2 Hari 4 - Hanunuu

Nagyamu ti Lana Ulibu Buranday Babayi

¹ May usa ka buranday babayi kaybi, kay asawa kaibahan sa gurupu manga purupita. Pagka sa usa ka sirang, naghagad siya awat sa kan Ilisyu. Magkun siya, “Namatay yi duy kang asawa, kanmu manugsirbi, ag alam nimu nu kabitay kay maggalang sa Panginuun. Taynguna, ti inutangan niya pag tawu rinmas-ug hampay bul-un kanmi duwa ka anak lalaki hampay buwatun suruguun bilang kabaydanan sa utang.”

² Magkumun si Ilisyu sa kanya, “Unu lugud ti miawat niku sa kanmu? Sabihan sa kangku, unu ti may imaw sa kanmu balay?” Nagsagut ti babayi, “Unman duy, purya lang sa usa ka diit pag banga may sukad lana ulibu.”

³ Magkun si Ilisyu, “Atihi ti tanan nimu manga kakilala ag pangudam kawu kayamu gid pag sukadan.

⁴ Pagsulud kamu magtal-anak sa kanyu sulud balay ag talakpi kay sabian. Salinan niyu lana ulibu ti tanan niyu sukadan. Pasaruyan nimu ti napnu yi pag sukadan.”

⁵ Katida ngani kay binwat. Pagras-ug sa kay balay, tinalakpan nida magtal-anak kanda balay. Bag-u dinara niya manga anak ti manga sukadan tabug sa kanya, ag sinukadan niya inda lana ulibu.

⁶ Pagka napnu yi ti tanan sukadan, magkun siya sa kay anak, “Nai waya aku sukadan.” Magkun kay anak, “Unman yi duy may sukadan.” Ag nap-ut waydi ti bulus lana ulibu.

⁷ Nag-ati ti babayi sa kan Ilisyu ti suruguun Diyus ag tinultulan niya siya sa nangyari. Magkun si Ilisyu sa kanya, “Paglakaw ag pabilyan ti lana ulibu, bag-u bayadi kanmu utang. May masawad waya kawu kuwarta, kang-ud waya sa kanyu magpangabuhi magtal-anak.”

Si Ilisyu ag ti Babayi Taga Sunim

⁸ Pagka sa usa ka sirang, nag-ati si Ilisyu sa Sunim. May imaw ati mayaman pag babayi ti nanagda sa kan Ilisyu kuntay mangaun. Siyun ginan, nu maglawuy siya sa Sunim, maghapit siya sa balay babayi ag magkaun.

⁹ Taynguna, magkun ti babayi sa kay asawa, “Alam niku inda pag tawu ti maghapit sitay pirmi sa kanta usa ka banal pag suruguun Diyus.

¹⁰ Buwatan nita siya diit pag sulud-sulud sa may babaw atup, bag-u paulian nita inda laming, lamisa, tukawan, hanggan sulul-an, hampay nu mag-ataytag siya sa kanta may maulian siya.”

¹¹ Pagka sa usa ka sirang, nag-ati si Ilisyu sa Sunim, nagdayik siya sa sulud-sulud ag nagpahari ati.

¹² Sinugu niya kay panawuhun si Gihasi kuntay tawaga ti babayi. Nakan tinawag ngani ni Gihasi ti babayi. Pagka rinmas-ug ti babayi,

¹³ magsabi si Ilisyu sa kay panawuhun, “Paingan-a siya nu unu kanta mabuwat para sa kanya, sa kay mayad pag mag-asikasu sa kanta. Barang may ipakihampang siya sa kanta sa hari ngatay sa kumandir manga sundalu.” Sinmagut ti babayi, “Mayad di kang kahamtangan sitay kaibahan niku manga kasimanwa.”

¹⁴ Nagpaingana si Ilisyu sa kan Gihasi, “Malu, hintay nguna kanta mabuwat sa kanya?” Sinmagut si Gihasi, “Unman duy siya may anak lalaki ag gurangun yi kay asawa.”

