2 Hari 5 - Hanunuu

Pinaayad si Naaman sa Kay Sakit sa Lukub

¹ Si Naaman ti kumandir manga sundalu Aram paggalangun gid hari Aram, dahil sa panab-anan niya ipinanalu Panginuun ti Aram. Mayad siya pag sundalu, dapat may dilikadu siya pag sakit sa lukub.

² Pagka nan-gira ti manga sundalu Aram sa Israil, may nabihag sida usa ka daraga. Binwat inda panawuhun ni Naaman asawa.

³ Pagka sa usa ka sirang, magsabi inda pag daraga sa kay amu babayi, “Nu pumasampak lang kang amu lalaki si Naaman sa purupita ati sa Samarya, paayadun gid siya sa kay sakit sa lukub.”

⁴ Nakan sinabihan ni Naaman ti hari tungkul sa sinabi daraga taga Israil.

⁵ Magsabi ti hari Aram, “Paglakaw, ag daraha nimu kang surat tabug sa hari Israil.” Nakan linmakaw ngani si Naaman may dara manga pamakaun: 350 ka kilu pilak, 70 ka kilu gintu ag sampulu ka bilug rutay.

⁶ Inda ti pagsabihun sa surat kay dara tag sa hari: “Ipinadara niku asan si Naaman kang suruguun hampay paayadun nimu siya sa kay sakit sa lukub.”

⁷ Pagka nabasa hari Israil ti surat, ginisi niya kay rutay dahil sa karukuan ag magkun, “Hayga sa kangku niya pag-ipinadara inda pag tawu hampay paayadun kay sakit sa lukub? Hintay aku, Diyus aw? May kapangyarihan aw lugud aku manmatay ag bumuhi? Magbuwat lang siya dahilan hampay man-girirahan kami!”

⁸ Suruguun Diyus si Ilisyu. Pagka nabaritaan niya ti nangyari, nagpadara siya inda pag padakit sa hari: “Hayga ginisi nimu kanmu rutay? Paataytagan sa kangku tunda pag tawu, hampay maalaman niya may purupita sa Israil.”

⁹ Nakan ginminan si Naaman masakyan sa kay kalisa kaibahan ti tanan niya sundalu ag nagpat-ung sa puwirtahan balay ni Ilisyu.

¹⁰ Namasugu si Ilisyu manugbarita hampay sabihun sa kan Naaman kuntay pag-atag siya sa Sapa Hurdan ag pagpatalgub siya ati makapitu ka bisis, bag-u maayadan yi siya.

¹¹ Dapat nangisug si Naaman ag linmakaw yi magkurim-ud. Magkun siya, “Kang isip pihu gid lumuwas siya ag umatubang sa kangku. Kang isip manawag siya sa Panginuun sa kay Diyus bag-u ikupa niya kay kamang sa babaw niku lukub ag paayadun aku.

¹² Ti manga sapa Abana hanggan Parpar sa Damasku mayad man sa iba manga sapa sitay sa Israil? Hayga balaw yi lang aku ati pag patalgub hampay umayad?” Nakan linmakaw siya magkaisug.

¹³ Dapat nagpakarani sa kanya kay manga panawuhun ag magkun, “Duy, nu may pag-isugu ti purupita sa kanmu makuri, balaw aw lugud buwatun nimu? Nakan hayga unman nimu buwatun kay pagsabihun pagpatalgub kawu hampay umayad?”

¹⁴ Nakan linmakaw ngani si Naaman tabug sa Sapa Hurdan ag napatalgub kay sadili makapitu ka bisis, angay sa pagsabihun suruguun Diyus. Tunda ginan mayad yi kay sakit ag malumpiyu yi kay lukub parihu sa lukub lapsag.

¹⁵ Bag-u binmalik si Naaman hanggan kay manga kaibahan sa suruguun Diyus. Tinmidug siya sa atubangan ni Ilisyu ag sinabi, “Taynguna napatutuuhanan niku unman yi may tuhay Diyus sa buu kalibutan purya sa Diyus Israil. Nakan duy, tanggapa inda pag pakaun niku sa kanmu.”

