2 Hari 7 - Hanunuu

¹ Sinmagut si Ilisyu, “Patingihi nimu ti pagsabihun Panginuun: ‘Aldaw, sa kainda diman pag udas, mura ti bililyun sa bililihan sa Samarya. Ti halaga tulu ka pulak arina, usa lang ka pulud pilak, ag katunda diman ti halaga unum ka pulak sibada.’ ”

² Magkun ti pagpiyaran hari pag takinan, “Una waya bukasan Panginuun ti manga gaha sa langit, unman yi gid mangyari inda.” Sinmagut si Ilisyu, “Makitan nimu mangyari gid inda, dapat unman kawu makakaun tunda.”

Inmapas ti manga Aramiyu sa Paggira

³ Taynguna, may upat ka tawu may dilikadu pag sakit sa lukub manga matukawan sa may puwirtahan banwa. Magharampangan sida, “Hayga manukawan kita sitay tugka sa mamatay?

⁴ Nu paslud kita sa banwa mamatay kita ati sa lun-us, ag nu manukawan lang kita sitay, mamatay diman kita. Nakan mangatag yi lang kita sa kampu manga Aramiyu ag sumuku. Nu balaw nida kita unhun, mayad ngap, dapat nu matyun nida kita, bahala yi.”

⁵ Nakan pagka yabi, nag-atag ngani sida sa kampu manga Aramiyu. Dapat pagras-ug nida ati, unman may tawu ati una di.

⁶ Dahil ipinadnug Panginuun sa manga sundalu Aram ti agudhud manga kalisa, manga kabayu, ag mayamu pag manga sundalu, nakan nag-isip ti manga Aramiyu inupahan hari Israil ti hari manga Hitiyu hanggan ti hari manga Ihiptu sa paggira sa kanda.

⁷ Nakan ngani nalagiw sida sa tunda pag yabi ag tinayakan nida kanda manga turda, manga kabayu, hanggan manga asnu. Tinayakan lang nida kanda kampu ag irinibri kanda sadili.

⁸ Pagka rinmas-ug sa kampu ti manga tawu may sakit sa lukub, inusa-usa nida sinlud ti manga turda. Nangaun sida ag nanginum, ag bin-ul nida ti manga pilak, manga gintu ag manga rutay. Bag-u itinagu nida inda.

⁹ Pagka siyun ginan nanharampangan sida, “Balaw inda mayad. Kailangan mana ibarita nita taynguna pag sirang nagpinalagiw yi ti manga kalaban, dapat ipinaulam lang nita inda. Nu aldaw waya nita pag-itultul inda, parusahan gid kita. Abala, atag kita taynguna sa balay hari ag ibarita nita inda.”

¹⁰ Nakan binmalik sida sa banwa Samarya ag tinawag nida ti manga guwardiya puwirtahan banwa ag sinabihan, “Nag-ati kami sa kampu manga Aramiyu ag unman gid may tawu ati, purya lang sa manga kabayu ag manga asnu mahigtan. Ag asan di ti manga kasiyunan sa manga turda.”

¹¹ Irininggit manga guwardiya inda pag barita sa manga tawu tugka sa inmaput sa balay hari.

¹² Una madulum waya, binmangun ti hari ag magkun sa kay manga takinan, “Tultulan niku kamu nu hintay ti paggayakun manga Aramiyu. Alam nida paglun-usun kita, nakan pinabay-anan nida kanda kampu ag napatagu sa manga kabantudan. Mag-isip sida, nu mighit yi kita ginan sa banwa, dakpun nida kita buhi, bag-u suldun nida kanta banwa.”

¹³ Sinmagut ti usa ka takinan, “May nasawad waya kita lima ka kabayu, hayga unman kita mansugu pira ka manga tawu agud mangusisa nu unu gid nguna ti nangyari? Bahala yi nu matyun sida, nu sitay sida mamatay diman waydi kaibahan nita.”

¹⁴ Nakan nag-alistu sida duwa ka kalisa may manga kabayu, bag-u nagpadara ti hari manga tawu hampay alamun nu hintay gid nguna ti nangyari sa manga sundalu Aram.

¹⁵ Rinmas-ug sida tugka sa Sapa Hurdan, ag nakitan nida sa dalan ti manga rutay ag manga kagamitan ipinanyamut manga Aramiyu sa kanda magkadaldalian magpalagiw. Nagbalik ti manga sinugu ag ibinarita nida inda sa hari.

¹⁶ Bag-u linmuwas sa banwa ti manga tawu ag pinanbuul nida ti manga nagkaratayak sa kampu manga Aramiyu. Ag nangyari ungud ti pagsabihun Panginuun ti halaga tulu ka pulak arina, usa lang ka pulud pilak, ag katunda diman ti halaga unum ka pulak sibada.

¹⁷ Ti ipinauli hari manug-ampara sa maglinuwang manga tawu sa puwirtahan banwa imaw ti masarigan niya pag takinan. Dapat naplid siya ag tinatatataan lang manga tawu ati sa puwirtahan, ag namatay siya angay sa pagsabihun ni Ilisyu kay suruguun Diyus katpung nag-ati ti hari sa kan Ilisyu.

¹⁸ Nangyari diman ti pagsabihun suruguun Diyus sa hari, “Aldaw, sa katunda diman pag udas mura ti bililyun sa bililihan Samarya. Ti halaga tulu ka pulak arina, usa lang ka pulud pilak, ag katunda diman ti halaga unum ka pulak sibada.”

¹⁹ Sinmagut tunda katpung ti takinan hari, “Una waya bukasan Panginuun ti manga gaha sa langit, unman yi gid mangyari inda.” Sinmagut si Ilisyu, “Makitan nimu mangyari gid inda, dapat unman kawu makakaun tunda.”

²⁰ Ag nangyari ungud tunda sa takinan, ag tinatatataan siya manga tawu maglinuwang sa puwirtahan banwa, ag namatay siya.