¹⁵ Magkun si Ilisyu, “Tawaga maan siya.” Nakan tinawag maan ngani siya ni Gihasi, bag-u nagtindug ti babayi sa may sabian.

¹⁶ Magkun si Ilisyu, “Sa sunud pag timpu, sa kainda diman pag udas may salilyun yi kawu anak lalaki.” Sinmagut ti babayi, “Danga duy kawu magpudil sa kangku. Suruguun kawu Diyus.”

¹⁷ Dapat namuduy ungud ti babayi, ag nanganak siya lalaki sa tunda pag udas, sa sunud pag timpu, angay inda sa sinabi sa kanya ni Ilisyu.

¹⁸ Pagka daka yi ti anak, nag-ati siya sa kay ama sa tanman magtarabahu kaibahan manga manug-ani.

¹⁹ Pagka ati yi, magkun siya sa kay ama, “Masakit kang ulu! Masakit kang ulu!” Magkun kay ama sa panawuhun, “Daran-a siya sa kay ina!”

²⁰ Nakan dinara ngani panawuhun ti anak sa kay ina, bag-u sinapupu niya ina tugka sa karaw-an sirang ag namatay ti anak.

²¹ Dinara niya ina kay anak bangkay sa sulud-sulud ni Ilisyu sa tungud, ag ibinugtang sa igyaan. Bag-u linmuwas siya sa sulud-sulud ag tinalakpan ti sabian.

²² Tinawag babayi kay asawa ag sinabihan, “Mahimu aw duy padaran-i aku usa ka panawuhun hanggan usa ka asnu hampay madali aku makaras-ug sa suruguun Diyus, ag makabalik maan.”

²³ Nagpaingana kay asawa, “Hayga mangatag kawu taynguna? Balaw waydi Pista Lapus Lati ngatay Sirang Pamahari?” Sinmagut ti babayi, “Atag lang.”

²⁴ Nakan pinaulian niya tukawan ti asnu ag magkun sa kay panawuhun, “Apura! Danga maghari nu unman aku magsabi sa kanmu.”

²⁵ Nakan linmakaw sida, rinmas-ug sida sa Bantud Karmilu, nu naan asan ti suruguun Diyus. Pagka nakitan ni Ilisyu ti babayi sa arayu di waya, magkun siya sa kay panawuhun sa kan Gihasi, “Bantayi, asan ti babayi taga Sunim!

²⁶ Palagiw, sulanga siya. Kamustaha nu kabitay siya hanggan kay asawa, ag kay anak.” Magkun ti babayi sa kan Gihasi mayad di ti tanan.

²⁷ Dapat pagras-ug niya sa kan Ilisyu sa bantud, linmuhud siya ag hiniyaptan niya kay lulud ni Ilisyu. Nagpakarani si Gihasi hampay guyudun siya atag sa arayu, dapat magsabi si Ilisyu, “Pabay-ani lang siya! Pihu may kakurian siya, dapat unman may sinabi ti Panginuun sa kangku nu hayga.”

²⁸ Magkun ti babayi, “Duy, unman aku nanhagad anak lalaki sa kanmu; kawu ngapu ti nagsabi manganak waya aku. Magsabi ngani aku sa kanmu danga nimu aku pagpasariga.”

²⁹ Pagka nasalman ni Ilisyu may nangyari maaw sa anak, magsabi siya sa kan Gihasi, “Pag-alistu kawu sa pag-ati sa kay balay. Daran-a kang sugkud ag pagdalidali kawu. Nu may masulang kawu, danga kawu magpansin, ag nu may magbagaw sa kanmu danga kawu magsagut. Pagras-ug nimu, ibugtang rargu nimu kang sugkud sa uyahun anak.”

