihasi kay panawuhun ni Ilisyu. Magsabi ti hari, “Tultulan sa kangku ti tanan makadululaw pag manga bagay kan Ilisyu binwat.”

⁵ Ag habang magtultul si Gihasi sa hari nu kabitay binuhi ni Ilisyu ti anak namatay, nagpakarani sa hari kay ina anak ag namaawa-awa siya kuntay ulian sa kanya kay balay hanggan kay daga. Magkun si Gihasi, “Mahal Hari, tunda ngani pag babayi, ag tunda pag anak imaw kay binuhi ni Ilisyu.”

⁶ Pinaingana hari ti babayi nu tutuu aw ngani tunda, ag itinultul ngani babayi. Nakan ipinatawag hari kay usa ka manugpamahala hampay awatan ti babayi. Magkun siya sa manugpamahala, “Awati nimu siya ibalik ti tanan nadura sa kanya, hanggan ti tanan niya kita sa kay tanman ginan sa kay nighit tugka taynguna.”

Minatay ni Hasail si Bin Hadad

⁷ Taynguna, nag-ati si Ilisyu sa Damasku, nu naan pag magkasakit si Hari Bin Hadad taga Aram. Pagka nabaritaan hari asan ti suruguun Diyus,

⁸ magkun siya sa kan Hasail, “Pagdara kawu pamakaun ag sulanga ti suruguun Diyus. Bag-u sabihi siya paingan-a niya ti Panginuun nu ngatay umayad waya aku sa kang sakit.”

⁹ Nakan inmati ngani si Hasail sa kan Ilisyu may dara 40 ka kamilyu may karga marinu pag manga pamakaun ginan sa Damasku. Pagras-ug niya sa kan Ilisyu, magkun siya, “Sinugu duy aku nimu manugsirbi ni Hari Bin Hadad taga Aram, hampay paingan-un kawu nu umayad waya siya sa kay sakit.”

¹⁰ Sinmagut si Ilisyu, “Pag-uli kawu ag sabiha nimu sa kanya pihu gid umayad siya, dapat sinabi Panginuun sa kangku pihu gid mamatay siya.”

¹¹ Tinurun niya si Hasail tugka sa nangay-a siya. Ag nanlumi si Ilisyu.

¹² Pinaingana siya ni Hasail, “Duy, hayga nanlumi kawu?” Sinmagut siya, “Dahil alam niku ti daut buwatun nimu sa manga taga Israil. Sunugun nimu kanda alad batu manga banwa, panmatyun nimu kanda kalay-awan lalaki, ipanlapdus nimu kanda dariit pag manga anak, ag buk-un nimu ti tiyan manga magbuduy pag manga babayi.”

¹³ Sinmagut si Hasail, “Duy, kabitay niku tunda mabuwat? Unman niku kaya mabuwat tunda.” Sinmagut si Ilisyu, “Ipinakakit sa kangku Panginuun kawu ti kailis hari manga taga Aram.”

¹⁴ Binmalik si Hasail sa kay amu sa kan Bin Hadad, ag pinaingana siya ni Bin Hadad, “Nabi, hintay ti pagsabihun ni Ilisyu sa kanmu?” Sinmagut si Hasail, “Magsabi siya sa kangku pihu gid umayad kawu.”

¹⁵ Pagka sa sunud pag sirang, nam-ul si Hasail madamul pag rutay ag isinugmaw inda sa danum bag-u itinakbun sa uyahun hari tugka sa namatay inda. Ag si Hasail ti nag-ublus bilang hari.

Kay Maghari ni Hihuram sa Huda

¹⁶ Naghari sa Huda si Hihuram kay anak ni Husapat sa ikalima pag timpu kay maghari ni Huram, kay anak ni Akab, sa Israil.

¹⁷ Si Hihuram 32 ka timpu kay idad kay naghari. Sa Hirusalim siya pag nangulian, ag naghari siya sa sulud walu ka timpu.

¹⁸ Nagsunud siya sa ugali manga hari taga Israil, parihu sa binuwat magtal-anakan ni Akab, dahil kay inasawa kay anak ni Akab. Daut kay binuwat sa magbantay Panginuun.

¹⁹ Dapat dahil sa kan Dabid, unman winayak Panginuun ti Huda, dahil nangaku siya sa kan Dabid unman maduraan si Dabid linahi humari hanggan aban.

²⁰ Sa udas maghari ni Hihuram, naglaban ti Idum sa Huda, ag namili sida kanda sadili pag hari.

²¹ Nakan nag-atag si Hihuram sa Sair dara ti tanan niya manga kalisa. Pinalibutan siya hanggan ti manga kumandir niya manga kalisa manga taga Idum. Dapat pagka yabi, ginira nida ti manga taga Idum, ag nakalawuy sida sa manga taga Idum ag nakapalagiw. Bag-u nuli kay manga sundalu.

²² Hanggan taynguna maglaban di ti Idum sa Huda. Sa tunda diman pag udas, naglaban diman ti Libna.

²³ Ti iba waya ka tultulanun tungkul sa maghari ni Hihuram, ag ti tanan niya binuwat, nisurat sa Ribru Tultulanun manga Hari Huda.

²⁴ Pagka namatay si Hihuram, ilinbung siya kaibahan sa kay manga ginurang sa Banwa ni Dabid. Ag si Ahasiyas kay anak imaw ti nag-ublus sa kanya bilang hari.

Kay Maghari ni Ahasiyas sa Huda

²⁵ Naghari sa Huda kay anak ni Hihuram si Ahasiyas katpung sa ika-12 pag timpu kay maghari ni Huram sa Israil. Si Huram anak ni Akab.

²⁶ Si Ahasiyas 22 ka timpu kay idad kay maghari. Sa Hirusalim siya pag nangulian, ag naghari siya sa sulud usa ka timpu. Kay ina si Atalya laki ni Hari Umri taga Israil.

²⁷ Nagsunud siya sa ugali magtal-anakan ni Akab. Daut kay binuwat sa magbantay Panginuun parihu sa binuwat magtal-anakan ni Akab, dahil nangasawa siya sa usa ka kaibahan sa magtal-anakan ni Akab.

^28-29 Kinmuyug si Ahasiyas sa kan Huram kay anak ni Akab agud man-gira sa kan Hari Hasail taga Aram. Nanlalabanan sida sa Ramut Gilyad, ag nabiyagan si Huram. Nakan nuli si Hari Huram sa banwa Hisriil hampay paayadun kay manga biyag. Pagka ati siya, nanabang sa kanya si Hari Ahasiyas taga Huda.