2 Hari 6 - Hanunuu

Linmutaw sa Danum ti Ulu Wasay

¹ Pagka sa usa ka sirang, magsabi sa kan Ilisyu ti gurupu manga purupita, “Nakakit diman kawu diit lang inda pag rugar kanmi pagsampakan sa kanmu.

² Nakan atabug kita sa Sapa Hurdan nu naan may mayamu pag puun kayu. Manmuwat kita ati ulian kanta tiripnan.” Magsabi si Ilisyu, “Hu, pag-atag yi kamu.”

³ Dapat magsabi ti usa sa kanda, “Nu mahimu duy, pagkuyug yi lang kawu sa kanmi.” Sinmagut siya, “Hu, duy.”

⁴ Nakan kinmuyug ngani siya sa kanda. Nag-ati ngani sida sa Sapa Hurdan ag namukan manga puun kayu.

⁵ Habang ti usa sa kanda magpukan, nalagpak duy ti ulu niya wasay sa danum, nakan namagrit siya, “Duy, inudam lang niku tida!”

⁶ Pinaingana ni Ilisyu, “Naan baliwa pag nalagpak?” Itinudlu tawu nu naan baliwa pag nalagpak, bag-u pinmulud si Ilisyu sanga ag iyinmut atag sa danum. Ag linmutaw ti ulu wasay.

⁷ Magkun si Ilisyu, “Bul-a yi.” Ag bin-ul ngani tawu inda.

Inampara ni Ilisyu ti Paggira manga Aramiyu

⁸ Taynguna, nan-gira ti hari Aram sa Israil. Pinaingana niya kay manga may kangaranan nu naan sida pag rugar pag kumampu.

⁹ Sinabihan ni Ilisyu ti hari Israil, “Danga kamu maglakaw sa tunda pag daga dahil asan may magbantay manga taga Aramiyu.”

¹⁰ Nakan pinmasugu ti hari Israil sa tunda pag daga kay pagsabihun ni Ilisyu hampay sabihan ti manga mag-uli ati kuntay pag-alistu daan sida. Pirmi magpaandam si Ilisyu sa hari.

¹¹ Dahil siyun, nangisug gid ti hari Aram. Nakan ipinatawag niya kay manga may kangaranan ag sinabihan, “Si unu sa kanyu ti magpabliwa sa hari Israil?”

¹² Magsabi ti usa niya ka takinan, “Unman gid una di usa sa kanmi, Mahal Hari. Si Ilisyu pag purupita ti magtultul sa hari Israil sa tanan pagbagawun nimu una waya kawu sa kanmu sulud-sulud.”

¹³ Magkun ti hari, “Pagginan yi kawu, hanapa siya hampay makapadara aku manga tawuhan hampay dakpun siya.” Pagka itinultul sa hari kuntay si Ilisyu ati sa Dutan,

¹⁴ nagpadara siya mayamu pag manga sundalu masakyan sa manga kabayu hanggan sa manga kalisa. Yabi yi sida pagka rinmas-ug sa Dutan ag pinalibutan nida inda.

¹⁵ Igu magkasurip, maaga waya nimata kay panawuhun ni Ilisyu, ag nakitan niya ti manga sundalu masakyan sa manga kabayu hanggan sa manga kalisa magpalibut sa banwa. Magkun siya sa kan Ilisyu, “Duy, hintay kanta buwatun?”

¹⁶ Sinmagut si Ilisyu, “Danga kawu magkadala. Mayamu man kanta kaibahan kaysa kanda.”

¹⁷ Nandarangin si Ilisyu magkun, “Panginuun, bukasi ti mata niku panawuhun hampay makakit siya.” Binukasan ngani Panginuun kay mata, nakitan niya ti kabantudan sa sangput ni Ilisyu pudu manga kabayu hanggan manga kalisa apuy.

¹⁸ Habang magpakarani ti manga kalaban sa kan Ilisyu, nandarangin siya magkun, “Panginuun, butaa inda pag manga tawu.” Nakan binuta ngani sida Panginuun angay sa pakihampang ni Ilisyu.

