2 Hari 24 - Hanunuu

¹ Katpung udas maghari si Hihuyakim, ginira ni Hari Nabukudunusur taga Babilunya ti Huda ag sinakup niya si Hihuyakim sa sulud tulu ka timpu. Dapat pagka sa uryan naglaban si Hihuyakim sa kan Nabukudunusur.

² Ipinadara Panginuun ti manga taga Babilunya, taga Aram, taga Muab, ag taga Amun agud girahun ti Huda, angay sa sinabi Panginuun sa panab-anan niya manga manugsirbi pag manga purupita.

³ Nangyari gid waydi inda sa Huda angay sa isinugu Panginuun, hampay mapaighit niya sida sa kay atubangan, dahil sa manga kasalanan binuwat ni Manasis,

⁴ hanggan kay pagpamatay sa manga unman may alam pag manga tawu. Pinabulus niya kanda dugu sa Hirusalim, unman inda mapatawad Panginuun.

⁵ Ti iba waya ka tultulanun tungkul sa maghari ni Hihuyakim, ag ti tanan niya binuwat, nisurat sa Ribru Tultulanun manga Hari Huda.

⁶ Pagka namatay si Hihuyakim, si Hihuyakin kay anak imaw ti nag-ublus sa kanya sa kay pagka hari.

⁷ Unman yi inmuman naggira ti hari Ihiptu, dahil nasakup hari Babilunya ti tanan niya magkaapu pag daga, ginan sa Laad Ihiptu tugka sa Sapa Iyupratis.

Kay Maghari ni Hihuyakin sa Huda

⁸ Si Hihuyakin 18 ka timpu kay maghari. Sa Hirusalim siya pag nangulian, ag naghari siya sa sulud tulu ka bulan. Kay ina si Nihusta kay anak ni Ilnatan taga Hirusalim.

⁹ Daut kay binuwat sa magbantay Panginuun, parihu sa binuwat niya ama ni Hihuyakim.

¹⁰ Pagka udas niya maghari, ti manga takinan ni Hari Nabukudunusur taga Babilunya naggira sa Hirusalim, ag pinalibutan nida inda.

¹¹ Nag-atag hanggan si Nabukudunusur sa Hirusalim habang pagsangputun inda niya manga tawuhan.

¹² Sinmuku sa kanya si Hari Hihuyakin, kaibahan kay ina, ag kay manga suruguun, ag kay bantug pag manga tawu, hanggan kay manga takinan. Pagka sa ikawalu pag timpu kay maghari ni Nabukudunusur sa Babilunya, binihag niya si Hihuyakin.

¹³ Angay sa sinabi kaybi Panginuun, pinanbuul ni Nabukudunusur ti tanan pag kayamanan sa Balay Diyus Panginuun hanggan sa balay hari, ag ti tanan gintu pag kagamitan ti ipinabwat ni Hari Sulumun taga Israil para sa Balay Diyus Panginuun.

¹⁴ Binihag niya ti 10,000 ka nasakupan Hirusalim, dara ti tanan pag takinan hanggan ti pinakamadunung pag manga sundalu, ag ti tanan anad pag manga manugtarabahu ag manga manugpanday. Ti manga pinakapugri lang ti nasawad.

¹⁵ Binihag ni Nabukudunusur si Hihuyakin sa Babilunya, hanggan kay ina, manga asawa, manga takinan ag ti manga bantug pag manga tawu sa Huda.

¹⁶ Binihag diman ni Nabukudunusur ti pinakamaisug pag manga sundalu 1,000 anad sa manga manugtarabahu ag manga manugpanday pag manga sundalu.

¹⁷ Ti ipinalit niya pag hari imaw si Matanyas pag bapa ni Hihuyakin. Ag pinalitan niya Sidikyas kay ngaran ni Matanyas.

Kay Maghari ni Sidikyas sa Huda

¹⁸ Si Sidikyas 21 ka timpu pagka naghari siya. Sa Hirusalim siya pag nangulian, ag naghari siya sa sulud 11 ka timpu. Kay ina si Hamutal kay anak ni Hirimyas taga Libna.

¹⁹ Daut kay binuwat sa magbantay Panginuun, parihu sa binuwat ni Hihuyakim.

²⁰ Nakan pagka sa uryan pinaighit Panginuun ti manga taga Hirusalim hanggan ti taga Huda pakarayu ginan sa kay atubangan. Nangyari inda dahil sa pangagalit Panginuun sa kanda. Taynguna, naglaban si Sidikyas sa hari Babilunya.