2 Hari 3 - Hanunuu

Nanlalabanan ti Israil ag ti Muab

¹ Naghari sa Israil si Huram kay anak ni Akab katpung 18 pag timpu kay maghari ni Husapat sa Huda. Sa Samarya pag nangulian si Huram, naghari siya sa sulud sampulu may duwa ka timpu.

² Daut kay binuwat sa magbantay Panginuun, dapat udyi waydi parihu sa kay ama ag ina kay binwat kadautan. Ipinadaut niya ti aramirawan pag batu ipinabwat niya ama bilang pagkilala sa kan Baal.

³ Dapat naghuwad siya sa manga kasalanan ni Hirubuam kay anak ni Nabat, imaw ti pinun-an kasalanan manga taga Israil. Unman gid niya binugyahan tunda pag manga kasalanan.

⁴ Si Misa hari sa Muab mag-alaga kay manga karanidu, ag kada timpu magpakaun siya sa hari Israil tig 100,000 manga ibun karanidu, hanggan tig 100,000 bulbul manga tudu karanidu.

⁵ Dapat pagka namatay si Akab, naglaban maan siya sa hari Israil.

⁶ Tunda katpung, tinipun ni Huram ti buu Israil ag nagluwas sida sa Samarya hampay man-gira sa Muab.

⁷ Namadara siya barita atabug sa kan Hari Husapat taga Huda: “Naglaban sa kangku ti hari Muab. Manguyug aw kawu sa kangku hampay man-gira sa kanda?” Nagsagut si Husapat, “Hu, alistu aku kumuyug sa kanmu, ag alistu aku ipagamit sa kanmu kang manga sundalu hanggan manga kabayu.”

⁸ Nagpaingana si Husapat, “Naan kita pag lumakaw nu man-gira?” Sinmagut si Huram, “Sa pangawakawaan Idum.”

⁹ Nakan naglakaw yi ngani ti hari Israil hanggan ti hari Huda, kaibahan diman hanggan ti hari Idum. Pagkalawuy pitu ka sirang kanda maglakaw, natabwan danum ti manga sundalu hanggan kanda manga hayup.

¹⁰ Magkun ti hari Israil, “Kaawaawa gid kita pag tulu ka hari! Dinara kita Panginuun sitay hampay ipakaun lang sa kamang hari Muab?”

¹¹ Dapat magkun si Husapat, “Unman aw atay may mapaingan-an purupita Panginuun? Nu may imaw, makapaingana kita sa Panginuun sa panab-anan niya nu hintay kanta buwatun.” Nagsagut ti usa ka takinan hari Israil, “Atay duy si Ilisyu kay anak ni Sapat. Kaawat siya kaybi ni Ilyas.”

¹² Magkun si Husapat, “Ti bagaw Panginuun ati sa kanya.” Nakan nag-atag ngani ti hari Israil, ti hari Huda si Husapat, ag ti hari Idum sa kan Ilisyu.

¹³ Magkun si Ilisyu sa hari Israil, “Hintay kang labut sa kanmu? Pag-ati kawu sa manga purupita nimu ama hanggan nimu ina!” Nagbagaw ti hari Israil, “Dayu! Dahil ti Panginuun imaw ti nagdara sa kanmi tulu sitay hampay ipakaun lang sa kamang hari Muab.”

¹⁴ Nagbagaw si Ilisyu, “Magsabi aku kay tutuu sa atubangan buhi ag Makamaskihan pag Panginuun, kang pagsirbihan, dayu mana aku manlabut sa kanmu nu unman dahil sa kang maggalang sa kan Hari Husapat taga Huda.

¹⁵ Malu, daran-i aku sitay tag tawu madunung magkaskas alpa.” Habang pagkaskasun ti alpa, sinuldan kamaskihan Panginuun si Ilisyu,

¹⁶ Nagbagaw siya, “Inda ti pagsabihun Panginuun: ‘Inda pag luung mapnu danum.

¹⁷ Una unman may uran ngatay durus, mapnu danum inda pag luung, ag makainum kamu hanggan kanyu manga hayup.

¹⁸ Malpus lang inda pag bagay nu sa Panginuun. Balaw lang tunda, ipatalu waya niya sa kanyu ti Muab.

¹⁹ Wasakun niyu kanda mapag-un pag manga banwa sangput manga alad batu. Pamuldun niyu kanda marinu pag manga kayu, ag pantap-ukan kanda manga bulbugan, ag pandautun kanda abunda pag manga tanman sa panab-anan pagtumpuk manga batu.’ ”

²⁰ Pagka surip, sa udas tig saragda, binmulus ti danum ginan sa Idum, ag napnu danum tunda pag daga.

²¹ Pagka nabaritaan manga taga Muab nansalakay ti tulu ka hari sa kanda, tinipun nida ti tanan kalalakihan, kalay-awan una gurangun, ti may kaya yi gumira, ag ipinauli sida sa tab-anan Muab.

²² Pagka nagbangun sida surip-surip, nakitan nida ti danum bilang yi dugu karagang pagka nasinggitan init.

²³ Magkumun sida, “Dugu inda! Pihu gid nanlalabanan ti tulu ka hari ag nanmaratyan. Abala, pamul-un nita kanda manga butang!”

²⁴ Dapat pagka rinmas-ug ti manga Muabita sa kampu manga Israilita, nagluwas ti manga Israilita ag ginira sida tugka sa nagpalalagiw sida. Ginira nida tugka sa kanda rugar ti manga Muabita ag pinanmatay.

²⁵ Winasak nida ti banwa, yinamtan manga batu ti mauya pag manga tanman tugka sa natabunan manga batu. Pinantakbunan diman nida ti manga bulbugan, ag pinamukan ti marinu pag manga puun kayu. Sa uryan-uryan, ti Kir Harisit wadi ti nasawad, dapat linibutan waya gid inda nida manga sundalu may manga lampitaw ag ginira.

²⁶ Pagka nakitan hari Muab magkatalu yi sida sa labanan, iniba niya ti 700 tawu may manga baladaw hampay lumawuy lakaw sa manga sundalu hari Idum, dapat nibuyu sida.

²⁷ Nakan bin-ul niya kay panganay pag anak imaw mana ti umilis sa kay pagka hari, bag-u kay ihinandug inda sa may alad batu bilang handug pagsunugun. Dahil siti subra gid ti pangagalit laban sa manga Israilita, nakan pinabay-anan yi lang nida ti hari Muab ag nuli sida sa kanda rugar.