2 Hari 22 - Hanunuu

Kay Maghari ni Husyas sa Huda

¹ Si Husyas walu ka timpu kay idad pagka naghari siya. Sa Hirusalim siya nangulian, ag naghari siya sa sulud 31 ka timpu. Kay ina si Hidida taga Buskat, kay anak ni Adayas.

² Mayad kay binuwat sa magbantay Panginuun ag nagsunud siya sa pag-ugaliun niya ginurang ni Dabid. Sinunud gid niya ti mayad.

Nakitan ti Ribru Kasuguan sa Balay Diyus

³ Pagka ika-18 pag timpu kay maghari ni Husyas, pinaati niya sa Balay Diyus Panginuun kay manugsurat si Sapan, kay anak ni Asalya ag laki ni Misulam. Magsabi siya sa kan Sapan,

⁴ “Pag-atag kawu sa kan Hilkiyas, ti takinan manga manughandug, ag ipatipun nimu sa kanya ti kuwarta dara manga tawu sa Balay Diyus Panginuun, linikum manga manughandug magtanud sa sabian Balay Diyus.

⁵ Sabihi siya iayaw niya inda sa manga tawu piniyaran manguna sa pagpaayus Balay Diyus, hampay sida ti mansuhul sa manga manugtarabahu sa Balay Diyus Panginuun —

⁶ sa manga mag-alistu manga kayu hanggan sa manga magkarinu sa Balay Diyus ag sa manga alad batu. Ti iba kuwarta ibili nida sa manga kayu ag manga batu nabagasbasan yi, ti kailangan sa pagpakarinu Balay Diyus.

⁷ Dapat balaw yi kailangan hanapan waya sida listahan manga nagastus dahil masarigan sida.”

⁸ Magsabi si Hilkiyas sa takinan manga manughandug sa kan Sapan pag manugsurat, “Nakitan niku ti Ribru Kasuguan sa Balay Diyus Panginuun.” Ipinakaun ni Hilkiyas ti ribru sa kan Sapan ag binasa niya inda.

⁹ Bag-u nag-atag si Sapan sa hari ag nagsabi, “Bin-ul yi nimu manga takinan ti kuwarta sa Balay Diyus ag ipinakaun sa manga piniyaran sa pagpaayus Balay Diyus.”

¹⁰ Magsabi waya gid siya sa hari, “May ipinakaun sa kangku ribru si Hilkiyas pag manughandug.” Ag binasa niya inda sa atubangan hari.

¹¹ Pagka nakadnug ti hari sa nakasurat sa Ribru Kasuguan, ginitas niya kay rutay sa karukuan.

¹² Nagsugu siya sa kan Hilkiyas pag manughandug, sa kan Ahikam anak ni Sapan, sa kan Akbur anak ni Mikaya, sa kan Sapan pag manugsurat, ag sa kan Asaya kay sadili manugsirbi. Magkun siya,

¹³ “Pagpaingana kamu sa Panginuun para sa kangku ag para sa nasakupan Huda tungkul sa nakasurat sa ribru nakitan. Masyadu gid ti pangagalit Panginuun sa kanta dahil unman nagsunud kanta manga ginurang sa nakasurat sa inda pag ribru, ti pag-isugu diman sa kanta.”

¹⁴ Nakan nag-atag sida ni Hilkiyas pag manughandug, si Ahikam, si Akbur, si Sapan, ag si Asaya sa usa ka purupita babayi sa kan Hulda hampay mamaingana. Inda si Hulda mag-uli sa bag-u pag bahagi Hirusalim ag asawa siya ni Salum kay anak ni Tikba kay laki ni Harhas. Si Salum imaw ti mag-asikasu sa manga rutay sa Balay Diyus.

^15-16 Nagbagaw si Hulda sa kanda, “Inda ti sinabi Panginuun, ti Diyus Israil: Sabihi niyu ti tawu nagpadara sa kanyu tabug sa kangku, ‘Ipadamhak niku inda pag rugar hanggan kay manga nasakupan, angay sa nakasurat sa kanmu binasa pag ribru.

¹⁷ Ipakakit gid niku kang pangagalit sa inda pag rugar ag balaw inda umapas, dahil binugyahan aku nasakupan ag nagsunug sida kamangyan sa pagsamba sa tuhay pag diyus. Ginalit gid nida aku sa kanda manga binuwat.’

¹⁸ “Dapat sabihi niyu ti hari Huda, ti nagpadara sa kanyu agud mamaingana sa Panginuun, kuntay danga siya magkaaburidu sa kay nadnugan, dahil inda ti pagsabihun Panginuun, ti Diyus Israil:

¹⁹ Pinatingihan niku kanmu darangin, dahil nagsisi kawu ag nagpakumbaba kanmu sadili pagka nadnugan nimu kang sinabi laban sa inda pag rugar hanggan sa manga nasakupan inda, kuntay saadan ag rurisun inda pag rugar. Ginisi waya ngani nimu kanmu rutay ag nanlumi sa kang atubangan. Nakan aku, ti Panginuun, magsabi

²⁰ habang buhi waya kawu, balaw rumas-ug ti kadamhakan kang ipadara sa inda pag rugar. Mamatay kawu may kahusayan.” Ag tinultulan nida ti hari kay sagut ni Hulda.