2 Hari 23 - Hanunuu

Ti manga Bag-u pag Binwat ni Husyas

¹ Bag-u tinawag ni Hari Husyas ti tanan manugpamahala sa Huda ag Hirusalim.

² Nag-atag siya sa Balay Diyus Panginuun kaibahan ti tanan manga nasakupan Huda ag Hirusalim ginan sa pinakaabwat tugka sa pinakaababa. Nagkuyug diman ti manga manughandug ag manga purupita. Binasa ni Husyas sa kanda ti tanan nakasurat sa Ribru Kasunduan, ti nakitan ngani sa Balay Diyus Panginuun.

³ Bag-u nagtindug si Husyas sa saruy tulduk pirmi pagtindugan hari. Ag nagbuwat siya kasunduan sa atubangan Panginuun kuntay sumunud siya sa Panginuun sa panab-anan pagtupad sa kay manga sugu, hanggan tudlu, ag surundanun sa buu niya tagipusuun ag karadwa. Sa kainda pag paraan matupad ti manga pag-isugu sa kasunduan Diyus nakasurat sa inda pag ribru. Ag nangaku diman ti manga tawu tumupad sa kasunduan Diyus.

⁴ Bag-u sinugu ni Hari Husyas si Hilkiyas ti takinan manga manughandug, hanggan ti manga manughandug dasun sa katungkulan ni Hilkiyas, ag ti manga manughandug magguwardiya sa sabian Balay Diyus, agud bul-un sa Balay Diyus Panginuun ti tanan kagamitan paggamitun sa magsamba sa kanda ni Baal, ni Asira, ag sa tanan bagay sa langit. Ipinasunug niya inda sa luwas Hirusalim, sa katanmanan Kidrun, ag dinara kay dapug sa Bitil.

⁵ Binahasan niya sa kanda katungkulan ti manga manughandug magsirbi sa diyus-diyusan. Inda pag manga manughandug piniyaran manga hari Huda sa pagsunug manga kamangyan sa manga simbahan sa abwat pag manga rugar ati sa manga banwa Huda hanggan sa sangput Hirusalim. Nagsunug sida manga kamangyan sa kan Baal hanggan sa manga asan sa langit — sa init, sa bulan, ag sa manga pamgasan.

⁶ Ipinab-ul diman ni Hari Husyas ti tulduk tanda diyusa si Asira sa Balay Diyus Panginuun ag dinara sa luwas Hirusalim, sa Luung Kidrun ag sinunug ati. Bag-u ipinarunut niya inda dariit ag isinabwag ti dapug sa kalubngan.

⁷ Ipinadaut diman niya ti manga balay manga lalaki ag babayi magpabili kanda bilug, ati sa Balay Diyus Panginuun. Siti magtahi ti manga babayi manga rutay paggamitun sa magsamba sa kan Asira.

⁸ Ibinalik ni Husyas sa Hirusalim ti tanan manughandug mag-uli sa iba manga banwa Huda. Inuringan niya ti manga simbahan sa abwat pag manga rugar, ginan sa Giba tugka sa Biirsiba, nu naan pag magtuub kamangyan ti manga manughandug. Ipinadaut niya ti manga simbahan sa Puwirtahan ni Huswi, ti takinan sa Hirusalim. Inda pag puwirtahan ati sa wala baliwa sa may puwirtahan banwa.

⁹ Ti manga manughandug magsirbi sa manga simbahan sa abwat pag manga rugar unman pinahintulutan sumirbi sa harandugan Panginuun sa Hirusalim, dapat pinahintulutan sida magkaun tinapay balaw may pamadaka kaibahan ti iba manga manughandug.

¹⁰ Ipinadaut diman ni Husyas ti harandugan sa Tupit, sa Luung Bin Hinum, hampay unman may manhandug ati kanda manga anak sa apuy para sa kan Muluk.