³⁰ Dapat magsabi kay ina anak sa kan Ilisyu, “Magsumpa aku sa buhi pag Panginuun hanggan sa kanmu, unman gid aku muli nu dayu kawu magkuyug sa kangku.” Nakan linmakaw si Ilisyu kaibahan niya.

³¹ Nag-una si Gihasi ag ibinugtang niya ti sugkud sa uyahun anak, dapat unman gid nagbagaw ngatay nagtandug ti anak. Nakan nagbalik si Gihasi hampay sulangun si Ilisyu ag sabihan, “Unman gid nabuhi ti anak.”

³² Pagka rinmas-ug si Ilisyu sa balay, nakitan niya ati sa kay sulud-sulud ti anak mabugtangan sa kay igyaan.

³³ Siya lang ti sinmulud ag tinalakpan kay sabian, ag nandarangin sa Panginuun.

³⁴ Bag-u dinapaan niya ti anak, ipinad-ut kay bibig sa bibig anak, kay mata sa mata anak, ag kay kamang sa kamang anak. Pagka madapaan siya sa anak, amat-amat nag-init ti bilug anak.

³⁵ Tinmidug si Ilisyu, ag magpabalik-balik sa sulud-sulud. Bag-u dinapaan maan niya ti anak. Namas-un ti anak pitu ka bisis, bag-u iminuklat niya kay manga mata.

³⁶ Tinawag ni Ilisyu si Gihasi ag sinabihan, “Tawaga kay ina.” Nakan tinawag ngani siya. Pagras-ug babayi magsabi si Ilisyu sa kanya, “Bul-a kanmu anak.”

³⁷ Linmuhud ti babayi sa atubangan ni Ilisyu nagpasalamat sa kanya. Bag-u bin-ul niya kay anak ag dinara tag sirung.

Ti Makadululaw sa Udas Lun-us

³⁸ Tigrulun-us sa Gilgal kay binmalik ni Ilisyu ati. Taynguna, habang maghampang ti gurupu manga purupita sa kanya, magsabi siya sa kay panawuhun, “Sapyaan ti daka pag anglit ag pagtama karan-unun para sa inda pag manga tawu.”

³⁹ Ti usa sa manga purupita nag-ati sa tanman hampay mam-ul urupiun. Nakakit siya ati urupiun magwakat, ag nam-ul siya kay manga burak inda sa kang-ud lang niya madara sa kay rutay. Pagka nuli siya, ginurut niya inda ag ilinakut sa kay pagtamaun karan-unun, balaw niya alam nu unu tunda pag kalasi halaman.

⁴⁰ Pagka natama ti karan-unun, ihinayin niya sa manga tawu. Dapat pagka magkaun yi, namagrit sida, “Suruguun Diyus, bilang makahilu inda!” Nakan balaw yi nida inda kinaun.

⁴¹ Magkun si Ilisyu, “Bul-i aku arina.” Ibinuhus rargu niya ti arina sa anglit ag magkun sa panawuhun, “Hayinan yi inda sa kanda hampay kumaun sida.” Ag balaw yi daut kay lasa inda.

⁴² Pagka sa usa maan ka sirang, may usa ka lalaki ginan sa Baal Salisa ti may dara usa ka saku may sukad 20 ka tinapay ginan sa un-an ani sibada hanggan bag-u pag uyas tabug sa kan Ilisyu. Magsabi si Ilisyu, “Pakan-an tunda sa gurupu manga purupita hampay kanda kan-un.”

⁴³ Magsabi kay panawuhun, “Kabitay niku inda maipakang-ud sa 100 tawu?” Sinmagut si Ilisyu, “Pakan-an lang tunda sa kanda hampay kumaun sida. Inda ti pagkumnun Panginuun: Makakaun sida ag may masawad waya.”

⁴⁴ Nakan ipinakaun ngani inda panawuhun sa manga purupita ag nakakaun sida, bag-u may nasawad waya, angay sa sinabi Panginuun.