¹⁶ Sinmagut si Ilisyu, “Magsumpa aku sa buhi pag Panginuun, kang pagsirbihan, balaw aku mananggap tunda pag pakaun.” Pagpilitun siya ni Naaman kuntay tanggapa kay pakaun, dapat unman gid siya nananggap.

¹⁷ Magsabi si Naaman, “Nu dayu nimu inda tanggapun, mahimu aw pahintuluti yi lang aku kargahan niku daga sitay ginan kang duwa ka kabayu, ag daran-un niku inda sa kanmi. Nakan kainda ginan dayi aku manhandug manga handug pagsunugun ag tuhay waya pag manga handug sa tuhay pag diyus nu unman sa Panginuun lang.

¹⁸ Mana duy, patawadun aku Panginuun nu manguyug aku sa kang hari atabug sa simbahan ni Rimun, imaw ti diyus-diyusan, agud mansamba ati. Kailangan lang buwatun niku inda bilang usa ka takinan pagsarigan hari. Dapat mana patawadun aku Panginuun nu manluhud diman aku ati.”

¹⁹ Magsabi si Ilisyu, “Pag may kahusayan kanmu lakaw.” Dapat unman waya ngani arayu ti nalakawan ni Naaman,

²⁰ magkumun si Gihasi sa kay sadili, “Pinaginan niku amu si Naaman taga Aram, unman niya tinanggap kay dara pag pamakaun. Magsumpa aku sa buhi pag Panginuun, bukadun niku siya ag manhagad aku una hintay sa kanya.”

²¹ Nakan daldali linagas ni Gihasi si Naaman. Pagka nakitan ni Naaman si Gihasi magpalagiw atag sa kanya, dinmugsun siya sa kay kalisa ag sinulang siya. Namaingana si Naaman, “May daut aw nangyari?”

²² Sinmagut si Gihasi, “Unman duy. Sinugu lang aku niku amu kuntay sabihan kawu may rinmas-ug duwa ka kalay-awan purupita ginan sa kabantudan Ipraim. Nu mahimu kunu pakan-i sida 35 ka kilu pilak ag duwa ka bilug rutay.”

²³ Magsabi si Naaman, “Hu, inda ti 70 ka kilu pilak.” Ag pagpilitun waya siya ni Naaman tanggapa tunda. Isinukad ni Naaman ti pilak sa duwa ka bay-ung hanggan ti duwa ka bilug rutay, ag ipinakaun inda sa kay duwa ka panawuhun imaw ti mandara inda para kan Gihasi.

²⁴ Pagras-ug ni Gihasi sa bantud, bin-ul niya ginan sa manga panawuhun ti duwa ka bay-ung bag-u pinauli yi sida. Siyun gin, dinara niya tunda sa kay balay ag itinagu.

²⁵ Bag-u nag-ati siya sa kan Ilisyu. Namaingana si Ilisyu sa kanya, “Naan ginan kawu, Gihasi?” Sinmagut si Gihasi, “Unman duy aku may linakaw.”

²⁶ Dapat magkun si Ilisyu, “Unman aw nimu alam kang ispiritu ati pagka dinmugsun si Naaman sa kay kalisa hampay sulangun kawu? Balaw inda ti udas hampay tumanggap kuwarta, rutay, taranuman manga ulibu, ubasan, manga baka, karanidu, hanggan manga panawuhun.

²⁷ Dahil sa inda pag binwat nimu, kay sakit sa lukub ni Naaman misalin sa kanmu hanggan sa kanmu manga linahi hanggan aban.” Pag-ighit ni Gihasi ginan sa kan Ilisyu, nagkaimaw ngani siya dilikadu pag sakit sa lukub, ga burak yi kay kalagti kay lukub.