¹¹ Bin-ul diman niya sa sabian Balay Diyus Panginuun ti manga kabayu ipinakaun manga hari Huda sa init. Inda pag manga kabayu ati baliwa sa sugkadan Balay Diyus, arani sa sulud-sulud ni Natan Milik imaw ti takinan. Sinunug diman ni Husyas ti manga kalisa ihinandug sa init.

¹² Ipinadaut niya ti manga harandugan ipinatindug manga hari Huda sa maratag pag atup sa tungud sa sulud-sulud ni Akas, hanggan ti manga harandugan ipinabwat ni Manasis sa duwa ka sugkadan Balay Diyus Panginuun. Ipinarunut niya inda dinariit ag isinabwag ti dapug sa Luung Kidrun.

¹³ Ipinadaut diman niya ti manga simbahan sa abwat pag manga rugar sa butlakan Hirusalim ag sa salatan Bantud Kadautan. Inda pag manga simbahan ipinatindug ni Hari Sulumun taga Israil para sa kan Astarut, ti mayagting pag diyusa manga taga Sidun, ag para sa kan Kimus, ti mayagting pag diyus manga taga Muab, ag para diman sa kan Muluk, ti mayagting pag diyus manga taga Amun.

¹⁴ Ipinarunut ni Husyas ti aramirawan pag manga batu ag pinamlud ti manga tulduk tanda diyusa si Asira. Bag-u inuringan niya ati pag manga rugar sa panab-anan pagwayak but-ul manga tawu ati.

¹⁵ Una ti harandugan sa simbahan sa abwat pag rugar ati sa Bitil ipinadaut ni Husyas. Inda pag simbahan ipinabwat ni Hirubuam kay anak ni Nabat, imaw ti pinun-an kasalanan manga taga Israil. Ipinarunut dariit inda ni Husyas ag sinunug, hanggan ti tulduk tanda diyusa si Asira.

¹⁶ Habang magturun siya sa palibut, nakitan niya ti kalubngan sa saruy bantud. Ipinab-ul niya ti manga but-ul sa kalubngan ag sinunug niya ati sa harandugan sa Bitil hampay dautun inda. Nangyari inda angay sa binagaw Panginuun sa panab-anan niya suruguun, ti nagpaalam inda pag manga bagay.

¹⁷ Nagpaingana si Hari Husyas tungkul sa usa waya ka kalubngan kay nakitan, “Kan tapu inda pag kalubngan?” Nagsagut ti manga tawu sa banwa, “Kalubngan inda manugsirbi Diyus taga Huda. Siya ti pinaalaman tungkul sa kanmu manga binwat taynguna sa harandugan sa Bitil.”

¹⁸ Nagbagaw ti hari, “Pabay-ani lang niyu kay kalubngan. Danga niyu pag bul-a kay manga but-ul.” Nakan unman nida bin-ul kay manga but-ul hanggan ti manga but-ul purupita taga Samarya.

¹⁹ Bag-u ipinadaut ni Husyas ti manga simbahan sa abwat pag manga rugar sa Samarya, parihu sa binuwat niya sa Bitil. Inda pag manga simbahan ipinabwat manga hari Israil, imaw gid inda ti nagpagalit sa Panginuun.

²⁰ Pinanmatay ni Husyas ti tanan manughandug sa tunda pag manga simbahan ati gid ngap sa manga harandugan. Ag nagsunug siya manga but-ul tawu sa tunda pag manga harandugan agud uringan tunda. Bag-u nagbalik siya sa Hirusalim.

Pag-alaala ni Husyas sa Pista Pag-alaala sa Karibrihan

²¹ Nagsugu si Husyas sa tanan tawu, “Alalahanun nita ti Pista Pag-alaala sa Karibrihan sa kadayawan Panginuun nita Diyus, angay sa nakasurat atay sa Ribru Kasunduan.”

²² Unman may kaparihu tunda pag kalasi pag-alaala sa Pista Pag-alaala sa Karibrihan sa udas manga manughusay nagdumara sa Israil ag sa udas manga hari taga Israil ag taga Huda.

²³ Inalaala inda pag pista sa Hirusalim agud dayawun ti Panginuun katpung ika-18 pag timpu kay maghari si Husyas.

