2 Hari 25 - Hanunuu

¹ Pagka sa ikasiyam pag timpu kay maghari ni Sidikyas, sa ikasampulu pag sirang sa ikasampulu pag bulan, naggira si Hari Nabukudunusur taga Babilunya hanggan ti tanan niya sundalu sa Hirusalim. Nagkampu sida sa luwas banwa ag nagbuwat manga tumpuk daga sa sangput alad batu agud makadayik.

² Pinalibutan nida ti banwa tugka sa ika-11 pag timpu sa kay maghari ni Sidikyas.

³ Pagka sa ikasiyam pag sirang sa ikap-at pag bulan sa tunda pag timpu, masyadu yi gid ti lun-us sa banwa ag unman yi may karan-unun ti manga tawu.

⁴ Taynguna, tinumpag manga taga Babilunya ti usa ka bahagi alad batu banwa, nakan naggayak si Sidikyas hanggan ti tanan niya manga sundalu agud malagiw. Dapat dahil pinalibutan manga taga Babilunya ti banwa, mag-alagad dapu sida tugka yumabi. Bag-u naglakaw sida sa sabian, sa karaw-an duwa ka alad batu arani sa gardin hari. Nagpalagiw sida atag sa Karatagan Hurdan,

⁵ dapat linagas sida manga taga Babilunya ag natakdan sida sa karatagan Hiriku. Napablag sa kan Sidikyas ti tanan niya manga sundalu,

⁶ ag nadakup siya. Dinara siya sa hari Babilunya sa Ribla ag ati pag sinintinsiyahan.

⁷ Pinanmatay sa kay atubangan kay manga anak lalaki. Bag-u linuwat kay manga mata, hinigtan tarikada siya, ag dinara sa Babilunya.

Dinaut ti Balay Diyus

⁸ Pagka sa ikapitu pag sirang sa ikalima pag bulan, katpung 19 pag timpu kay maghari ni Nabukudunusur sa Babilunya, nag-atag sa Hirusalim si Nibusaradan ti kumandir manga guwardiya hari Babilunya.

⁹ Sinunug niya ti Balay Diyus Panginuun, ti balay hari, ti tanan pag balay sa Hirusalim, ag ti tanan mahalaga pag manga arabwat balay.

¹⁰ Sa kay magdumara dinaut manga sundalu taga Babilunya ti manga alad batu magsangput sa Hirusalim.

¹¹ Binihag niya ti nasawad pag manga tawu sa banwa, hanggan ti manga tawu napakampi sa hari Babilunya.

¹² Dapat pinabay-anan niya ti iba ka pinakapugri pag manga tawu agud mangalaga ubasan hanggan tanman.

¹³ Dinaut manga taga Babilunya inda pag manga bagay sa Balay Diyus Panginuun: ti galang pag manga tulduk, ti manga karusa garamitun sa mag-akut danum, ag ti daka pag sukadan danum galang pag ingarnan Dagat. Ag dinara nida ti manga galang sa Babilunya.

¹⁴ Bin-ul diman nida ti manga kawali, manga pala, manga pamulud sa mitsa, manga ungut, ag iba waya galang pag kagamitan sa Balay Diyus.

¹⁵ Bin-ul diman ni Nibusaradan ti manga palaulian baga, ti manga malukung, ag ti iba waya gintu ag pilak pag manga kagamitan.

¹⁶ Harus unman matimbang ti manga galang ginan sa duwa ka tulduk, sa daka pag sukadan danum pag-ingarnan Dagat, ag sa manga karusa garamitun sa mag-akut danum. Inda pag manga bagay ipinabuwat kaybi ni Sulumun para sa Balay Diyus Panginuun.

¹⁷ Kay kaabwat ti kada tulduk 18 ka luk-an siku. Ti duwa ka ulu galang kay abwat 3 ka luk-an siku. May buribud inda tarikada surugdungan ag sinangput pamarinu burak kayu pumigranata galang.

¹⁸ Binihag diman ni Nibusaradan si Siraya pangulu manughandug, si Sipanyas dasun sa katungkulan ni Siraya, hanggan ti tulu ka guwardiya sa sabian Balay Diyus.

¹⁹ Inda ti manga nakitan niya binihag ginan sa banwa: ti pinunu manga sundalu Huda, ti lima ka manugpatigayun sa hari, ti kumandir manugbuul manga tawu agud buwatun sundalu, ag ti 60 waya ka nasakupan ati.

²⁰ Dinara sida tanan ni Nibusaradan sa hari Babilunya ati sa Ribla,

²¹ sakup Hamat. Ag ati pag minatay sida hari. Nakan ti nasakupan Huda binihag, dinara sa arayu sa kanda daga.

Si Gidalyas Gubirnadur sa Huda

²² Pinili ni Hari Nabukudunusur taga Babilunya si Gidalyas anak ni Ahikam ag laki ni Sapan bilang gubirnadur manga tawu nasawad sa Huda.

²³ Pagka nadnugan inda manga kumandir Huda hanggan nida manga tawuhan, nag-ati sida sa kan Gidalyas ati sa Mispa. Sida ni Ismail kay anak ni Nitanyas, ni Huhanan kay anak ni Kariya, ni Siraya kay anak ni Tanhumit taga Nitupa, ni Haasanyas taga Maaka, hanggan kanda manga tawuhan.

²⁴ Nagsumpa si Gidalyas sa kanda hanggan sa kanda manga tawuhan, “Danga kamu magkadala sa manga takinan taga Babilunya. Mangulian lang kamu sa inda pag daga ag pagsirbi sa hari Babilunya, ag bumaliw mayad ti tanan sa kanyu.”

²⁵ Dapat pagka sa ikapitu pag bulan sa tunda pag timpu, si Ismail kay anak ni Nitanyas laki ni Ilisama, mimru hari pag magtal-anakan, nag-atag sa Mispa kaibahan sa sampulu ka tawu ag minatay nida si Gidalyas hanggan kay manga kaibahan pag manga taga Huda ag manga taga Babilunya.

²⁶ Dahil siyun, ti tanan pag manga tawu ginan sa pinakabantug tugka sa pinakaababa, hanggan ti manga kumandir manga sundalu, nalagiw atag sa Ihiptu dahil nadala sida nu hintay ti buwatun manga taga Babilunya.

Pinalpasan si Hihuyakin

²⁷ Pagka sa ika-37 pag timpu sa kay pagkabihag ni Hari Hihuyakin taga Huda, naghari sa Babilunya si Ibil Mirudak. Pinalpasan niya si Hihuyakin pagka sa 27 pag sirang sa ika-12 ka bulan sa tunda pag timpu.

²⁸ Mayad siya sa kan Hihuyakin ag kinilala niya siya subra man sa iba manga hari binihag diman ati sa Babilunya.

²⁹ Nakan unman yi nanrutay si Hihuyakin panrutayun pirisu, ag tunda ginan magkaun yi siya kaibahan sa hari.

³⁰ Sirang-sirang pagpakan-an siya hari kay manga kailangan habang buhi waya siya.