¹⁹ Magkun si Ilisyu sa manga kalaban, “Balaw inda ti dalan ag balaw inda ti banwa Dutan. Pagdasun kamu sa kangku, ibahan niku kamu atag sa kanyu paghanapun pag tawu.” Nakan tinaban sida ni Ilisyu atabug sa Samarya.

²⁰ Pagka nakaslud sida sa banwa, nandarangin si Ilisyu magkun, “Panginuun, bukasi kanda manga mata hampay makakit sida.” Binukasan ngani Panginuun kanda manga mata, ag nakitan nida ati yi sida sa Samarya.

²¹ Pagka nakitan hari Israil sida, pinaingana niya si Ilisyu, “Amang, matyun aw niku sida?”

²² Sinmagut si Ilisyu, “Danga sida pagmatya. Pagmatyun aw lugud nita ti manga bihag ginan sa girahan? Pakan-i sida karan-unun hanggan danum hampay makakaun sida ag makainum, bag-u paulian sida atabug sa kanda hari.”

²³ Nakan nag-alistu karan-an ti hari para sa kanda, bag-u pinauli niya sida atabug sa kanda hari. Siyun ginan, unman yi nandugma ti manga taga Aram sa daga Israil.

Pinalibutan ti Samarya

²⁴ Sa kadugayun, tinipun ni Hari Bin Hadad taga Aram ti tanan niya manga sundalu ag pinalibutan ti Samarya.

²⁵ Dahil siyun, masyadu ti lun-us sa banwa, tugka sa nagmahal ti bililyun. Ti halaga ulu asnu 80 ka pulud pilak, ag ti halaga usa ka pulak iput kalampati lima ka pulud pilak.

²⁶ Pagka sa usa ka sirang, habang maglawuy ti hari Israil sa babaw alad batu, may usa ka babayi rinminggit sa kanya, “Mahal Hari, awati duy aku!”

²⁷ Sinmagut ti hari, “Nu unman mangawat ti Panginuun sa kanmu unu kang mabuwat? Udyi aku may tirigu ngatay intus mipakaun sa kanmu.”

²⁸ Bag-u nagpaingana ti hari, “Hintay lugud kanmu kakurian?” Sinmagut ti babayi, “Magkumun sa kangku inda pag babayi, ‘Kan-un nita kanmu anak lalaki, bag-u aldaw kangku maan pag anak lalaki kanta kan-un.’

²⁹ Nakan tinama ngani nimi kang anak ag kinaun. Pagka sa usa ka sirang magkun aku sa kanya, bulwata yi kanmu anak hampay kan-un nita. Dapat itinagu niya inda.”

³⁰ Pagka nadnugan hari ti sinabi babayi, ginisi niya kay rutay sa masyadu pag karukuan. Ag habang maglakaw siya sa babaw alad batu, nakitan siya manga tawu may sulung saku pinauniban rutay.

³¹ Magsabi siya, “Mana parusahan gid aku Diyus masyadu nu unman niku mapuldan ulu si Ilisyu kay anak ni Sapat taynguna pag sirang!”

³² Matukawan si Ilisyu sa kay balay maghampang sa manga manugpamahala Israil ati katpung kay nagsugu hari sa manugbarita hampay umuna sa kanya ati sa kan Ilisyu. Dapat bag-u rinmas-ug ti manugbarita hari, magkun si Ilisyu sa manga manugpamahala, “Bantayi niyu, usa ka manmamatay tawu ti nagpadara manugbarita hampay puldan aku ulu. Nu rumas-ug tunda pag manugbarita, talakpi niyu ti sabian ag danga siya pagpasakahan. Magdasun sa kanya kay amu.”

³³ Magbagaw di waya si Ilisyu sa kanda, rinmas-ug yi ti manugbarita ag magkun siya, “Ti Panginuun ti nagpadara kakurian sa kanta. Hayga alagdun waya niku ti awat niya?”