²⁴ Pinalayas diman ni Husyas sa Huda ag Hirusalim ti manga pandaniwan maghampang sa karadwa namatay, ti manga diyus manga magtal-anakan, ti tuhay waya pag manga diyus-diyusan, ag ti tanan mayagting pag pagsambahun manga tawu. Binwat inda ni Husyas agud matupad ti manga sugu nakasurat sa ribru nakitan ni Hilkiyas ti manughandug sa Balay Diyus Panginuun.

²⁵ Unman waya gid may hari parihu sa kan Husyas nagsunud sa Panginuun sa buu niya tagipusuun, sa buu niya karadwa, ag sa buu niya kabisugan. Sinunud gid niya ti tanan pag Kasuguan ni Muysis. Ag unman yi may pumarihu sa kanya sa dumasun pag manga hari.

²⁶ Dapat una waya inda tanan, unman waya nab-ul ti masyadu pag pangagalit Panginuun sa Huda, dahil sa tanan pag binuwat ni Manasis ti nagpagalit sa kanya.

²⁷ Nakan nagsabi ti Panginuun, “Paighitun niku ti manga taga Huda sa kanda rugar pakarayu sa kang atubangan parihu sa binuwat niku sa manga taga Israil. Ag dayuun niku ti Hirusalim, ti pinili niku pag banwa, hanggan inda pag Balay Diyus, ti pagsabihun niku asan aku pag dayawun.”

Ti Katugkaan Maghari ni Husyas

²⁸ Ti iba waya ka tultulanun tungkul sa maghari ni Husyas, ag ti tanan niya binuwat, nisurat sa Ribru Tultulanun manga Hari Huda.

²⁹ Katpung maghari waya si Husyas, si Niku, ti hari Ihiptu, nag-atag sa Sapa Iyupratis hampay mangawat sa hari Asirya. Ginminan si Hari Husyas hanggan kay manga sundalu hampay manlaban sa kan Niku, dapat minatay siya ni Niku pagka nagsarampakan sida sa Migidu.

³⁰ Ikinarga niya manga manugsirbi kay bangkay sa kalisa ag dinara pabalik sa Hirusalim ag ilinbung sa kay sadili pag kalubngan. Ag kay anak si Hihuahas imaw ti iinilis nasakupan Huda sa pagka hari sa panab-anan pagpayid lana ulibu sa kanya.

Kay Maghari ni Hihuahas sa Huda

³¹ Si Hihuahas 23 timpu kay idad pagka siya pinili hari. Sa Hirusalim siya pag nangulian, ag naghari siya sa sulud tulu ka bulan. Kay ina si Hamutal kay anak ni Hirimyas taga Libna.

³² Daut kay binuwat sa magbantay Panginuun, parihu sa binuwat niya manga ginurang.

³³ Pinirisu siya ni Niku, ti hari Ihiptu, sa Ribla sakup daga taga Hamat, hampay balaw siya humari sa Hirusalim. Pinabayad ni Niku ti Huda buhis manga 3,500 ka kilu pilak ag 35 ka kilu manga gintu.

³⁴ Si Ilyakim ti usa waya ka anak ni Husyas imaw ti iinilis ni Niku pag hari. Kay ngaran ni Ilyakim inilisan ngaran Hihuyakim ni Niku. Si Hihuahas dinara ni Niku sa Ihiptu ag ati siya pag namatay.

³⁵ Pinabayad buhis ni Hari Hihuyakim ti manga taga Huda angay sa kanda kayamanan, hampay makabayad siya buhis kay paghagadun ni Niku, hari Ihiptu.

Kay Maghari ni Hihuyakim sa Huda

³⁶ Si Hihuyakim 25 ka timpu pagka naghari siya. Sa Hirusalim siya nangulian, ag naghari siya sa sulud 11 ka timpu. Kay ina si Sibida kay anak ni Pidaya taga Ruma.

³⁷ Daut kay binuwat sa magbantay Panginuun, parihu sa binuwat niya manga ginurang.